Мәтанәт: Бу ҝүн мән гоншулуғумда јашајан инсанлара бу трактатдан верирәм. Трактат «Һәгигәти өјрәнмәк истәјирсинизми?» адланыр. Бујурун.

Сәидә: Дин һаггындадыр?

Мәтанәт: Бәли. Трактатын үзүндәки алты суала фикир верин. Онлардан һансы сизи...

Сәидә: Бағышлајын, сөзүнүзү кәсирәм, амма бош јерә вахт итирмәјин.

Мәтанәт: Нәјә ҝөрә белә дејирсиниз?

Сәидә: Ачығыны десәм, мән һеч Аллаһа инаныб-инанмадығыма әмин дејиләм.

Мәтанәт: Сәмими олдуғунуза ҝөрә сағ олун. Бәс сиздә һәмишә белә шүбһәләр олуб?

Сәидә: Јох, ушаг вахты ибадәт јерләринә ҝетмишәм, амма чохдандыр ки, белә јерләрә ајағым дәјмир.

Мәтанәт: Мәни дүзҝүн баша дүшүн, мәгсәдим өз етигадымы сизә јеритмәк дејил. Садәҹә мәнә мараглыдыр, јәгин ки, Аллаһын варлығына шүбһә етмәјинизин бир сәбәби вар.

Сәидә: Һә. Анам 17 ил бундан әввәл автомобил гәзасына дүшүб.

Мәтанәт: Чох пис олдум. Она һеч нә олмады ки?

Сәидә: О ҝүндән бәри анам ифлиҹдир.

Мәтанәт: Ҝөрүнүр, бу, сизи јаман сарсыдыб.

Сәидә: Һә. О вахтдан ичимдә бир суал мәни нараһат едир: Аллаһ варса, нә үчүн бунларын башымыза ҝәлмәсинә јол верди? Нәјә ҝөрә О, бизим белә әзаб чәкмәјимизә ҝөз јумур?

Мәтанәт: Сизи чох ҝөзәл баша дүшүрәм. Башы бәлалар чәкән инсан бунун сәбәбини билмәк истәјир вә бу, тәбиидир. Һәтта Аллаһын гәдимдә јашамыш бәзи садиг бәндәләрини белә, гадын олсун, киши олсун — фәрги јохдур, бу суал нараһат едирди!

Сәидә: Доғрудан?

Мәтанәт: Бәли. Олар, сизә Аллаһын Кәламындан буна даир бир нүмунә ҝөстәрим?

Сәидә: Әлбәттә олар.

Мәтанәт: Аллаһын садиг пејғәмбәрләриндән бири олан Һабаггуг ҝөрүн нә јазыб: «Ја Рәбб, нә вахта гәдәр Сәни имдада чағыраҹағам? Сәнсә ешитмирсән. “Зоракылыг вар!” дејә Сәнә фәрјад едирәм, лакин бизи гуртармырсан. Нијә мәнә шәр ҝөстәрирсән?» (Һабаггуг 1:2, 3). Бу суаллар сизин вердијиниз суаллара охшамыр?

Сәидә: Һә, охшајыр.

Мәтанәт: Пејғәмбәр белә суаллар вердијинә ҝөрә Аллаһ ону мәзәммәт етмәди, нә дә демәди ки, иманы чатмыр.

Сәидә: Мараглыдыр.

Мәтанәт: Мүгәддәс Китабда дејилир ки, Аллаһ әзабларымызы ҝөрүр вә буна лагејд дејил.

Сәидә: Сиз нәји нәзәрдә тутурсунуз?

Мәтанәт: Бахын, сизә Мүгәддәс Китабдан бир ајә ҝөстәрмәк истәјирәм. Зәһмәт олмаса, бу ајәни охујун: Чыхыш 3:7.

Сәидә: «Рәбб деди: “Һәгигәтән, Мән Мисирдә олан халгымын әзијјәтини ҝөрдүм, нәзарәтчиләрин әлиндән етдикләри фәрјадларыны ешитдим вә дәрдләринә нәзәр салдым”».

Мәтанәт: Сизҹә, бу ајәјә әсасән демәк олармы ки, Аллаһ-Таала Өз халгынын чәкдији әзаб-әзијјәтләри ҝөрүр?

Сәидә: Белә чыхыр ки, ҝөрүр.

