Borhat ma si Betti * tu Eropa ala adong na manogihon ibana karejo di salon. Alai dung dipungkuli ibana saleleng sampulu ari jala diondam na laho disiksa keluargana, dipaksa ma ibana gabe boruboru na so hasea.

Ingkon dilului si Betti ma hepeng 200 sahat tu 300 euro saborngin laho manggarar utangna 40.000 euro. * Didok si Betti, ”Jotjot do ahu naeng lari, alai mabiar ahu molo dipungkuli nasida keluargangku. Gabe hutaon ma disi.” Ibana ma sada sian opat juta halak na diparhatoban di perdagangan seks internasional.

Hirahira 4.000 taon na salpu, sahalak na poso na margoar si Josep digadis angka abangna. Ujungna, gabe hatoban ma ibana di jabu ni sahalak na marpangkat di Mesir. Ndang songon tuan ni si Betti, burju do tuan ni si Josep tu ibana di mulana i. Alai ala ndang olo ibana mangoloi elaela ni tungganeboru ni tuanna, gabe didok ma ibana naeng manegai tungganeboruna i. Gabe dipenjara ma ibana.—1 Musa 39:1-20; Psalmen 105:17, 18.

Si Josep ma sahalak hatoban di tingki najolo; si Betti ma hatoban di tingkinta saonari. Alai dos do nasida na dua gabe hatoban na digadis songon barang alani hepeng.

Porang ma cara na ummura laho mandapot hatoban. Adong na mandok Raja Misir Thutmose III hea mamboan 90.000 halak na ditaban dung sae marporang di Kanaan. Diparhatoban halak Misir ma nasida di pertambangan, mambahen kuil dohot mambahen bondar.

 Di pamarentaon ni Rom, dipangke do muse porang laho mandapot godang hatoban jala sipata ala mangkaporluhon hatoban gabe marporang nasida. Ra di abad na parjolo, angka hatoban do satonga pangisi ni negara Rom. Jahat do halak Misir dohot halak Rom maradophon hatoban. Ra, holan 30 taon do boi mangolu hatoban di pertambangan ni halak Rom.

Lam leleng lam jahat do halak maradophon hatoban. Sian taon 1600 sahat tu 1900, manggadis hatoban sian Afrika tu Amerika nunga parohon godang paruntungan. UNESCO paboahon, ’Hirahira 25 juta sahat tu 30 juta halak na magodang manang dakdanak ditangko jala digadis.’ Marratus sian marribu halak na digadis, mate tingki manaripari Samudera Atlantik. Sahalak hatoban na martahan i ma si Olaudah Equiano mandok, ”Jotjot do binege tangis ni angka borua dohot halak na laho mate morongorong saleleng di pardalanan.”

Ndang holan najolo masa sisongon i. Organisasi Buruh Internasional mandok, saonari on hirahira 21 juta baoa, borua dohot dakdanak na diparhatoban holan mandapot otik gaji manang ndang digaji. Jala dibahen ma nasida karejo di pertambangan, di angka pabrik, mambahen batu bata, di inganan ni angka na so hasea dohot gabe pangurupi di jabu. Nang pe diorai pamarenta, alai lam godang do halak na diparhatoban.

Alani hansitna gabe hatoban, godang do na mangalo asa boi malua. Di abad na parjolo SM, mangalo do gladiator Spartakus dohot 100.000 hatoban tu pamarentaon Rom, alai ndang marhasil. Hirahira taon 1800, dialo angka hatoban di Hispaniola kepulauan Karibia do tuanna. Ala hansit ditaon nasida diparhatoban di kobun tobu saleleng 13 taon, mangalo jala merdeka ma nasida gabe negara Haiti taon 1804.

Sada haluaon sian parhatobanon na sumurung na hea masa, i ma tingki ruar halak Israel sian tano Misir. Adong tolu juta halak manang sada bangaso na malua sian parhatobanon di Misir. Tama do nasida malua. Dipaboa do di Bibel songon dia hansit ni parngoluonnasida tingki di Misir, diulahon nasida do ”nasa ulaon di balian ro di sude ulaonnasida na asing”. (2 Musa 1:11-14) Asa  unang tamba godang ni halak Israel hea do si Firaun mamarentahon asa mambunu nasa posoposo ni Israel.—2 Musa 1:8-22.

Sumurung do haluaon ni halak Israel sian parhatobanon, ala Debata do na mangurupi nasida. Didok Debata ma tu si Musa, ”Nunga huboto parniahapannasida  . . . tuat Ahu paluahon nasida.” (2 Musa 3:7, 8) Dirayahon halak Jahudi do Paska ganup taon laho marningot haluaon ni nasida sahat tu saonari.—2 Musa 12:14.

Bibel mandok, ”Ndang masa anggo di Jahowa Debatanta i uhum hageduhon,” jala ndang muba Debata. (2 Kronika 19:7; Maleaki 3:6) Disuru Debata do Jesus ”mamboan barita na uli tu angka na pogos . . . , mamaritahon tu angka na tarhurung asa malua”. (Lukas 4:18,19) Haluaon songon dia do na nidokna dison? Jesus disuru laho paluahon angka halak sian dosa dohot hamatean. Didok ibana do, ”Paluaon ni na sintong i ma hamu.” (Johannes 8:32) Saonari pe, marragam do cara ni hasintongan i paluahon angka halak.—Ida ma kotak ” Malua sian Parhatobanon na Asing”.

Sasintongna, asing do cara ni Debata paluahon si Josep dohot si Betti sian parhatobanon. Boi do idaonmu carita taringot si Josep di buku sada Musa bindu 39 sahat tu bindu 41. Sipujion do si Betti na marsitutu mangalului haluaon sian parhatobanon.

Dung diusir sian sada negara di Eropa, pinda ma si Betti tu Spanyol. Pajumpang ma ibana dohot Sitindangi Ni Jahowa jala marsiajar ma. Ala mangihuthon hata ni Bibel, marsitutu ma ibana mangalului karejo na asing. Dapotna ma karejo na tama jala dipangido ibana ma tu germo i asa mangorui utangna ganup bulan. Sada tingki, tompu ma martelepon germo i. Didok ibana ma lunas utang ni si Betti jala mangangku sala ma ibana. Aha na masa? Nunga marsiajar hape germo i tu Sitindangi Ni Jahowa! Didok si Betti ma, ”Nunga dipalua hasintongan i be ho.”

Lungun do roha ni Jahowa mangida hasusaan ni halak Israel na diparhatoban; suang songon i do pangkilaanNa mangida parhatobanon saonari. Tutu, ndang mura mambahen asa ndang adong be parhatobanon. Alai marjanji do Debata laho mambahen ”langit na imbaru dohot di tano na imbaru, inganan ni hatigoran i, hombar tu bagabagana”.—2 Petrus 3:13