1-2. Molo disukkun gellengmuna tu hamu taringot Debata dohot Bibel, aha do na porlu diulahon hamu?

 GODANG do halak na mandok porlu do godang tikki dohot gogo lao pagodang-godangkon ianakkon. Dipujihon hami do hamu akka natua-tua ala berupaya hamu mangurupi ianakkonmuna patoguhon haporseaonna tu Jahowa. (5 Mus. 6:​6, 7) Alai lam tamba umur ni gellengmuna, olo do ra disukkun tu hamu taringot haporseaotta dohot akka aturan na dibahen Jahowa.

² Tikki disukkun gellengmuna songon i, olo do ra gabe khawatir hamu. Didok rohamuna do ra dang pos dope rohana tu Debata dohot tu Bibel. Alai sasittongna, denggan do molo disukkun gellengmuna songon i. (1 Kor. 13:11) Jadi urupi ma nasida. Pakke ma i gabe kesempatan lao mangurupi nasida patoguhon haporseaonna tu Debata dohot mangalatik cara marpikkirna.

3. Aha do na lao tabahas di artikel on?

³ Di artikel on, lao tabahas ma songon dia natua-tua mangurupi gellengna (1) patoguhon haporseaonna tu Debata dohot tu Bibel, (2) mangattusi boasa penting mangoloi aturan na dibahen Debata, jala (3) paboahon haporseaonna tu na asing. Tabahas ma muse boasa denggan molo disukkun gellengmuna taringot haporseaotta. Jala akka kegiatan aha do na boi diulahon hamu rap dohot nasida asa adong kesempatan lao mambahas taringot haporseaotta.

URUPI MA IANAKKONMUNA ASA POS ROHANA TU DEBATA DOHOT TU BIBEL

4. Sukkun-sukkun aha do na bisa jadi disukkun gellengmuna tu hamu, jala boasa?

⁴ Hamu akka natua-tua, ingot ma molo porsea hamu tu Debata, dang gabe otomatis porsea gellengmuna tu Debata.  Alana haporseaon i dang diboan tubu. Lam tamba umur ni gellengmuna, olo do ra disukkun tu hamu, ‘Memang tutu do adong Debata? Memang boi do dihaporseai isi ni Bibel?’ Alani i ma didok di Bibel, ikkon tapakke do ‘nasa pikkiranta’ lao ‘manguji sasude’. (Rom 12:1; 1 Tes. 5:21) Alai, songon dia ma caramuna mangurupi ianakkonmuna asa lam togu haporseaonna tu Jahowa?

5. Aha do na boi diulahon akka natua-tua asa lam pos roha ni ianakkonna tu isi ni Bibel? (Rom 12:2)

⁵ Urupi ma ianakkonmuna mangalului bukti na patuduhon sittong do na disurat di Bibel. (Jaha Rom 12:2.) Molo adong sukkun-sukkun ni gellengmuna taringot hasittongan, urupi ma ibana mangalului alusna mamakke alat riset songon Tudu-Tudu Lao Marsiajar. Misalna di bagian subjek di bukku i, adong topik “Bibel”. Dung i boi ma diparsiajari ibana subjudul “Na Sinihathon ni Debata”. Disi dapotna ma akka bukti na patuduhon molo Bibel i “hata ni Debata”, dang holan bukku biasa na disurat jolma. (1 Tes. 2:13) Boi do muse diriset ibana sian publikasitta taringot Kota Ninive di Asiria kuno. Najolo, piga-piga halak mandok dang hea adong Kota Ninive i. Alai di taon 1850-an, dapot ni akka ahli ma reruntuhan ni Kota Ninive i. On mambuktihon sittong do na disurat di Bibel. (Sep. 2:​13-15) Lao mamboto gumodang hatorangan taringot kehancuran ni Kota Ninive songon na dipaboa di Bibel, boi do dijaha ibana artikel “Diboto Hamu Do?” di Joujou Paboahon November 2021. Denggan do tong molo dibandingkon ibana na diparsiajarina sian publikasitta tu akka bukku na sian luar ni organisasitta na boi dihaporseai. Molo diulahon ibana i, gabe pos ma rohana sittong do na disurat di Bibel i.

6. Aha do na boi diulahon akka natua-tua lao patuduhon tu ianakkonna na sittong do isi ni Bibel? Bahen ma contoh. (Ida gambar.)