 Мәтанәт: Анҹаг О, садәҹә кәнардан дуруб бахмыр. Бу ајәнин сонунҹу һиссәсинә бир дә фикир верин. Аллаһ дејир: «Дәрдләринә нәзәр салдым». Сизҹә, Аллаһ етинасыз, биҝанә олсајды, бу сөзләри дејәрди?

Сәидә: Јох, јәгин ки.

Мәтанәт: Дүздүр, бири вар ки, һансыса һадисәнин садәҹә мүшаһидәчиси оласан, бири дә вар ки, ондан тәсирләнәсән.

Сәидә: Һә, дүз дејирсиниз.

Мәтанәт: Буну нәзәрә алараг, ҝәлин Аллаһын халгынын әзаб чәкдијини ҝөстәрән башга бир ајәјә бахаг: Јешаја 63:9. Бу ајәнин биринҹи һиссәсиндә дејилир: «Онлар әзијјәт чәкдикдә О да әзијјәт чәкди». Бу ајәјә әсасән дејә биләрикми ки, Аллаһ халгынын чәкдији әзаблары ҝөрәндә бу, Она тәсир едирди?

Сәидә: Бурада елә дејилир.

Мәтанәт: Сәидә ханым, әслиндә, Аллаһ бизә гаршы етинасыз дејил вә чәкдијимиз әзаб-әзијјәтләр Ону кәдәрләндирир. Биз изтираб чәкәндә О да изтираб чәкир.

Мәтанәт: Ҝетмәздән өнҹә, нәзәринизә даһа бир фикри чатдырмаг истәјирәм.

Сәидә: Бујурун.

Мәтанәт: Мүгәддәс Китабда Аллаһын ҝүҹү һагда дејиләнләрә фикир верин. Бу һагда Јеремја 10:12 ајәсиндән охумаг олар. Олар, бу ајәни охујасыныз?

Сәидә: Олар. «Рәбб гүдрәти илә јер үзүнү јаратды, һикмәти илә дүнјаны гурду, дәрракәси илә ҝөјләри јајды».

Мәтанәт: Миннәтдарам. Ҝәлин бу ајәнин үзәриндә бир аз дүшүнәк. Сизҹә, Аллаһ гүдрәтли олмасајды, уҹсуз-буҹагсыз Каинаты вә орадакы бүтүн ҹисимләри јарада биләрди?

Сәидә: Әлбәттә јох.

Мәтанәт: Демәли, әҝәр әтрафда ҝөрдүјүмүз һәр шеји јаратмаг үчүн Аллаһа ҝүҹ лазым идисә, јаратдыгларыны идарә етмәк үчүн ҝөрүн Она нә гәдәр ҝүҹ лазымдыр.

Сәидә: Дүз дејирсиниз.

Мәтанәт: Мәсәлән, ҝөтүрәк сизи. Ананызын чәкдији әзаблары ҝөрмәк үрәјинизи нијә парчалајыр?

Сәидә: Неҹә парчаламасын, ахы о, мәним анамдыр.

Мәтанәт: Әлиниздә олсајды, ону елә инди сағалтмаздыныз?

Сәидә: Әлбәттә.

Мәтанәт: Бир дүшүнүн, Мүгәддәс Китаб дејир ки, Аллаһ бизим әзабларымыза нәзәр салыр, һалымыза јаныр, үстәлик, һәдсиз дәрәҹәдә ҝүҹлүдүр. Тәсәввүр едирсиниз, Аллаһ дәрһал һәрәкәтә кечмәмәк вә бизим әзаб-әзијјәтләримизә сон гојмамаг үчүн Өзүнү нә гәдәр ҹиловламалы олур?

Сәидә: Бу фикир һеч ағлыма ҝәлмәмишди.

Мәтанәт: Сизҹә, проблемләримизә һәлә ки сон гојмадығына ҝөрә Јараданын әсаслы сәбәби ола биләр *?

Сәидә: Јәгин ки.

Мәтанәт: Ҝәлин ҝәлән һәфтә ҝөрүшүб бу суалы мүзакирә едәк.

Сәидә: Олар.

Мәтанәт: Јери ҝәлмишкән, адым Мәтанәтдир. Сизин адынызы билмәк олар?

Сәидә: Сәидә.

Мәтанәт: Таныш олмағымыза шадам.

Сәидә: Мән дә.

Мәтанәт: Ҝөрүшәнәдәк.

Сәидә: Олду, сағ олун *.