”Terusje . . . tulus saling ngampunin yapin ade alasan merase tersinggung.”​—KOLOSE 3:13.

Iraga ajak mekejang taén pelih. Mungkin iraga bise ngaé anak lén tersinggung, atau iraga pedidi ané merase tersinggung. Apeje masalahné, iraga perlu saling ngampunin. Yén iraga sube ngampunin, ento artiné iraga tusing enu nyimpen rase gedeg. Ede ”males ané jaat nganggo kejahatan,” lan tusing terus ngingetang kesalahané. (Roma 12:17) Kéwale kéngkén yén sakit gati atiné lan sing ngidaang ngengsapang unduké ento? Yén kéto unduké, omongang langsung perasaané tekén anaké ento. Tujuan iraga apang damai tusing saling pelihang.​—Roma 12:18.

”Rendah hatije anggep anak lén lebih penting tekén iraga.”​—PILIPI 2:3.

Yén iraga rendah hati lan seken-seken hormat ajak anak lén, anaké demen metimpal ajak iraga. Anaké lakar nawang yén iraga baik hati, peduli, lan tusing nyelapang nyakitin perasaané. Kéwale yén iraga merase déwék lebih penting tekén anak lénan atau nganggoang keneh iraga pedidi, ento bise  ngeranaang iraga megerengan. Anaké lakar ngejohin iraga, dadiné iraga bedik ngelah timpal.

”Tuhan tusing pilih kasih, anaké uli bangsa apeje ané takut tekén Tuhan lan nyak nyalanang ané beneh keterima olih Ida.”​—PAMARGIN PARAUTUSAN 10:34, 35.

Sang Pencipta tusing milih anaké ulian bangsané, bahasané, latar belakangné, atau warna kulitné. ”Uli anaké abesik Ida nyiptaang manusané mekejang.” (Pamargin Parautusan 17:26) Ento artiné, manusané mekejang sebenehné menyame. Yén iraga jemet tekén anaké mekejang, ento ngeranaang anaké seneng, iraga pedidi lebih bagia, lan iraga bise nyenengang Sang Pencipta.

’Tunjukang kelembutan’.​—KOLOSE 3:12.

Yén iraga lembut, ento bise ngeranaang anak lén merase nyaman. Anaké bise bébas ngomong tekén iraga termasuk nyak ngemaang nasehat krane nawang iraga tusing énggal tersinggung. Yén ade anak ané gedeg tekén iraga, jawaban iraga ané lembut bise nenangang anaké ento. Pitutur 15:1 ngorahang, ”Jawaban ané lembut bise nguangin rasa gedeg, kéwale omongan ané kasar ngeranaang basang gedeg.”

”Lebih bagia mekidihang ketimbang ngidih.”​—PAMARGIN PARAUTUSAN 20:35.

Jani liu anaké ané lobe lan mentingang déwékné pedidi. Kéwale rase bagia ané sejati rasaange tekén anaké ané barés. (Lukas 6:38) Anaké ané barés merase bagia krane ia lebih sayang tekéning manuse ketimbang tekén barang. Sipat buke kéto ngeranaang anak lén terus bersyukur lan nunjukang penghargaan. (Kolose 3:15) Cobak kenehang, ’Tiang demen metimpal ajak anak ané kéngkén? Ané demit lan kéweh berterima kasih atau ané barés lan bersyukur?’ Kesimpulané, yén iraga dot apang anak lén jemet tekén iraga, iraga malunan ané harus jemet tekén ia.​—Matius 7:12.