Demək olar ki, hər bir ailənin öz qayda-qanunları var. Məsələn, evə saat neçədə gəlməli, elektron cihazlardan nə qədər istifadə etməli, ədəb-ərkan qaydaları və sairə.

 Bəs əgər ailədəki qaydalardan hansınısa pozmusansa, onda necə? Olan olub, keçən keçib. Vəziyyəti dəyişə bilməsən də, elə edə bilərsən ki, daha da ağırlaşdırmayasan. Gəl görək necə.

•  Nə etmək lazım deyil?

•  Nə etsən, daha yaxşı olar?

•  Həmyaşıdların nə deyir?

•   Əgər valideynlərin qaydanı pozduğundan xəbərsizdirlərsə, ürəyindən olanları ört-basdır etmək keçə bilər.

•   Əgər onların qaydanı pozduğundan xəbəri varsa, ürəyindən özünə haqq qazandırmaq, ya da günahı başqasının üstünə atmaq keçə bilər.

 Bunların heç biri yaxşı hərəkət deyil. Çünki olanları gizlətmək, yaxud bəhanələr gətirmək yetkinlik əlaməti deyil. Əksinə, bu, valideynlərinə sənin hələ də uşaq olduğunu göstərəcək.

 «Yalan danışmaq heç vaxt xeyir gətirmir. Həqiqət gec-tez üzə çıxır və onda adam daha ağır cəza alır. Həqiqəti lap başdan deyəndə isə cəza yüngül olur» (Diana).

•   Əməlini etiraf et. Müqəddəs Kitabda deyilir: «Günahlarını ört-basdır edən xeyir tapmaz» (Məsəllər 28:13). Valideynlərin bilir ki, sən mükəmməl ola bilməzsən. Amma onlar səndən dürüstlük gözləyir.

   «Valideynlərinə düzünü desən, səni daha tez bağışlayarlar. Dürüst davransan, sənə daha çox etibar edərlər» (Oliviya).

•   Üzr istə. Müqəddəs Kitabda deyilir: «Təvazökar olun» (1 Butrus 5:5). «Üzr istəyirəm» demək üçün, bəhanələr gətirməmək üçün təvazökar olmaq lazımdır.

   «Həmişə bəhanələr gətirən adamın vicdanı kütləşir. Belə adam axırda günah edəndə vicdanı onu ümumiyyətlə narahat etmir» (Heter).

•    Nəticəsinə qatlaş. Müqəddəs Kitabda deyilir: «Tərbiyəyə qulaq asın» (Məsəllər 8:33). Deyinmə, valideynlərinin verdiyi cəzanı qəbul et.

   «Cəzaya görə nə qədər şikayətlənsən, vəziyyəti bir o qədər qəlizləşdirəcəksən. Qadağalarla barışmağa çalış, diqqətini əlindən çıxan şeylərə cəmləmə» (Ceyson).

•   Etibar qazanmağa çalış. Müqəddəs Kitabda deyilir: «Əvvəlki davranış tərzinizə xas olan... köhnə şəxsiyyəti əyninizdən çıxarmalısınız» (Efeslilərə 4:22). Bundan sonra məsuliyyətli davran.

   «Əgər bundan sonra həmişə düzgün davransan, valideynlərinə eyni səhvi təkrarlamadığını göstərsən, onlar yavaş-yavaş sənə etibar edəcəklər» (Karen).

 MƏSLƏHƏT. Etibarlı olduğunu göstərmək üçün tələb olunduğundan artığını et. Misal üçün, növbəti dəfə hətta gecikməyəndə də yolda ikən valideynlərinə zəng edib evə gəldiyini xəbər ver. Bu bir ismarıc olacaq ki, yenidən onların etibarını qazanmaq istəyirsən.