Terras, i ma pintu masuk lao tu Inganan na Badia di bagas joro. Bibel Terjemahan Tano na Imbaru na dicetak andorang so taon 2023 mandok, “Bidang ni terras na di jolo ni jabu i 20 asta, dos tu bidang ni jabu i. Jala 120 asta ma timbona.” (2 Kron. 3:4) Akka terjemahan na asing pe mandok molo terras i timbona “120 asta”. Sarupa ma i tu 53 meter.

Alai New World Translation na dicetak taon 2023 paboahon sada hatorangan na disesuaihon taringot terras di bagas joro na dibangun si Salomo. Didok, “20 asta ma timbona”, manang hira-hira sia meter. a Boasa dibahen penyesuaian on? On ma piga-piga alasanna.

Dang dipaboa timbo ni terras i di 1 Raja-Raja 6:3. Di ayat i, dipaboa si Jeremia do taringot bidang dohot ganjang ni terras i. Alai molo taringot timbona, dang adong dipaboa. Dung i, di bindu na mangihut dipaboa ibana do taringot akka bagian na asing na adong di bagas joro i. Termasuk ma i Laut Tombaga, sappulu kareta, dohot dua tiang sian tombaga na dibahen di jolo ni terras i. (1 Raj. 7:​15-37) Molo tutu do timbo ni terras i lobi sian 50 meter, jala untimbo i sian bagian na asing di bagas joro, boasa ma dang dipaboa si Jeremia timbona? Bahkan marratus taon dukkon i, akka sejarawan Jahudi pe mandok, dang untimbo terras i sian bagian na asing di bagas joro i.

Akka sejarawan mandok hira na so mungkin do tembok ni bagas joro i boi menopang terras na timbona 120 asta. Biasana bidang situtu do fondasi ni bangunan di tikki najolo, misalna songon gerbang ni akka kuil di Mesir. Jala bangunanna i piccur tu ginjang. Alai asing do molo bagas joro na dibangun si Salomo. Akka sejarawan mandok, tobal ni tembok ni bagas joro i dang mungkin lobi sian 6 asta manang 2,7 meter. Sejarawan arsitektur na margoar si Theodor Busink pe mandok, “Molo diida sian tobal ni tembokna, dang mungkin terras i timbona 120 asta.”

Olo do ra akka panalin najolo sala tikki manalin 2 Kronika 3:4. Nang pe di piga-piga manuskrip najolo disuratton angka “120” di ayat on, alai di akka salinan na asing na akurat disurat do disi “20 asta”. Misalna songon di Kodeks Aleksandrinus na didapot di abad na palimahon, dohot di Kodeks Ambrosianus na didapot di abad na paonomhon. Attong boasa ma sahalak panalin boi gabe sala jala manuratton “120” di ayat i? Alana di bahasa Heber, sarupa do idaon hata na mangartihon “saratus” dohot “asta”. Jadi olo do ra panalin i sala manurat. Disurat ibana do hata na mangartihon “saratus”, dang “asta”.

Memang, berupaya do hita asa lam bagas mangattusi akka hatorangan taringot bagas joro na dibangun si Salomo. Alai taingot ma, ikkon berfokus do hita tu aha na digombarhon bagas joro i, i ma bagas joro rohani. Mandok mauliate do hita tu Jahowa ala diundang Ibana sude naposona lao manomba Ibana di bagas joro rohani i!—Heb. 9:​11-14; Pgk. 3:12; 7:​9-17.