“Tikki remaja au, lomo do rohakku tu bawa. On ma tantangan na umborat di au. Didok rohakku, holan di tikki i do songon i perasaanku. Pasti dang selamana songon i. Alai, tong dope songon i perasaanku sahat tu saonari.”​—Si David, 23 taon.

 Sasittongna, lomo do roha ni si David mambahen las roha ni Debata. Alai, boi do dibahen ibana las roha ni Debata molo lomo dope rohana tu sesama jenis? Boha do perasaan ni Debata tu halak na mangulahon homoseksual?

•  Aha do na didok Bibel?

•  Jadi maksudna . . . ?

•  Alai boha do molo . . . ?

 Dang sai sarupa sude pandangan ni halak taringot homoseksual, tergantung tu kebudayaan manang jaman do. Alai molo halak Kristen, dang terpengaruh tu pandangan ni godang halak manang “gabe songon . . . na diboan galumbang jala na niullus ni alogo”. (Epesus 4:14) Alai sesuai tu na didok di Bibel do pandapot ni nasida taringot homoseksual (taringot tu sude akka na asing).

 Takkas do dipaboa aha na didok Bibel taringot homoseksual. Didok di Bibel:

•  “Unang hamu mangulahon seks dohot bawa songon tu borua.”​—3 Musa 18:22.

•  “Dipasombu Debata ma nasida . . . mangihutton lomo ni roha ni nasida sandiri. . . . Dipasombu Debata nasida dirajai hisap-hisap ni daging na ramun lao mangulahon seks. Dipakke akka borua do daging ni nasida asing sian naung ditottuhon Debata tikki ditoppa nasida.”​—Rom 1:24, 26.

•  “Unang hamu lilu. Halak na mangulahon seks na so patut, na manomba patung, na mangalakkup, bawa na olo ditogihon mangulahon seks dohot bawa, bawa na mangulahon seks dohot bawa, panakko, halak na hisap, parmabuk, pangaleai, dohot pangarampok, dang adong parbagiananna di Harajaon ni Debata.”​—1 Korint 6:9, 10.

 Sasittongna, ikkon sude halak do mangihutton aturan na dibahen Debata, termasuk ma i akka halak na mangulahon homoseksual manang na dang. Alai na pasti, ikkon sude do halak berupaya mengendalihon dirina asa unang mangulahon na so dihalomohon roha ni Debata.​—Kolosse 3:5.

 Jadi maksudna na didok do di Bibel ikkon sogo rohatta tu halak na mangulahon homoseksual?

 Daong. Dang adong didok di Bibel asa sogo rohatta tu manang ise pe, termasuk ma i tu halak na homoseksual manang heteroseksual. Gariada didok do di Bibel asa “mardame tu sude halak”. (Heber 12:14) Alani i, unang ma sogo rohatta manang tabahen na jahat tu halak na mangulahon homoseksual.

 Jadi maksudna na ikkon dialo halak Kristen do hukum na dibahen taringot perkawinan sesama jenis?

 Didok di Bibel, sahalak bawa ikkon menikah tu sahalak borua. (Mateus 19:4-6) Jadi, hukum na dibahen pamaretta taringot perkawinan sesama jenis dang sesuai tu na didok Bibel, alai masalah politik do i. Didok di Bibel, halak Kristen ikkon netral do secara politik. (Johannes 18:36) Jadi, halak Kristen dang mendukung manang mangalo hukum na dibahen pamaretta taringot perkawinan sesama jenis manang taringot homoseksual.

 Alai boha do molo adong sasahalak na mangulahon homoseksual? Boi dope ibana muba?

 Boi. Di abad na parjolo, adong do piga-piga halak Kristen na lomo rohana tu sesama jenis. Alai dung didok molo akka halak sisongon i dang boi masuk tu Harajaon ni Debata, didok Bibel ma, “Adong do deba sian hamu na songon i pangalahona najolo.”​—1 Korint 6:11.

 Nang pe naung muba sasahalak, alai olo dope gabe mulak muse ibana mangulahon homoseksual. I do alana didok di Bibel, “Pakke hamu ma pangalaho na imbaru na nilehon ni Debata dung ditanda hamu Ibana. Dung i, dipaimbaru ma pangalahomuna.” (Kolosse 3:10) Jadi, ikkon torus do berupaya sasahalak asa unang mulak muse mangulahon homoseksual.

 Alai boha do molo nungnga berupaya sasahalak i asa boi muba, hape tetap dope lomo rohana tu sesama jenis?

 Hita sandiri do na manottuhon, taihutton do keinginanta i manang na dang. Jadi molo adong sasahalak na lomo rohana tu sesama jenis, boi do dipillit ibana asa unang mangihutton keinginan i. Songon dia carana? Didok di Bibel, “Toktong ma ihutton hamu tondi parbadia asa unang diulahon hamu hisap-hisap ni daging i.”​—Galatia 5:16.

 Dang adong didok di ayat i na so adong hisap-hisap ni daging ni sasahalak. Alai molo toktong sasahalak marsiajar Bibel jala martangiang, boi do dialo ibana hisap-hisap ni dagingna i.

 Si David na dipaboa nakking, dihilala ibana do na tutu na didok di ayat i, tarlumobi dung dipaboa ibana masalahna i tu natua-tuana. Didok ibana, “Gabe lubbang do huhilala. Autsugari pittor hupaboa hian i sian najolo, pasti bahagia do ngolukku tikki remaja.”

 Jadi molo taihutton aturan na dibahen Jahowa, pasti bahagia do ngolutta. Pos do rohatta, “sittong do aturan na sian Jahowa, boi mambahen las roha”, jala ‘dapotta ma upa na balga’ molo taulahon i.​—Psalmen 19:8, 11.