Bôt ba nla todol bôt ba loñ ipe, ba kôgôô ipe, ba litén lipe, ba dilémb dipe ndi ba nla ki todol bôt ba bibase bipe, bôda tole bôlôm, mingwañ ni diyeyeba. Bape ba bak le, ndik kii ba ntehe we ngélé bisu, ba mpôôs we mahoñol mabe, ba nkéés we ibale u gwé ngim nwii, ibale binéñél gwoñ bi ta bé kii gwap, ibale u yé bôk. Ndi to hala, ba nhoñol le ba ntodol bé bôt.

Baa yak we, u nla nkon i kon u? Hala a ntomb i kal mut numpe le a gwé lem i todol bôt. Ndi hala a nlet i tehe le bésbomede di gwé i lem i. Maliga ma yé le too di nyi hala, too di nyi bé, bésbobasôna di ntodol bôt bape. Malét so- ciologie le David Williams a nkal le, i ngéda mut a ntodol ngim litén, ndi a boma mut a nlôl mu litén li, “a nyoñ bé i mut nu kii a nyoñ bana bôt bape ndi i pot maliga nyemede a nyi bé le hala nyen a yé boñ.”

I nwelmbok i Érôpa, i pes likôl, i het Jovica a niñ, ngim litén i yé nyoo, i bôt ba ba ta bé ngandak. A nkal le: “Me bé hoñol bé le loñge mut i nla pémél mu litén li, ndi me bé yi bé le me bé todol bôt. Inyule me bé hoñol le me nyi maliga inyu yap.”

Ngandak biloñ i ma pémés mambén inyu boñ le bôt ba boñ ha bañ mbagla. Ndi to hala, bôt ba nke ni bisu i todol bape. Inyuki? Inyule mambén ma, ma mbéñge ndigi maboñok. Ndi, ma nla bé kéñ bôt i bana nya mahoñol i, i miñem nwap. Maliga ma yé le, lem i todol bôt i mbôdôl ikété miñem ni i mahoñol. Baa di nla yémbél i sañ i, hala wee, baa di nla waa todol bôt? Baa matibla ma yé inyu lem i?