1-2. Aha do na masa tu dua sisean ni Jesus tikki di pardalanan tu Emmaus?

 PARROHAHON ma na masa di tanggal 16 Nisan taon 33 M. Lungun do roha ni akka sisean ni Jesus jala mabiar. Dua sian nasida maninggalhon Jerusalem jala lao tu Emmaus, i ma sada huta na daona hira-hira 11 kilometer sian Jerusalem. Metmet do roha ni nasida ala nungnga mate Jesus, guru ni nasida. Berharap do nasida asa Messias i na paluahon nasida di tikki i, hape nungnga mate be ibana. Alai terjadi ma situasi na so tarduga.

² Adong ma sahalak bawa na mandapotton nasida jala rap mardalan dohot nasida. Dipaboa nasida do tu bawa i akka na haccit na dihilala Jesus. Dung i, dipaboa bawa i ma taringot akka hatorangan na so boi dihalupahon nasida. “Mulai sian na disurat si Musa dohot sude na Sinurat ni Akka Panurirang”, dipatorang ibana ma boasa ikkon marsitaonon Messias i jala mate. Tikki sahat nasida na tolu di Emmaus, gabe diboto dua sisean i ma Jesus do hape bawa i. Boi ma tabayakkon las ni roha ni dua sisean i ala mamboto nungnga mulak mangolu be Messias!—Luk. 24:​13-35.

3-4. (a) Aha do na diulahon Jesus dung hehe ibana, jala aha do hasilna? (Ulaon ni Apostel 1:3) (b) Aha do na lao tabahas di artikel on?

³ Saleleng 40 ari dung hehe Jesus, adong do piga-piga hali dipatuduhon ibana dirina tu akka siseanna. a (Jaha Ulaon ni Apostel  1:3.) Di tikki i, dipatogu Jesus do roha ni akka siseanna na marlungun ni roha jala mabiar. Gabe las ma roha ni nasida, jala gabe barani ma nasida lao pasahatton barita na uli taringot Harajaon ni Debata.

⁴ Boi do tadapot parsiajaran sian aha na diulahon Jesus saleleng na 40 ari i. Di artikel on, lao tabahas ma songon dia Jesus mamakke tikkina lao (1) patoguhon roha ni akka siseanna, (2) mangurupi nasida asa lam mangattusi Surat na Badia, jala (3) mangalatik nasida mangulahon tugas na umbalga di ari na naeng ro. Lao tabahas do muse songon dia hita boi maniru teladan ni Jesus.

PATOGUHON ROHA NI NA ASING

5. Boasa akka sisean ni Jesus porlu dipatogu?

⁵ Ikkon dipatogu do roha ni akka sisean ni Jesus. Alana piga-piga sian nasida nungnga manadikkon jabuna, keluargana, dohot karejona asa boi mangihutton Jesus. (Mat. 19:27) Adong do muse na mangadopi ketidakadilan ala gabe sisean ni Jesus. (Joh. 9:22) Boasa dibahen nasida akka pengorbanan on? Alana porsea do nasida Jesus i do Messias na dijanjihon. (Mat. 16:16) Alai tikki dipamate Jesus, lungun situtu do roha ni nasida. Gabe metmet do roha ni nasida ala dang saut aha na diharappon nasida taringot tu Jesus.

6. Dung hehe Jesus, aha do na diulahon ibana?

⁶ Diattusi Jesus do dang sala molo lungun roha ni akka siseanna i tikki mate ibana. Diboto Jesus do muse lungun pe roha ni nasida dang ala na gale haporseaon ni nasida. Alani i ma dung hehe Jesus, pittor dipatogu ibana do roha ni akka siseanna. Misalna, dipatuduhon Jesus do dirina tu si Maria Magdalena, tikki tangis si Maria i di kuburan ni Jesus. (Joh. 20:​11, 16) Dipatuduhon Jesus do tong dirina tu dua sisean, naung tabahas di mula ni artikel on. Jala dipatuduhon Jesus do dirina tu Apostel Petrus. (Luk. 24:34) Jadi aha ma na boi taparsiajari sian Jesus? Taparrohahon ma aha na masa tikki parjolo sahali ibana patuduhon dirina, i ma tu si Maria Magdalena.