⁶ Patudu ma akka bukti asa pos roha ni ianakkonmuna tu isi ni Bibel. Sai lului ma kesempatan lao makkata-hatai dohot gellengmuna taringot Debata dohot Bibel. Boi do hamu rap lao tu museum, taman, manang tu kantor cabang ni Saksi Jahowa. Ra di museum i adong do benda peninggalan sejarah na adong hubunganna tu peristiwa na disurat di Bibel. Jadi tikki ro hamu tu museum i manang diida hamu i di internet, pakke ma i lao mangurupi ibana asa pos rohana sittong do isi ni Bibel. Misalna, boi do dipaboa hamu taringot Batu Moab. Batu on umurna 3.000 taon, jala adong do disi goar ni Debata. Memang saonari Batu Moab on adong di Museum Louvre di Paris, Prancis. Alai, adong do tiruan ni Batu Moab on di Kantor Pusat ni Saksi Jahowa  di Warwick, New York. Dibahen do i di museum “Bibel dohot Goar ni Debata”. Di Batu Moab on, adong do disurat cerita taringot Raja Mesa na sian Moab na mangalo halak Israel. Jala di Bibel pe disurat do tong taringot i. (2 Raj. 3:​4, 5) Jadi molo diida ianakkonmuna akka bukti na patuduhon sittong do isi ni Bibel, pasti lam togu ma haporseaonna.—Bandingkon tu 2 Kronika 9:6.

7-8. (a) Aha do na taparsiajari sian marragam bentuk ni akka toppaan na adong di alam semesta? Bahen ma contoh. (Ida gambar.) (b) Sukkun-sukkun aha do na mangurupi ianakkonmuna asa lam pos rohana tu Debata na manoppa saluhutna?

⁷ Urupi ma ianakkonmuna asa mangarimangi akka toppaan. Tikki tu ladang hamu manang tu taman, suru ma ianakkonmuna mangida bentuk ni akka toppaan na adong disi. Urupi ma nasida mangattusi pasti adong do na merancang bentuk ni akka toppaan i, jala massai malo do na mambahen i. Godang do akka toppaan na adong di alam semesta na terbentuk sian pola spiral. Contohna galaksi, cangkang siput, daun, dohot bunga matahari. a Diparsiajari akka ilmuwan do pola spiral on saleleng martaon-taon. Adong ma sahalak ilmuwan na margoar si Nicola Fameli mandok, molo taetong godang ni pola spiral di akka toppaan na adong di alam semesta on, sarupa do pola angka na terbentuk disi. Digoari ma pola angka on bilangan Fibonacci. b

⁸ Di sikkola, olo do ra diparsiajari ianakkonmuna akka pola na asing na adong di alam semesta. Misalna pola na adong di hau. Sarupa do pola na terbentuk di godangan hau. Adong batangna na tarbagi gabe cabang-cabang jala cabang-cabangna i tarbagi gabe ratting. Digoari ma on pola fraktal. Pola fraktal on pe adong do di akka toppaan na asing. Alai ise do na merancang pola na massai bagak i? Molo dirimangi ianakkonmuna sukkun-sukkun on, gabe lam pos ma rohana memang ditoppa Debata do saluhut na adong di tano on. (Heb. 3:4) Asing ni i, boi do tong disukkun hamu tu ianakkonmuna, “Ala Debata do na manoppa saluhutna, pasti Ibana do na mamboto boha carana asa marlas ni roha hita, kan?” Dung i, patorang ma tu ibana dipaboa Debata do di Bibel boha carana asa marlas ni roha hita.

URUPI MA IANAKKONMUNA ASA POS ROHANA TU ATURAN NA DIBAHEN DEBATA

9. Aha do sipata na mambahen ragu ianakkonmuna tu aturan na dibahen Debata?

⁹ Sipata ragu do ra ianakkonmuna tu aturan na dibahen Debata na disurat di Bibel. Coba  ma sukkun boasa ragu ibana. Ala na so porsea do ibana tu na didok di Bibel? Manang holan ala na so diattusi ibana do patorakkon i tu halak na asing? Molo songon i do situasina, urupi ma ibana mamboto manfaat ni mangoloi paretta ni Debata. Boi do diparsiajari hamu taringot i di bukku Mangolu Saleleng ni Lelengna. c

