2020-ci il yanvarın 1-i Britaniya Beytel ailəsi Çelmsford (Esseks qraflığı) yaxınlığındakı yeni Beytel kompleksinə köçməyə başlayıb. 2020-ci il mart ayının əvvəlində tamvaxtlı könüllülərin hamısı artıq orada yaşayacaq və işləyəcək.

Britaniya filialı 1959-cu ildən Londonun Mill-Hill adlanan ərazisində yerləşirdi. Təbliğ fəaliyyəti daha geniş vüsət aldıqca iş də artırdı. Buna görə təşkilat Londonun müxtəlif ərazilərində binalar alırdı. Bu, binalara qulluğu və beytellilərin gediş-gəlişini çətinləşdirirdi. Bir müddət filial çap işi ilə də məşğul olurdu. Vaxt var idi, dünyada çap edilən ədəbiyyatın 10 faizdən çoxunu Britaniya filialı çap edirdi. 92 il sonra, 2018-ci ilin mart ayında çapxana bağlandı və satıldı a.

Yeni Britaniya filialının tikintisi beş il çəkib. Beytel şöbələrinin hamısının bir ərazidə yerləşməsi sayəsində işin keyfiyyəti artacaq və ianələrə qənaət ediləcək. Filial kompleksi iki istehsalat binasından, ofislərdən və 400 nəfərlik altı yaşayış binasından ibarətdir. Çoxfunksiyalı bina auditoriya, yeməkxana və tədbirlər üçün məkan kimi istifadə ediləcək.

Hal-hazırda Britaniya filialı bir sıra ərazilərdə, o cümlədən Folklend adalarında, Gernsi adasında, İrlandiyada və Men adasında təbliğ fəaliyyətinə nəzarət edir. İndi Britaniya filialı audio/videomateriallar və rəqəmsal nəşrlər istehsal edəcək, eləcə də 1800-dən çox yığıncaqda xidmət edən 150000-dən çox təbliğçinin qeydinə qalmağa davam edəcək.

Yeni Beytelə ekskursiyalar 2020-ci il aprelin 6-dan başlayacaq. Qonaqların Britaniyada və İrlandiyada Müqəddəs Kitabın tarixçəsi, Yehovanın sürətlə irəliləyən təşkilatında Beytelin rolu mövzusunda nümayiş etdirilən sərgi ilə tanış olmaq imkanı olacaq.

Britaniya filial komitəsinin üzvü Stiven Hardi layihədə lap başlanğıcdan iştirak edib. O, bir çoxlarının hisslərini ifadə edərək deyib: «Yehova xeyli yerli və xarici bacı-qardaşı bu işdə iştirak etməyə təşviq edib. Nəticə gözlədiyimizdən də artıq olub. Buna görə bütün şərəf Yehovaya məxsusdur» (Efeslilərə 3:20).