Antar leleng do Jesus di Perea, di “bariba ni Sunge Jordan”. (Johannes 10:40) Dung i laho ma ibana tu selatan ni Jerusalem.

Rap do Jesus dohot angka siseanna tusi. Torop do muse halak na dohot, songon angka sijalo pajak dohot angka pardosa. (Lukas 14:25; 15:1) Dohot do nang siboto surat dohot halak Parise. Sogo do roha ni nasida tu na nidok ni Jesus dohot na niulahonna. Alai porlu do pingkirhonon ni nasida tudosan ni Jesus taringot tu biru-biru na mago, anak na mago, jala taringot tu baoa na mora dohot si Lasarus.​—Lukas 15:2; 16:14.

Sogo do roha ni musu ni Jesus jala sai direhei nasida do na niajarhonna. Alani i, dipaboa Jesus ma muse naung hea dipaboa ibana di Galilea.

Didok ma, “Sai adong do na mambahen halak tartuktuk. Alai marjea ma manang ise na mambahen i! . . . Manat ma hamu. Molo mardosa donganmu, pinsang ma ibana. Molo marhamubaon ibana, sesa ma dosana. Nang pe pitu hali ibana mardosa tu ho di bagasan sadari jala ro ibana pitu hali mandok tu ho, ‘Sala ma ahu,’ ingkon sesaonmu do dosana.” (Lukas 17:1-4) Olo do ra gabe diingot si Petrus sungkun-sungkunna taringot tu manalpuhon hasalaan sahat tu pitu hali.​—Mateus 18:21.

Tolap do angka sisean i mangulahon na nidok ni Jesus? Didok nasida ma tu Jesus, “Tambai ma haporseaonnami.” Dung i didok Jesus ma, “Molo adong do haporseaonmu nasa batu ni siarum, boi do dohononmu tu hau on, ‘Pinda ma ho jala tubu ma ho di laut!’ Oloan ni hau i do hamu.” (Lukas 17:5, 6) Haru otik pe haporseaonta, boi do taulahon ulaon na balga.

Diajarhon Jesus ma muse taringot tu toruk ni roha jala asa unang holan na dirinta na tapingkirhon. Didok ibana ma, “Ise sian hamu nampuna hatoban na mambajak manang marmahan, mandok tu hatobanna i tingki mulak sian ladang, ‘Tuson ma ho asa mangan’? Gariada dohononna do, “Ganti ma abitmi, parade ma sipanganonku borngin on, hobasi ma ahu sahat tu na sae mangan dohot minum. Dungkon i pe asa mangan jala minum ho.” Nang pe naung diulahon parentana i, ndang dohononna mauliate tu hatoban i. Alani i, molo nunga diulahon hamu sude na diparentahon tu hamu, dok ma, ‘Angka hatoban na so marguna do hami. Aha pe na diula hami, na patut do i ulahononnami.’”​—Lukas 17:7-10.

Parale-aleon tu Debata do na rumingkot di ngolunta. Ingkon sai taargai do hasangapon na tadapot ala boi gabe sisomba Debata.

Ndang leleng dungkon i, disuru si Maria dohot si Marta ma halak mandapothon Jesus. Iboto ni si Lasarus do nasida na dua. Di Betania na di Judea do nasida tading. Didok ma tu Jesus, “Tuan, marsahit do na hinaholongan ni roham.”​—Johannes 11:1-3.

Nang pe nunga posi sahit ni si Lasarus ale-alena i, alai ndang gabe lungun roha ni Jesus. Gariada didok ibana do, “Ndang hamatean ujung ni sahit i. Alai parohon hasangapon do i tu Debata, asa marsangap Anak ni Debata marhite i.” Disi dope ibana saleleng dua ari. Dung i didok ma tu angka siseanna, “Beta ma hita laho muse tu Judea.” Alai didok nasida ma, “Guru, baru dope naeng didangguri halak Judea ho, hape naeng laho hita muse tusi?”​—Johannes 11:4, 7, 8.

Didok Jesus ma, “Nda 12 jom do torang ari? Manang ise na mardalan tingki torang ari, ndang tartuktuk i, ala tiur dope portibi on. Alai manang ise na mardalan tingki borngin,  tartuktuk do i ala ndang adong panondang di ibana.” (Johannes 11:9, 10) Na nidok ni Jesus, ndang sae dope diulahon ibana tanggung jawab na nilehon ni Debata. Alani i, ingkon pangkeon ni Jesus do tingki na saotik i.

Didok Jesus ma muse, “Ia donganta si Lasarus i nunga modom. Alai na naeng laho ma ahu tusi mandungoi ibana.” Dirimpu nasida do na modom si Lasarus jala na laho malum nama ibana, gabe didok nasida ma, “Tuan, molo na modom do ibana, na laho malum nama i.” Alai didok Jesus ma, “Nunga mate si Lasarus. . . . Beta ma taida ibana.”​—Johannes 11:11-15.

Diboto si Tomas do na boi pamateon ni musuna Jesus di Judea, alai dipatudu ibana do na olo ibana mangurupi Jesus. Alani i, didok ma tu angka sisean na asing, “Beta ma hita laho, asa rap mate hita dohot ibana.”​—Johannes 11:16.