Halak na boi mangarajai dirina

• dang mamaksa asa diihutton lomo ni rohana

• dang pahatophu mambahen keputusan

• olo pasaehon sada tugas, nang pe dang pola lomo rohana tu tugas i

• urrikkot do di ibana halak na asing martimbakkon dirina

Molo boi sahalak dakdanak mangarajai dirina, pasti boi ma ibana padaohon dirina sian godaan, nang pe hira na menarik godaan i. Alai molo dang boi dirajai dakdanak dirina, biasana

• mura-mura muruk

• mura-mura depresi

• gabe parisap, parmabuk, manang marnarkoba

• dang taratur mangan

Adong sada penelitian na dibahen Profesor Angela Duckworth sian University of Pennsylvania. Didok ibana, “Molo boi sasahalak mangarajai dirina mulai sian dakdanak, dung balga pasti gabe lebih sehat do ibana, boi denggan mangatur hepengna, jala boi ma ibana gabe halak na taat hukum.” Didok profesor i muse, “Sai marguna do molo boi hita mangarajai diritta.”

Barani menolak.

PRINSIP NI BIBEL: “Molo olo dok ma ‘Olo’, molo dang dok ma ‘Dang.’”​—Mateus 5:​37.

Biasana pittor dioloi natua-tua do pangidoan ni gellengna molo nungnga tangis, apalagi ma molo tangis gellengna i di jolo ni godang halak. Alai molo pittor dioloi natua-tua do pangidoan ni gellengna, gabe terbiasa ma gellengna i tangis asa dioloi pangidoanna.

Jadi molo barani natua-tua menolak pangidoan ni gellengna, adong ma na boi diparsiajari gelleng ni nasida. Gabe boi ma diboto gelleng ni nasida, dang sai boi dapotna lomo ni rohana. Didok Dr. David Walsh do, “Biasana lebih sering do marlas ni roha halak na boi mangarajai dirina.” Didok ibana muse, “Molo sai dioloi natua-tua pangidoan ni gellengna, dang boi gellengna gabe halak na dewasa.” *

Jadi molo sian saonari barani hamu menolak pangidoan ni gellengmuna, haduan pe gabe barani do gellengmuna menolak tikki diajak donganna marnarkoba, mangulahon seks na so patut, manang mangulahon hajahaton na asing.

Urupi ma gellengmuna mamboto aha akibat ni pangalaho ni nasida.

PRINSIP NI BIBEL: “Manang aha na disuan sasahalak, i do panenonna.”​—Galatia 6:7.

Porlu do botoon ni gellengmuna, pasti adong do akibatna molo dang boi nasida mangarajai dirina. Misalna, molo mura-mura nasida muruk, pasti dang adong halak na olo mardongan tu ibana. Alai molo dang pittor muruk ibana nang pe direhei donganna, jala olo ibana manangihon donganna tikki makkatai, pasti lomo ma roha ni halak mardongan tu ibana. Jadi urupi ma gellengmuna mamboto pasti las do roha ni nasida molo boi nasida mangarajai dirina.

Ajari ma gellengmuna mamboto dia na uppetting.

PRINSIP NI BIBEL: Porlu do “diboto hamu dia na urrikkot”.​—Pilippi 1:​10.

Molo boi dirajai sasahalak dirina, dang holan padaohon diri sian na sala na diulahon ibana. Alai boi do tong diulahon ibana tugasna, nang pe dang lomo rohana mangulahon i. Ikkon diajari hamu do gellengmuna mamboto dia na uppetting. Jala unang ma dipaleleng-leleng ibana mangulahon i. Misalna ikkon jolo dikarejohon ibana do PR-na baru pe boi marmeami.

Gabe sitiruon ma hamu.

PRINSIP NI BIBEL: “Nungnga hupatuduhon sitiruon tu hamu, alani i ikkon diulahon hamu do songon na hubahen i tu hamu.”​—Johannes 13:15.

Sai diparrohahon gellengmuna do boha sikapmuna tikki adong masalah. Misalna molo jut rohamuna dibahen gellengmuna, pittor muruk do hamu manang tetap tenang? Molo tetap tenang do hamu, boi ma diida gellengmuna sai denggan do hasilna molo boi dirajai sasahalak dirina.