7. Aha do na diulahon si Maria, jala aha do na diulahon Jesus tu ibana? (Johannes 20:​11-16) (Ida gambar.)

⁷ Jaha Johannes 20:​11-16. Di tanggal 16 Nisan tikki manogot, ro ma piga-piga borua tu kuburan ni Jesus. (Luk. 24:​1, 10) Taparrohahon ma sahalak sian akka borua i, i ma si Maria Magdalena. Dung sahat si Maria di kuburan i, diida ibana ma kosong do kuburan i. Jadi lao ma ibana paboahon i tu si Petrus dohot tu si Johannes. Pittor lari ma si Petrus dohot si Johannes tu kuburan i, jala diihutton si Maria ma nasida. Dung diida nasida na tutu do kosong kuburan i, mulak ma muse si Petrus dohot si Johannes. Alai tetap do disi si Maria, jala tumatangis ibana. Hape  dang disadari ibana disi do tong Jesus. Diida Jesus do tikki na tumatangis i si Maria, jala tergerak do Jesus naeng mangapuli rohana. Jadi dipatuduhon Jesus ma dirina tu si Maria, jala dipatogu ma roha ni si Maria. Disuru Jesus do si Maria asa lao manjuppangi akka siseanna, jala paboahon pesan na penting. Ikkon dipaboa si Maria do tu nasida nungnga hehe be Jesus.—Joh. 20:​17, 18.

8. Songon dia do caratta maniru Jesus?

⁸ Songon dia do caratta maniru Jesus? Molo tapatogu roha ni akka dongan asa toktong setia tu Jahowa, na maniru Jesus do hita disi. Songon Jesus, taparrohahon ma aha do tantangan na diadopi akka donganta. Berupaya ma hita mangattusi perasaan ni nasida, jala rade ma hita mangapuli roha ni nasida. Taparrohahon ma pengalaman ni donganta borua na margoar si Joanna. Mate do adekna alani kecelakaan. Didok ibana, “Saleleng marbulan-bulan, sai tangis do au. Lungun hian rohakku.” Alai adong ma sahalak donganta bawa dohot istrina na parduli tu si Joanna. Diundang nasida ma si Joanna tu jabu ni nasida. Ditangihon nasida ma tikki marcerita si Joanna, jala dipapos nasida ma roha ni si Joanna na massai arga do ibana di Jahowa. Didok si Joanna ma muse, “Memang di mulana i, marsak hian do au. Dang huboto naeng mangulahon aha. Hira naeng lonong do au di laut na bagas tikki masa badai. Alai dipakke Jahowa do nasida lao menarik au tu perahu penyelamat. Diurupi nasida do au asa mulak muse gogokku lao melayani Jahowa.” Hita pe boi do songon i. Talehon ma tikki lao manangihon akka donganta. Molo tabahen songon i, boi ma tarapul roha ni nasida, jala gabe taurupi ma nasida asa toktong setia manomba Jahowa.—Rom 12:15.

MANGURUPI NA ASING MANGATTUSI HATA NI DEBATA

9. Aha do tantangan na diadopi akka sisean ni Jesus, jala songon dia do Jesus mangurupi nasida?

⁹ Porsea do akka sisean ni Jesus tu Hata ni Debata, jala berupaya do nasida asa toktong mangoloi Jahowa di ngolu ni nasida. (Joh. 17:6) Alai dang diattusi nasida boasa Jesus ikkon dibunu jala dianggap sahalak parjahat. Diboto Jesus do porsea nasida tu Jahowa, jala dihaholongi nasida do Jahowa. Alai porlu do nasida diurupi asa boi lam mangattusi Surat na Badia. (Luk. 9:​44, 45; Joh. 20:9) Jadi diurupi Jesus ma nasida asa lam mangattusi hatorangan naung dijaha nasida di Surat na Badia i. Saonari, parrohahon ma aha na diulahon Jesus tikki dipatuduhon ibana dirina tu dua siseanna di pardalanan tu Emmaus.

10. Songon dia do Jesus mangurupi akka siseanna mangattusi molo ibana do Messias i? (Lukas 24:​18-27)

¹⁰ Jaha Lukas 24:​18-27. Parrohahon ma, tikki rap mardalan Jesus dohot siseanna na dua i, dang pittor dipaboa Jesus ise ibana. Gariada, disukkun Jesus do pandapot ni nasida. Boasa? Ra, lomo do roha ni Jesus asa jolo dipaboa nasida songon dia perasaan ni nasida jala aha na dipikkirhon nasida. Jadi didok nasida, sasittongna berharap do nasida asa gabe raja Jesus di Israel, jala paluahon nasida sian pamarettaon ni Rom na mambahen nasida susa. Dung dipaboa nasida perasaanna, dipakke Jesus ma Surat na Badia lao mangurupi nasida asa mangattusi sude na masa tu Jesus sasittongna nungnga disurirakkon. b Laos di borngin i muse, dijuppangi Jesus do akka siseanna na asing, jala dipaboa ibana do lapatan ni akka surirang i tu nasida. (Luk. 24:​33-48) Jadi, parsiajaran aha do na tadapot sian teladan ni Jesus on?

