Dung sian Perea, sahat ma Jesus tu jonok ni Betania, hira-hira 3 km sian Jerusalem. Mansai lungun do roha ni si Maria dohot si Marta ala nunga mate si Lasarus ito ni nasida. Jala godang do na ro mangapuli.

Adong ma na paboahon tu si Marta naung ro Jesus. Pintor didapothon ibana ma Jesus. Didok ma tu Jesus, “Molo dison hian ho Tuan, ndang mate ibotongki.” Ra, i do na sai dipingkiri ibana dohot si Maria. Nang pe songon i, ndang sai lungun rohana. Didok ma tu Jesus, “Tongtong do ahu porsea manang aha dipangido ho tu Debata, lehononna do i tu ho.” (Johannes 11:21, 22) Pos do rohana na boi Jesus pahehehon si Lasarus.

Didok Jesus ma tu si Marta, “Na laho hehe do ibotomi.” Dirimpu si Marta, haheheon di tingki na laho ro do na didok Jesus. Jala i do pangkirimon ni si Abraham dohot angka na asing. Gabe didok si Marta ma, “Huboto do na laho hehe ibana di haheheon di ari parpudi.”​—Johannes 11:23, 24.

Alai boi do Jesus pahehehon si Lasarus? Didok Jesus ma tu si Marta, naung dilehon Debata do tu ibana huaso manaluhon hamatean. Didok ibana ma, “Manang ise na porsea tu ahu, mangolu do ibana muse nang pe naung mate. Manang ise na mangolu jala na porsea tu ahu, ndang na laho mate be ibana saleleng ni lelengna.”​—Johannes 11:25, 26.

Maksud ni Jesus, ndang na gabe tongtong mangolu angka siseanna na mangolu di tingki i. Ai ibana pe mate do, songon na nidokna tu angka apostel. (Mateus 16:21; 17:22, 23) Alai molo porsea hita tu Jesus, boi ma tadapot hangoluan na saleleng ni lelengna. Asa boi mandapot hangoluan on, godangan halak ingkon jolo dipahehe. Alai angka halak na tongtong mangolu sahat tu na marujung portibi on, ndang na laho mate nasida. On patuduhon, ndang na laho mate saleleng ni lelengna angka na porsea tu Jesus.

Jesus mandok, ibana do “haheheon dohot hangoluan”. Alai boi do paheheonna si Lasarus? Disungkun Jesus ma si Marta, “Porsea do ho disi?” Dialusi si Marta ma, “Olo Tuan, porsea do ahu, ho do Kristus i, Anak ni Debata na ro tu portibi on.” Alani pos ni rohana, pintor dijou ibana ma si Maria. Dihusiphon ma, “Nunga ro Guru, dilului do ho.” (Johannes 11:25-28) Pintor laho ma si Maria. Diihuthon angka halak na mangapuli ma si Maria, ai dirimpu nasida naeng tu kuburan ibana.

Alai Jesus do na didapothon si Maria. Dung i, marsinggang ma ibana tu pat ni Jesus jala didok ma, “Molo dison hian ho Tuan, ndang mate ibotongki.” Tingki diida Jesus tangis si Maria dohot na asing, mansai lungun ma rohana jala manetek ma iluna. Diboto na mangida i ma  na holong rohana tu si Lasarus. Adong ma na mandok, ‘Dipamalum ibana do na mapitung, ndang boi bahenonna asa unang mate si Lasarus?’​—Johannes 11:32, 37.