10. Aha do na ikkon diulahon hamu asa boi ianakkonmuna gabe ale-ale ni Jahowa?

¹⁰ Urupi ma ianakkonmuna asa olo nasida gabe ale-ale ni Jahowa. Tikki marsiajar Bibel hamu dohot ianakkonmuna, pakke ma sukkun-sukkun dohot gambar di bukku Mangolu Saleleng ni Lelengna asa lam ditanda ibana Jahowa. (Poda 20:5) Misalna di parsiajaran 8, dipaboa do molo Jahowa i ale-ale na burju, na mangalehon sipasingot na bermanfaat jala melindungi hita. Dung dibahas hamu 1 Johannes 5:​3, sukkun ma ibana, “Ala taboto do Jahowa i ale-ale na burju, boha do pandanganta tu aturan na dilehon Ibana tu hita?” Molo disukkun hamu songon i, boi ma diattusi ianakkonmuna ala na holong do roha ni Jahowa umbahen na dilehon Ibana akka aturan i tu hita.—Jes. 48:​17, 18.

11. Aha do na boi diulahon hamu lao mangurupi ianakkonmuna asa mangoloi poda na sian Bibel? (Poda 2:​10, 11)

¹¹ Bahas ma manfaat ni mangoloi poda na sian Bibel. Tikki rap hamu manjaha Bibel manang ayat harian dohot ianakkonmuna, bahas ma aha do manfaat ni akka prinsip ni Bibel tu keluargamuna. Misalna, paboa ma tu nasida boasa penting bekerja keras jala toktong jujur. (Heb. 13:18) Asing ni i, patorang ma tu nasida molo taoloi poda na sian Bibel, boi do i mambahen gabe lam sehat hita jala lam marlas ni roha. (Poda 14:​29, 30) Jadi molo takkas diattusi ianakkonmuna manfaat ni mangoloi poda na sian Bibel, pasti gabe lomo do rohana mangulahon i.—Jaha Poda 2:​10, 11.

12. Aha do na diulahon si Steve dohot istrina lao mangurupi anakna asa diboto ibana manfaat mangoloi prinsip ni Bibel?

¹² Adong donganta sian Prancis na margoar si Steve. Jala adong anakna na margoar si Ethan, na marumur 16 taon. Berupaya do si Steve dohot istrina mangurupi si Ethan mamboto ala na holong do roha ni Jahowa umbahen na dilehon patikna tu hita. Didok si Steve muse, “Disukkun hami ma tu ibana, ‘Boasa lomo roha ni Jahowa taoloi parettana? Boasa tadok akka parettana i bukti ni holongna tu hita? Aha do na terjadi molo dang taihutton akka prinsipna?’ Ala disukkun hami songon i, gabe lam pos ma roha ni si Ethan sai sittong do paretta ni Jahowa i.” Didok si Steve muse, “Tujuannami mambahen songon on asa diboto si Ethan, na dao do dumenggan bisuk ni Debata na dipaboa di Bibel dibandingkon tu bisuk ni jolma.”

13. Songon dia do natua-tua boi mangalatik ianakkonna lao mangulahon prinsip ni Bibel? Paboa ma contoh.

¹³ Latik ma ianakkonmuna asa mangulahon prinsip ni Bibel. Misalna, disuru guruna do ra ianakkonmuna manjaha sada bukku di sikkola. Hape akka halak na disurat di bukku i mangulahon seks na so patut dohot kekerasan. Jala isi ni bukku i mambahen akka na manjaha gabe naeng maniru pangalaho ni nasida. Molo songon i do situasina, sukkun ma ianakkonmuna boha perasaan ni Jahowa mangida akka halak na mangulahon ulaon sisongon i. (Poda 22:​24, 25; 1 Kor. 15:33; Plp. 4:8) Molo diulahon hamu songon i, gabe diattusi ianakkonmuna ma boasa massai penting mangoloi Jahowa. Jala molo disukkun guruna  manang dongan sasikkolana boha pandapotna taringot bukku i, boi ma dipatorang ibana haporseaonna tu nasida.

URUPI MA IANAKKONMUNA ASA BOI PATORAKKON HAPORSEAONNA

14. Boasa sipata mabiar akka na poso paboahon haporseaon ni nasida?

¹⁴ Sipata, olo do mabiar akka na poso paboahon haporseaonna tu na asing. Misalna, maila do ra nasida patorakkon boasa dang porsea nasida tu teori evolusi. Ra didok guruna sittong do teori evolusi i. Jadi hamu akka natua-tua, aha do na ikkon diulahon hamu asa pos roha ni ianakkonmuna tu na diparsiajarina sian Bibel?