11-12. (a) Aha do na boi tatiru sian cara ni Jesus mangajarhon hasittongan? (Ida gambar.) (b) Songon dia do sahalak donganta mangurupi parsiajar Bibelna?

¹¹ Songon dia do caratta maniru Jesus? Na parjolo, tikki naeng mangurupi parsiajar Bibelta, tabahen ma sukkun-sukkun na cocok asa dipaboa nasida songon dia perasaanna. (Poda 20:5) Dung taboto perasaan ni nasida, tapatudu ma songon dia carana mangalului akka ayat ni Bibel na cocok  tu situasi ni nasida. Alai, unang ma gabe hamu na manottuhon aha na ikkon diulahon nasida. Togihon ma nasida asa mamikkirhon ayat i, jala songon dia carana mangulahon i di ngolu ni nasida. Taparrohahon ma pengalaman ni sahalak donganta di Ghana na margoar si Norman.

¹² Tikki marumur 16 taon si Norman, marsiajar Bibel ma ibana dohot Saksi Jahowa. Alai dang leleng dukkon i, ditentang keluargana ma ibana. Aha do na mangurupi ibana asa toktong marsiajar Bibel? Nungnga dipaboa guru studina hian taringot Mateus bindu 10 na mandok, ikkon dianiaya do sude halak Kristen na sittong. Didok si Norman, “Jadi tikki ro penganiayaan i, gabe pos ma rohakku on do hasittongan.” Dipaboa guru studina i do muse taringot Mateus 10:16. Dung i, dibahas nasida ma songon dia ayat i boi mangurupi si Norman asa manat jala marbisuk tikki paboahon haporseaonna tu keluargana. Dung tardidi si Norman, lomo do rohana gabe perintis. Hape berharap do bapakna asa kuliah ibana. Dang adong dipaboa guru studina i aha na ikkon diulahon si Norman. Alai dibahen guru studina i do sukkun-sukkun lao mangurupi si Norman mangarimangi akka prinsip ni Bibel. Aha do hasilna? Dibahen si Norman ma keputusan asa merintis. Memang, gabe diusir bapakna do ibana sian jabu. Alai, songon dia do perasaan ni si Norman? Didok ibana, “Pos do rohakku, nga hubahen be keputusan na sittong.” Jadi molo tajujui na asing mangarimangi akka ayat ni Bibel, on ma caratta mangurupi nasida patoguhon haporseaon ni nasida.—Eps. 3:​16-19.

MANGALATIK AKKA BAWA DI HURIA

13. Andorang so nakkok tu surgo, aha do na diulahon Jesus asa toktong mardalan ulaon marbarita na uli? (Epesus 4:8)

¹³ Tikki di tano on Jesus, dipasae ibana do sude na diparettahon Bapakna. (Joh. 17:4) Alai Jesus dang marpikkir, holan ibana sandiri do na boi mangulahon lomo ni roha ni Jahowa. Saleleng tolu satonga taon pelayananna di tano on, diurupi ibana do halak na asing. Pos do roha ni Jesus tu akka siseanna. Andorang so nakkok tu surgo, dilehon Jesus do tugas tu nasida lao marbarita na uli, mangajari, dohot mamparmahani biru-biru ni Jahowa. Piga-piga sian akka sisean i bisa jadi dang gok dope 30 taon umurna tikki mandapot tugas on. (Jaha Epesus 4:8.) Nungnga bekerja keras nasida rap dohot Jesus, jala setia do nasida tu ibana. Alai andorang so nakkok tu surgo, unggodang do pelatihan na dilehon Jesus tu nasida asa boi nasida gabe “silehon-lehon” sian Jahowa. Songon dia do cara ni Jesus mangalatik nasida?

