Dung sahat angka sisean i tu bariba ni laut, tarsonggot ma nasida mangida dua halak baoa na sinonggopan ni suru-suruan na jahat. Dua baoa i ro sian kuburan na jonok disi jala marlojong mandapothon Jesus! Sada sian baoa i do na gumodang dipaboa di Bibel, ala ibana do na umjahat jala na umleleng disonggopi suru-suruan na jahat.

Nunga leleng baoa i salang-salang mardalani di luat i. “Sai marsuraki do ibana arian nang borngin di angka kuburan dohot di angka dolok jala sai diantuki do dagingna dohot batu.” (Markus 5:5) Alani jahatna, gabe ndang adong halak na barani mamolus sian dalan i. Hea do dirante tanganna jala dipasung patna, alai diponggolhon ibana do i. Ndang adong halak na boi manangkup ibana.

Tingki marsinggang ibana tu pat ni Jesus, dibahen suru-suruan na jahat i ma baoa i marsurak. Ninna ma, “Ale Jesus Anak ni Debata Natumimbul i, marhua ho ro tuson? Marsumpa ma ho di bagasan goar ni Debata, na so uhumonmu ahu.” Alai dipatuduhon Jesus do na umgogo ibana sian angka suru-suruan na jahat i. Ninna ma, “Ale suru-suruan na jahat, kaluar ma ho sian ibana.”​—Markus 5:7, 8.

Sasintongna, godang do suru-suruan na jahat na songgop tu baoa i. Tingki disungkun Jesus, “Ise do goarmu?” Dialusi ibana ma, “Legion do goarhu, ai godang do hami.” (Markus 5:9) Di pasukan tentara Rom, legion i boi do marribu tentara. Alani i, taboto ma godang do suru-suruan na jahat na songgop tu baoa i jala na mambahen ibana marsitaonon. Sai dipangido angka suru-suruan na jahat i ma tu Jesus “asa unang disuru nasida laho tu lombang na mansai bagas”. Tarida ma sian on, diboto suru-suruan na jahat i do aha na laho masa tu nasida dohot tu Sibolis pamimpin ni nasida.​—Lukas 8:31.

Di tingki i, adong ma hira-hira 2.000 godang ni babi na mangan di luat i. Mangihuthon Patik, binatang na ramun do babi di halak Jahudi jala ndang boi nasida marmahan i. Didok angka suru-suruan na jahat i ma tu Jesus, “Suru ma hami laho tu angka babi na disan  asa masuk hami tusi.” (Markus 5:12) Disuru Jesus ma nasida kaluar jala masuk ma nasida tu angka babi i. Gabe manimbung ma angka babi i sian topi ni lombang tu laut jala maup ma sude.

Dung diida na marmahan babi i na masa i, marlojongi ma nasida tu kota jala dipaboa nasida ma na masa i tu angka jolma. Alani i, godang ma jolma marroan laho mangida na masa i. Dung sahat nasida, diida nasida ma, nunga denggan marpangkean baoa na sinonggopan ni suru-suruan na jahat i jala hundul di lambung ni pat ni Jesus.

Mabiar ma angka jolma i mangida na masa i. Ai ndang diboto nasida dope aha na laho masa bahenon ni Jesus di luat i. Ujungna, dipalao nasida ma Jesus sian i. Dung nangkok Jesus tu parau, dipangido baoa naung dipamalum i ma asa dohot ibana mangihuthon Jesus. Alai didok Jesus ma tu ibana, “Mulak ma ho tu keluargam. Paboa ma tu nasida sude na binahen ni Jahowa tu ho dohot asi ni roha na pinatuduna tu ho.”​—Markus 5:19.

Somalna, diorai Jesus do halak na pinamalumna paboa-boahon taringot tu ibana. Alai asa lam godang halak na mamboto taringot tu Jesus di inganan na so hea didalani ibana, disuru ma baoa i paboahon angka na masa i. Jala marhite i, gabe botoon ni angka halak na disi ma boasa mate angka babi i. Jala ndang salahonon ni nasida be Jesus. Dung i, laho ma baoa i paboahon na masa i tu sude penduduk ni Dekapolis.