2021-ci il aprel ayının sonlarından Kolumbiyada vətəndaş iğtişaşları baş qaldırıb. Yehovanın Şahidləri arasında ölən və ya yaralanan yoxdur. Amma bəzi ərazilərdə qida və yanacaq əldə etmək çətinləşib. Bununla yanaşı, dindaşlarımız COVID-19 pandemiyasının yaratdığı çətinliklərlə də mübarizə aparırlar.

Bu çətin dönəmdə bacı-qardaşlarımıza kömək üçün Kolumbiya filial komitəsi beş Zərərçəkənlərə yardım komitəsi təyin edib. Onlar yardım göstərərkən COVID-19 ilə bağlı təhlükəsizlik qaydalarına əməl edirlər. Yerli bacı-qardaşlar özləri də bir-birinə kömək edir, xüsusilə də qida sarıdan. Ağsaqqallar və səyyar nəzarətçilər isə təbliğçilərin ruhani ehtiyaclarının qeydinə qalırlar.

Zərərçəkənlərə yardım komitələrindən birinə kömək edən Almond Vinklar qardaş belə deyir: «Çox çətin bir dönəmdən keçirik. Yehovaya minnətdaram ki, dar gündə dərhal xidmətçilərinin köməyinə çatır».

«La Loma Arena» yığıncağından 18 təbliğçi və onların ailələri qida ilə təmin olundu. Yığıncaqdakı bir öncül cütlük belə deyir: «Zərərçəkənlərə yardım komitəsindən ehtiyacımız olan yardımı alanda çox sevindik. Bunu dualarımıza cavab olaraq qəbul etdik. Bizi ehtiyacımız olan şeylərlə təmin edən dindaşlarımıza və bu çətinliyə tab gətirməyimiz üçün güc verən Yehovaya çox minnətdarıq».

Zərərçəkənlərə yardım komitəsinin alış-veriş etdiyi əksər supermarketlərin işçiləri dindaşlarımızın gördüyü işləri heyranlıqla dilə gətiriblər. Onlardan biri belə deyir: «Yehovanın Şahidlərinin evlərimizə Allahın Kəlamındakı müjdəni çatdırmaq üçün gəldiyini bilirdim, amma ehtiyacı olanlara göstərdiyiniz bu gözəl yardım işi məni xüsusilə heyran qoydu».

Dindaşlarımız üzləşdikləri çətinliklərə baxmayaraq, Yehovaya ibadətdən qalmırlar. Əminik ki, Yehova bundan sonra da bu dünyadan ayrı durmağa çalışan bacı-qardaşlarımıza həm fiziki, həm də ruhani cəhətdən dayaq olacaq (Yəhya 17:16).