14. Saleleng 40 ari dung hehe Jesus, songon dia do ibana mangurupi akka siseanna? (Ida gambar.)

 ¹⁴ Dilehon Jesus do nasehat na terus terang tu akka siseanna. Alai lambok do cara ni Jesus pasahatton nasehatna i. Misalna, diboto Jesus do adong piga-piga siseanna na so mangattusi dope boasa ikkon mate ibana. Jala adong do muse na so porsea nungnga hehe be Jesus. Jadi dilehon Jesus ma nasehat na terus terang tu nasida. (Luk. 24:​25-27; Joh. 20:27) Asing ni i, dijujui Jesus do nasida asa berfokus lao mamparmahani biru-biru ni Jahowa, dang berfokus mangalului godang hepeng. (Joh. 21:15) Dipaingot Jesus do muse nasida asa unang mambanding-bandingkon tugas ni nasida dohot tugas ni halak na asing. (Joh. 21:​20-22) Diurupi Jesus do asa denggan muse pangattusion ni nasida taringot Harajaon ni Debata, jala berfokus lao marbarita na uli. (Ul. 1:​6-8) Aha do na boi ditiru akka sintua sian teladan ni Jesus on?

15-16. (a) Songon dia do akka sintua boi maniru Jesus? (b) Aha do manfaat na dihilala si Patrick sian nasehat na dilehon sintua?

¹⁵ Songon dia do akka sintua boi maniru Jesus? Ikkon dilatik sintua do akka donganta bawa bahkan na poso dope, asa boi mangulahon gumodang tugas di huria. c Alai, akka sintua dang boi manuntut nasida asa sempurna mandalatton tugas i. Ikkon denggan do cara ni akka sintua tikki mangalehon nasehat asa boi nasida marsiajar gabe halak na serep roha, boi diandalhon, jala rade mangurupi na asing.—1 Tim. 3:1; 2 Tim. 2:2; 1 Ptr. 5:5.

¹⁶ Taida ma manfaat na didapot si Patrick ala manangihon nasehat. Piga-piga taon naung salpu, jotjot do ibana kasar makkatai jala dang sopan, termasuk tu akka donganta borua. Adong ma sahalak sintua na mangalehon nasehat na terus terang tu si Patrick, alai lambok do cara ni sintua i menasehati ibana. Didok si Patrick, “Las do rohakku ala dipaboa sintua i aha na porlu hupadenggan sian dirikku. Najolo metmet do rohakku molo huida donganta bawa na asing mandapot tugas na huharappon. Alai nasehat ni sintua i mangurupi au asa gabe halak na serep roha jala patuduhon holong tu akka donganku, dang holan berfokus asa mandapot tugas di huria.” Aha do hasilna? Dilantik ma si Patrick  gabe sintua tikki marumur 23 taon dope ibana.—Poda 27:9.

17. Songon dia do Jesus patuduhon na pos rohana tu akka siseanna?

¹⁷ Dilehon Jesus do tugas tu akka siseanna lao marbarita na uli dohot mambahen sisean. Olo do ra di mulana akka sisean i merasa dang sanggup nasida mangulahon i. Alai pos do roha ni Jesus, pasti boi do nasida marhasil. Alani i ma didok Jesus tu nasida, “Dos songon Ama naung manuru au, suruokku ma hamu.”—Joh. 20:21.

18. Songon dia do akka sintua boi maniru Jesus?

¹⁸ Songon dia do akka sintua boi maniru Jesus? Rade do akka sintua na marpengalaman mangalatik jala mangalehon tugas tu na asing. (Plp. 2:​19-22) Misalna, boi do akka sintua manogihon akka na poso asa dohot paiasson jala mangarawat Bale Harajaon. Dung mangalehon sada tugas, boi do akka sintua paboahon tu nasida songon dia cara mangulahon i. Jala ikkon pos do roha ni akka sintua na boi do nasida denggan mangulahon tugas i. Taida ma pengalaman ni donganta si Matthew, na baru dilantik gabe sintua. Mandok mauliate do ibana ala rade akka sintua na marpengalaman mangalatik ibana, jala pos roha ni akka sintua i tu ibana. Didok ibana, “Tikki hubahen kesalahan, diurupi akka sintua do au asa marsiajar sian kesalahanki jala berupaya padenggatton i.” d

19. Aha do na ikkon toktong taulahon?

¹⁹ Saleleng 40 ari dung hehe Jesus, dipakke ibana do tikkina i lao patoguhon, mangajari, dohot mangalatik akka siseanna. (1 Ptr. 2:21) Anggiat ma hita sude boi maniru teladan ni Jesus i. Pos ma rohatta, urupan ni Jesus do hita mangulahon i. Alana nungnga marjanji ibana, “Sai na donganakku do hamu sahat tu panutup ni jaman on.”—Mat. 28:20.