Nge mɛ biin marubu bu koo kpĩ bu n sãa nuku doo bakabu, mɛya bu koo maa kpĩ bu n sãa wururabu durɔ ka kurɔn baa sɔɔ. Nge mɔwɔ kpaobu, ya koo bɛɛ biti ko ma i bɛɛn saa ka bɛɛn dam bakam dendimɔ i ka bɛɛn bii wɛ̃ɛru nɔɔri. Saa ye sɔɔ, i ko i kpĩ i dom bia kpa bɛɛn bwisikunu nu n burisinɛ. Yeni ya koo kpĩ yu bɛɛn kĩi te i mɔɔsinɛ laakari mɛɛribu doke. Yen sɔ̃, bɛɛ yiru kpuro n weenɛ i bɛɛn kookoosu kɔsi kpa i ka bɛɛn bii wɛ̃ɛru nɔɔri kpa i maa ka kĩru sɔ̃ɔsina. Amɔsunwa Bibelin bwisi kɛ̃nu nu koo kpĩ nu bɛɛ somi i n ka wãa kpaa te dimɔ ka nuku dobu?

YE BIBELI YA GERUMƆ: “Kĩru ta ra suuru suewa, kĩru ta ra sibu somi wa.” Ya maa nɛɛ: “wi u tɔnu kĩ . . . u ku ra win tii tɔnan arufaani kasu, u ku ra mɔru ko fuuku.” (1 Korinti 13:4, 5 VB) Wee tɛ̃ a sãa bii mɛro kpao, deedeera wunɛn laakari ya n wãa wunεn bii sɔɔ. Saa ye sɔɔ, wunɛn durɔ koo kpĩ u bwisiku ma a wi deri. Yen sɔ̃, a ku duari ma win tii u wunɛn kĩrun bukata mɔ. À n ka wi suuru ka tɔn geeru sãa, kaa kpĩ a nùn somi u ka tubu ma a win bukata mɔ i ka bɛɛn bii nɛnɛ.

“Bɛɛ durɔbu maa, i de i n bɛɛn kurɔbun daakari mɔ i n ka wãasinɛ.” (1 Piɛɛ 3:7 VB) Durɔ, a n wunɛn kurɔn laakari mɔ. A de yu nun yeeri ma wunɛn kurɔ u koo win dam bakam loo ko bɛɛn bii sɔɔ. Sɔm kpaara ta wi sosie mi, ya koo ka wi gasɔ laakari mɛɛribu ǹ kun mɛ wasiraru naawa, n koo mam ko u mwia kpana. Saa gãanu sɔɔ win bwisikunu nu koo burisina kpa u ka nun mɔru bara, adama, a kookari koowo kpa a n tɛmanɛ, domi “wi u kpĩa u win mɔru kamia u sãawa tabu durɔ ka gem.” (Mɔnnu 16:32) A sɔ̃ɔsio ma a sãa laakarigii a ka wi somi tèn bukata u mɔ kɛ̃.—Mɔnnu 14:29.

YE KAA KPĨ A KO:

• Tundo: a wunɛn kurɔ somio u ka bii nɔɔri, baa n wɔ̃kuru sɔɔ n na. A wunɛn saa ye a ra loo ko swɛɛ gɛɛ sɔɔ kawo kpa saa ye a loo mɔ̀ wunɛn kurɔ ka bii sɔɔ ya n ka kpã

• Mɛro: wunɛn durɔ ù n kĩ u nun somi a ka bii nɔɔri, a somi te wuro. Ù n kun sɔmbu te kue dee dee nge mɛ n weenɛ, a ku wi wĩi, adama, ka kĩru a wi sɔ̃ɔsio mɛ ba ra ko

YE BIBELI YA GERUMƆ: “Be yiru kpuro bu ko wasi tee.” (Torubu 2:24) Baa ì n bii mɔ, a ku duari ma wunɛ ka wi a sue sanna i tie i sãa “wasi tee.” I hania koowo bɛɛn gbinnabu bu n ka tie bu n dam mɔ.

