Surat na Parjolo tu Huria na di Tessalonik 2:1-20
2 Hamu ale akka dongan, takkas do diboto hamu na so marisuang haroronami mandapotton hamu.+
2 Diboto hamu do, nungnga marsitaonon hami jala nungnga dileai di Pilippi.+ Alai dilehon Debata do tu hami habaranion, asa boi hubaritahon hami tu hamu barita na uli taringot tu Debata+ nang pe godang hasusaan.
3 Ai dang ro sian na so sittong poda na hulehon hami on, jala dang naeng mangulahon na jahat manang lao mangoto-otoi umbahen na hupasahat hami sipaingot on tu hamu.
4 Alai ala na pos do roha ni Debata tu hami, disuru ma hami pasahatton barita na uli i. Alani i, sude na huhatahon hami dang lao palasson roha ni jolma, alai lao palasson roha ni Debata na mamareso rohatta i do.+
5 Ai diboto hamu do, dang hea hami mamuji-muji hamu manang mangulahon na denggan tu hamu holan naeng mandapot uttung tu dirinami.+ Ai diboto Debata do i sude!
6 Jala dang hulului hami hasangapon sian jolma, manang sian hamu, manang sian na asing, nang pe sasittongna boi do hubahen hami songon i, ala apostel ni Kristus do hami.+
7 Alai lambok do hami tu hamu sude, songon sahalak ina na manusui poso-posona jala na burju mangurus gellengna.
8 Alani holong ni rohanami tu hamu, dang holan barita na uli na sian Debata na hulehon hami tu hamu, alai dohot do ngolunami sandiri.+ Ai massai holong do rohanami tu hamu.+
9 Hamu ale akka dongan, tottu diingot hamu dope akka na dibahen hami jala songon dia lojanami mangulahon ulaon i. Karejo do hami arian nang borngin, asa unang susa hamu manarihon hami+ tikki hubaritahon hami barita na uli na sian Debata tu hamu.
10 Setia do hami tu hamu, huulahon hami do na sittong, jala dang hubahen hami na sala tu hamu akka na porsea i. Hamu sandiri ma na gabe saksi di hami, songon i nang Debata.
11 Takkas do diboto hamu, hupodai hami do hamu dos songon cara ni sahalak ama+ mamodai anakkonna. Dijujui hami do hamu, jala dipatogu hami do rohamuna,+
12 asa sesuai pangalahomuna tu lomo ni roha ni Debata,+ na manjou hamu masuk tu Harajaonna+ dohot tu hasangaponna i.+
13 Alani i do umbahen na toktong hami mandok mauliate tu Debata.+ Ai tikki dibege hamu hata ni Debata na hupasahat hami, dijalo hamu do i songon na manjalo hata ni Debata, dang songon hata ni jolma. Jala sittong do i, ai i do na mangurupi hamu gabe halak na porsea.
14 Hamu akka dongan, diihutton hamu do sitiruon sian akka huria ni Debata na di Judea na marsada dohot Kristus Jesus. Ai susa do nasida dibahen halak Jahudi. Jala hamu pe susa do alani dongan sabangsomuna.+
15 Ai dibunu halak Jahudi do Tuan Jesus+ dohot akka panurirang,* jala hami pe disiksa nasida do.+ Alai dang gabe las roha ni Debata mangida nasida. Dang adong guna ni ulaon ni nasida i tu sude jolma.
16 Tikki marbarita hami tu bangso na asing, dibahen nasida do cara lao mangabbati hami. Hape parohon haluaon do barita na uli i tu akka bangso i.+ Songon i ma nasida sai manambai dosa ni nasida. Alai ujungna, ro nama ari rimas ni Debata tu nasida.+
17 Hamu akka dongan, nang pe dao hami sian hamu satokkin on, alai holan di pardagingon do i, dang dohot di roha. Alani i, dibahen hami do sude cara lao pajuppang dohot hamu, ai masihol do rohanami tu hamu.
18 Naeng ro do hami mandapotton hamu. Jala au sandiri, si Paulus, nungnga dua hali naeng ro, alai diabbati Sibolis* do pardalanannami.
19 Ai molo dang hamu, ise be huroa na mangurupi hami marpos ni roha jala marlas ni roha? Jala molo dang hamu, ise ma na gabe mahkota hasangaponnami* di jolo ni Tuan Jesus di harorona i?+
20 Tutu, hamu do hasangaponnami dohot las ni rohanami.
