PARSIAJARAN 7
Aha do Harajaon ni Debata i?
1. Aha do Harajaon ni Debata i?
Boasa ma Jesus Raja na dumenggan?—MARKUS 1:40-42.
Harajaon ni Debata i ma sada pamarentaon di surgo. Laho gantihonon ni Harajaon on do sude pamarentaon na asing jala jadihononNa lomo ni roha ni Debata di surgo nang di tano on. Sada barita na uli do on di hita. Dihaporluhon manisia do sada pamarentaon na denggan, jala ndang sadia leleng nai, jadihonon ni Harajaon ni Debata ma i. Harajaon i naeng pasadahon sude halak na mangolu di tano on.—Jaha Daniel 2:44; Mateus 6:9, 10; 24:14.
Harajaon diparenta sada raja. Nunga dipajonjong Jahowa Jesus Kristus laho gabe Raja ni HarajaonNa.—Jaha Pangungkapon 11:15.
Tonton ma video Aha do Harajaon ni Debata I?
2. Boasa ma Jesus Raja na dumenggan?
Jesus ma Raja na dumenggan ala na burju do ibana, jala togu mameop hasintongan. (Johannes 1:14) Asing ni i, marhuaso do ibana laho mangurupi angka halak alana sian surgo do ibana mamarenta tu tano on. Dung dipahehe, manaek ma ibana tu surgo jala hundul paimahon di siamun ni Debata Jahowa. (Heber 10:12, 13) Ujungna, lehonon ni Debata ma huaso tu ibana laho mamarenta.—Jaha Daniel 7:13, 14.
3. Ise na laho mamarenta raphon Jesus?
Punguan halak na didok ”angka na badia” laho mamarenta rap dohot Jesus di surgo. (Daniel 7:27) Angka na badia i, na parjolo dipillit i ma angka apostel ni Jesus na daulat marroha. Saonari, dipillit Jahowa dope angka baoa dohot borua na marhaporseaon na laho gabe angka na badia. Songon Jesus, nasida dipahehe mardaginghon tondi.—Jaha Johannes 14:1-3; 1 Korint 15:42-44.
Sadia godang do halak na laho manaek tu surgo? Didok Jesus nasida sada ”punguan na metmet”. (Lukas 12:32) Bilanganna 144.000 halak. Laho mamarenta tano on nasida raphon Jesus.—Jaha Pangungkapon 14:1.
4. Aha do na masa dung mulai mamarenta Jesus?
Harajaon ni Debata mulai mamarenta di taon 1914. * Dung Raja Jesus, na parjolo sahali diula ibana i ma mandabuhon Sibolis dohot angka beguna tu tano on. Marrimas situtu ma Sibolis jala mambahen hasusaan di liat portibi on. (Pangungkapon 12:7-10, 12) Mulai sian i, lam godang ma parungkilon na dihilala sude manisia. Porang, haleon, sahit, dohot lalo i ma ”tanda” ni Harajaon i laho maniop tampuk ni huaso di saluhut tano on.—Jaha Lukas 21:7, 10, 11, 31.
5. Aha ma na laho sibahenon ni Harajaon ni Debata?
Marhite barita na uli na dipasahat di liat portibi on, dipapungu Harajaon ni Debata ma torop halak sian nasa bangso. Marjuta halak na lambok roha on laho gabe rayat ni Jesus. Diramoti do nasida tingki Harajaon ni Debata mangaropukhon ruhut pamarentaon na adong di tano on. Alani i, sude halak na laho taruli sian Harajaon ni Debata ingkon marsiajar marpangoloi tu Jesus.—Jaha Pangungkapon 7:9, 14, 16, 17.
Saleleng 1.000 taon, jadihonon ni harajaon i ma sangkap ni Debata na mulamula i tu jolma manisia. Ujungna, lehonon ni Jesus ma muse harajaon i tu Amana. (1 Korint 15:24-26) Tu ise ma laho paboahononmu taringot Harajaon ni Debata?—Jaha Psalmen 37:10, 11, 29.
^ par. 6 Hatorangan taringot surirang ni Bibel na patuduhon tu taon 1914, ida alaman 217-220 buku Aha do na Diajarhon Bibel tu Hita?