Kurɔbu, i bɛɛn durɔbu siaro somi te ba bɛɛ kɛ̃mɔ ka ye ba mɔ̀ kpuro yɛnun wãaru tu ka wuswaa dan sɔ̃. Mɛ i ka siara bi sɔ̃ɔsimɔ ya koo kpĩ ya n da tɔnu bɛkie. (Mɔnnu 12:18) Durɔbu, i bɛɛn kurɔbu sɔ̃ɔwo ma i be kĩ too, ma i be girima doke. I be tɔmɔ mɛ ba ka yɛnu nɔɔrimɔn sɔ̃.—Mɔnnu 31:10, 28.

“N ǹ weenɛ goo u n win tiin arufaani kasu, ma n kun mɔ win winsimgia.” (1 Korinti 10:24) A n baadomma wunɛn kĩnasi kuammɛ ye ya buram bo. Bɛɛ yiru kpuro i saa yio i ka gari ko sannu, i ka siarana, baawure u ka maa win winsim swaa daki. Bɛɛn baawure u ku win tiin arufaani kasu sanam mɛ i ko i kɔ̃ɔ mɛnna. A wunɛn kĩnasin bukata wɛ̃ɛrio. Bibeli ya nɛɛ n ǹ weenɛ bɛɛn baawure u win winsim bira ye n weenɛ u wi wɛ̃, ma n kun mɔ i nɔɔsina ye sɔɔ baasi. (1 Korinti 7:3-5) Yen sɔ̃ baawure u win winsim sɔ̃ɔwo ye u bwisika ka gem kɔ̃ɔ mɛnnabun swaa sɔɔ. Bɛɛn tɛmanabu ka bɛɛn nɔɔsina yira yi koo bɛɛn gbinnabu dam sosi.

YE KAA KPĨ A KO:

• I ku duari ma n weenɛ i saa yi bɛɛ yiru dege degen sɔ̃

• A wi a sue gãa piiminu kuo ni nu koo sɔ̃ɔsi ma a wi kĩ ; ya koo kpĩ ya n sãa tire piibuwa a yorua te sɔɔ a wi sɔ̃ɔmɔ ma a wi kĩ, ǹ kun mɛ kɛ̃ɛ piibuwa a wi kua

YE BIBELI YA GERUMƆ: “Saa wunɛn birun diya a Gusunɔn gari yɛ̃ yi yi koo kpĩ yi nun bwisi kɛ̃ a ka Yesu Kirisi naanɛ doke kpa a faaba wa.” (2 Timɔte 3:15) I kpunaa yio ye i ko i ko i ka bɛɛn bii keu sɔ̃ɔsi sɔɔ. U koo kpĩ u gia tamma, baa mam saa win mɛron nukurun di. Saa nukuru sɔɔn di, wunɛn bii koo kpĩ u wunɛn nɔɔn gari tubu kpa u ye n nun sãa wunɛn bwɛ̃ra sɔɔ nɔ. A n da wi gãanu garie saa win birun di. Baa mɛ ye a wi gariammɛ ya ǹ kpɛ̃ yu wi yeeri mii mii, ya koo raa wi somi u ka garibu dɔɔnɛ ko u n kpɛ̃a.

A ku nɛɛ wunɛn bii kun gina kpã u ka Gusunɔn Gari nɔ. A de u n nɔɔmɔ sanam mɛ a Yehofa kanamɔ. (Sɔ̃ɔsiru 11:19) Baa sanam mɛ i dweemɔ sannu, a wi sɔ̃ɔwo gãa ni Gusunɔ u taka kua. (Womu 78: 3, 4) Mɛ wunɛn bii ka kpɛ̃amɔ, mɛya u koo n ka tubumɔ mɛ a ka Yehofa kĩ, win tii u koo mɛɛri u maa ka Wi kĩa.

YE I KO I KPĨ I KO:

• I kanaru koowo i ka bwisi wa i ka bɛɛn bii wɛ̃ɛru seeya

• Ì n bɛɛn bii wɛ̃ɛru sɔ̃ɔmɔ ye i kĩ u n yɛ̃ ma i ye wuremɔ ya koo wi somi u ka tamma giabu tore