15. Aha do na mangurupi akka na poso asa lam pos rohana tu hasittongan?

¹⁵ Urupi ma ianakkonmuna asa pos rohana tu hasittongan. Paboa ma tu ianakkonmuna, unang maila ibana paboahon na ditoppa Debata do saluhut na adong di tano on. (2 Tim. 1:8) Alana godang do tong ilmuwan na porsea, dang mungkin boi toppu adong akka toppaan i molo so adong na manoppa. Tikki diparsiajari akka ilmuwan i rancangan na rumit di sada toppaan, gabe diboto nasida ma pasti adong do panoppa na massai malo na merancang i. Molo diurupi hamu ianakkonmuna mangattusi on, tottu dang olo be ibana porsea tu ajaran teori evolusi. Boi do tong dijujui hamu ianakkonmuna asa disukkun tu akka donganta boasa pos roha ni nasida na adong do panoppa i. Molo diulahon ibana songon i, gabe lam pos ma rohana tu hasittongan. d

16. Songon dia do natua-tua mangurupi ianakkonna asa boi dipatorang ibana haporseaonna tu halak na asing? (1 Petrus 3:15) (Ida gambar.)

¹⁶ Urupi ma ianakkonmuna asa boi ibana patorakkon haporseaonna. (Jaha 1 Petrus 3:15.) Boi do dibahas hamu artikel di bagian “Pertanyaan Anak Muda—Penciptaan atau Evolusi?” di jw.org. Dung i, pangido ma asa dipillit ibana hatorangan na dia na boi pakkeonna lao patorakkon na tutu do adong Sitoppa hita. Rap marlatik ma hamu mangulahon i. Paingot ma ibana asa unang berdebat dohot akka dongan sasikkolana. Jala jujui ma asa sederhana jala masuk akkal cara ni ibana patorakkon i. Misalna adong do ra donganna na mandok, “Dang porsea au tu Debata, ai so  hea huida Ibana.” Boi do didok ianakkonmuna songon on, “Bayakkon ma molo lao ho tu sada hutan jala diida ho ma adong jabu na bagak disi. Memang dang adong juppangmu halak di hutan i. Alai dang mungkin kan dokkononmu boi toppu adong jabu i molo so adong na mambahen? Dos songon i ma portibi on dohot sude na adong dison. Pasti adong do na manoppa sudena i.”

17. Songon dia do natua-tua mangurupi ianakkonna asa mangalului kesempatan lao marbarita na uli? Bahen ma tudosan.

¹⁷ Urupi ma ianakkonmuna asa dilului ibana kesempatan lao marbarita na uli. (Rom 10:10) Boi do disarupahon hamu ulaon marbarita na uli i songon na marmusik. Mulana, ende na mura do na dilatik halak na baru marsiajar marmusik. Lam leleng gabe lam malo ma ibana. Dos songon i ma marbarita na uli. Jujui ma ianakkonmuna mamakke cara na sederhana lao paboahon haporseaonna tu na asing. Misalna boi do ra didok ibana tu dongan sasikkolana songon on, “Sebenarna jotjot do akka ilmuwan maniru rancangan ni akka toppaan di tano on. Olo do ho molo huputarhon video taringot i?” Dung manonton seri video Adong do na Mambahen On? boi do muse didokkon ibana songon on, “Haru akka ilmuwan i dipuji ala ditiru nasida rancangan ni toppaan di tano on, tarlumobi ma Debata na manoppa i sude.” Molo diulahon na poso i songon i, gabe olo do ra dongan sasikkolana i marsiajar taringot Jahowa.

TORUS MA URUPI IANAKKONMUNA PATOGUHON HAPORSEAONNA

18. Aha do na porlu diulahon natua-tua asa toktong togu haporseaon ni ianakkonna tu Jahowa?

¹⁸ Saonari, mangolu di tonga-tonga ni akka halak na so porsea tu Jahowa do hita. (2 Ptr. 3:3) Hamu akka natua-tua, tikki marsiajar Bibel hamu dohot ianakkonmuna, jujui ma asa diparsiajari ibana akka topik na mambahen lam pos rohana tu hata ni Debata dohot tu parettana. Urupi ma ibana patoguhon haporseaonna tu Jahowa. Jotjot ma bahas hamu taringot akka toppaan jala mangarimangi i. Asing ni i, urupi ma ibana mangalului bukti taringot akka nubuat ni Bibel naung digohi saonari. Alai na paling penting, rap ma hamu martangiang jala torus ma tangiakkon ibana. Molo diulahon hamu songon i, pos ma rohamuna pasti pasu-pasuon ni Jahowa do sude upayamuna mangurupi ianakkonmuna asa togu haporseaonna.—2 Kron. 15:7.