Ndang adong gombar rupa ni Jesus tingki di tano on ibana. Ndang hea Jesus ditogihon asa dibahen gombar ni rupana. Alai saleleng marratus taon, godang do angka seniman na mambahen gombar ni Jesus.

Sasintongna, ndang diboto angka seniman i songon dia rupa ni Jesus. Jadi, digombar nasida ma Jesus mangihuthon hasomalan, agama, dohot na hinirim roha ni angka halak na laho manuhor gombar ni Jesus. Jala, balga do pangkorhon ni gombar na dibahen nasida tu pangantusion ni angka halak taringot Jesus dohot ajaranna.

Pigapiga seniman manggombarhon Jesus songon halak na galegale, ganjang obukna, marjanggut, jala parsipsip na muramura lungun rohana. Na asing manggombarhon Jesus songon surusuruan, adong sondang di humaliang ni uluna, jala ndang marsaor tu angka jolma di humaliangna. Tutu do songon i? Sian dia do tadapot hatorangan na sintong? Hatorangan sian Bibel mangurupi hita mandapot pangantusion na sintong taringot tu Jesus.

On ma na didok Jesus di tangiangna tingki laho tardidi. (Heber 10:5; Mateus 3:13-17) Aha do maksud ni hata ni Jesus i? Tolu pulu taon andorang so i, didok surusuruan Gabriel do tu si Maria, ”Gabegabean ma ho, tubuan anak ma ho; . . . Anak ni Debata.” (Lukas 1:31, 35) Gabe jolma na sempurna ma Jesus, dos songon si Adam tingki ditompa. (Lukas 3:38; 1 Korint 15:45) Ra, suman do rupa ni Jesus tu si Maria.

Marjanggut do Jesus, dos songon hasomalan ni halak Jahudi. Di tingki i, janggut patuduhon hasangapon dohot pangargaion di angka baoa. Dijaga nasida do janggutna i asa rapi. Tontu, dijaga Jesus do asa rapi janggutna jala ndang ganjang obukna. Alana, holan halak Nasir do na ganjang obukna, umpamana si Simson.​—4 Musa 6:5; Panguhum 13:5.

Saleleng 30 taon di tano on, leleng do Jesus gabe tukang hau jala ndang dipangke ibana alat modern. (Markus 6:3) Tontu, gogo do Jesus. Di mula ni pangkobasionna, boi do holan sahalakna pabalihon ”saluhutna sian joro i, rap dohot angka birubiru dohot lombu, disarahon ma hepeng ni panungkari i, diunggilhon ma mejana”. (Johannes 2:14-17) Holan halak na gogo do na boi mangulahon i. Dilehon Jesus do sude gogona tingki mangulahon parenta ni Debata. Jesus mandok, ”Ingkon dohot do tu angka huta na asing hubaritahon harajaon ni Debata, ai ala ni i do Ahu disuru.” (Lukas 4:43) Sian on taboto, gogo do Jesus, alana boi ibana mardalan pat marbarita na uli sahat tu Palestina.

Tontu, hata ni Jesus on dohot parangena na lambok mambahen dame roha ni ”angka na loja  jala na sorat”. (Mateus 11:28-30) Burju ni rohana pe mambahen pos roha ni na manangihon. Asing ni i, lomo do roha ni angka na poso jonok tu Jesus. Alana didok di Bibel, ”Dihaol ma nasida, diampehon ma tanganna tu nasida.”​—Markus 10:13-16.

Andorang so mate, godang do sitaonon ni Jesus. Alai ndang gabe muramura lungun rohana. Umpamana, ro do Jesus tingki adong pesta parbogason di Kana, jala dibahen ibana do aek gabe anggur di pesta i. (Johannes 2:1-11) Jala tongtong do rade Jesus mangajari angka halak.​—Mateus 9:9-13; Johannes 12:1-8.

Na rumingkot, cara ni Jesus marbarita mambahen sude halak marlas ni roha mangkirim tu hangoluan salelengna. (Johannes 11:25, 26; 17:3) Dung mulak marbarita siseanna na pitupulu halak i jala paboahon pengalaman ni nasida, ”marolopolop” ma roha ni Jesus. Didok Jesus, ”On ma tahe halashon hamu: Naung tarsurat goarmuna di banua ginjang i!”​—Lukas 10:20, 21.

Di tingki ngolu ni Jesus, lomo do roha ni angka pemimpin ni agama pasangaphon jala mangkaringkothon diri sandiri. (4 Musa 15:38-40; Mateus 23:5-7) Imbar do Jesus sian nasida, jala didok do tu siseanna asa unang pasangaphon diri. (Lukas 22:25, 26) Jesus mandok, ”Jaga ma hamu mida angka sibotosurat, angka na lomo roha madangadang marbaju na ganjang, asa ditabi halak nasida di angka onan.”​—Markus 12:38.

Ndang songon pemimpin ni agama, didongani Jesus do godang jolma. Alai, ndang pola tangkas ibana ditanda halak. (Johannes 7:10, 11) Ala dos do parbalga ni daging ni Jesus tu apostelna na sampulusada i, ingkon diumma si Judas do Jesus asa ditanda musu na dia Jesus.​—Markus 14:44, 45.

Nang pe otik hatorangan taringot tu rupa ni Jesus, alai tangkas taboto, ndang songon gombar ni angka seniman i rupa ni Jesus na sasintongna. Na rumingkot, ingkon sintong do pangantusionta taringot tu Jesus.

Pigapiga jom dungkon didok Jesus hata on, mate ma ibana jala ditanom. (Johannes 14:19) Dilehon ibana do ngoluna ”bahen tobus ni torop jolma”. (Mateus 20:28) Dung tolu ari, dipahehe Debata ma ibana mardaging ’tondi’ jala ”dilehon do Ibana tu hapataron” asa idaon ni siseanna ibana. (1 Petrus 3:18; Ulaon ni Apostel 10:40) Songon dia do rupa ni Jesus diida siseanna? Imbar do rupa ni Jesus. Alana, siseanna pe ndang pintor mananda ibana. Dirimpu si Maria Magdalena do ibana pangula ni porlak. Tingki di pardalanan tu Emmaus, dirimpu siseanna do Jesus halak na baru ro tu Jerusalem.​—Lukas 24:13-18; Johannes 20:1, 14, 15.

Saonari, songon dia do pangantusionta taringot Jesus? Lobi sian 60 taon dung mate Jesus, apostel Johannes mandapot parnidaan taringot Jesus. Diida ibana do Jesus gabe ”Raja ni angka raja jala Tuhan ni angka tuan”. Di parnidaan i, ndang adong dipaboa molo Jesus tarsilang. Jesus nunga gabe Raja di Harajaon ni Debata. Diripashon ma musu ni Debata, jala mangalehon pasupasu tu jolma.​—Pangungkapon 19:16; 21:3, 4.