Hea do hamu dang tenang tikki mambahas sada topik dohot pasanganmuna? Olo do dihilala hamu songon na mardalan di inganan na godang ranjauna? Gabe mabiar do hamu molo didok hamu hatamuna gabe marbadai ujungna?

Molo songon i do, pos ma rohamuna boi do situasi i dipadenggan. Alai na parjolo talului ma, boasa hamu dohot pasanganmuna jotjot sai marbadai.

Sala paham.

Sahalak istri na margoar si Jillian a mandok, “Sipata na hudok tu suamikku, dang songon i nian maksudhu. Jadi olo ma ibana gabe sala paham. Manang olo do huhilala nungnga hudok hatakku, hape sasittongna dang dope. Na marnipi do ra au.”

Perbedaan pandangan.

Nang pe kompak hian hamu dohot pasanganmuna, alai di piga-piga hal pasti dang sai sarupa pandanganmuna. Boasa? Alana dang adong dua halak na botul-botul sarupa. Perbedaan on boi do gabe variasi manang parbadaan di perkawinan. Di godang pasangan suami istri, perbedaan on gabe parohon parbadaan.

Contoh na so denggan.

Sahalak istri na margoar si Rachel mandok, “Jotjot do natua-tuakku marbadai jala dang masipasangapan nasida. Jadi tikki menikah au, carakku makkatai tu suamikku gabe songon cara ni omakku makkatai tu bapakku. Dang huboto songon dia carana pasangappon suamikku.”

Alasan na sasittongna.

Olo do sipata jut rohamuna tu pasanganmuna alani sada hal. Dibahen hamu ma i gabe dalan lao marbadai dohot ibana. Hape sasittongna dang adong hubunganna tusi. Uppamana didok pasanganmuna ma, “Holan na tarlambat do ho!” Mungkin dang ala na tarlambat i masalahna, alai ala na dihilala pasanganmuna do dang diargai hamu ibana.

Dang soal alani aha hamu marbadai, molo jotjot hamu marbadai boi do i mambahen gabe targanggu kesehatanmuna bahkan boi do gabe marsirang ujungna. Jadi, songon dia ma carana asa unang torus hamu marbadai?

Asa unang sappe marbadai hamuna, coba ma lului aha do sebenarna na mambahen hamu marbadai. Tikki tenang situasina, ulahon ma kegiatan on dohot pasanganmuna.

1. Surat hamu ma di harotasmuna be taringot parbadaan na masa baru-baru on. Misalna disurat suami do, “Lao do ho dohot akka donganmu sadari manipat jala dang ditelepon ho au tudia ho lao.” Jala disurat istri do, “Muruk do ho ala lao au dohot akka donganku.”

2. Tikki tenang pikkiranmuna, bahas ma on: Memang masalah na serius do i? Boi do i dang pola diparsoalhon? Di piga-piga situasi asa boi dame, tumagon do sepakat adong pandapot na berbeda jala toktong patuduhon holong.—Prinsip ni Bibel: Poda 17:9.

Molo dianggap hamu na dua sepele do masalah i, minta maaf ma hamu tu pasanganmuna jala lupahon ma masalah i.—Prinsip ni Bibel: Kolosse 3:13, 14.

Molo adong sian hamu na manganggap masalah na serius do i, ulahon hamu ma langkah na selanjutna.

3. Surat hamu na dua ma songon dia perasaanmuna tikki masa parbadaan i. Misalna disurat suami do, “Huhilala unlomo do roham rap dohot donganmu daripada rap dohot au.” Disurat istri do, “Hira dakdanak do au dibahen ho, na ikkon torus paboahon tu bapakna lao tudia.”

4. Tukkar ma na disurat hamuna i dohot pasanganmuna, jala jaha ma na disurat pasanganmuna. Aha do sasittongna alasan ni pasanganmuna umbahen na gabe marbadai hamu? Bahas ma cara na asing na boi diulahon hamu lao pasaehon parsoalanmuna, dang pola ikkon marbada.—Prinsip ni Bibel: Poda 29:11.

5. Bahas ma aha na diparsiajari hamu sian kegiatan on. Dung diboto hamu, boha ma caramuna pasaehon masalah jala asa unang marbadai be di ari na naeng ro?