Songon dia do Asa Boi Au Gabe Saksi Jahowa?

PANGOLU

Dipaboa Jesus do songon dia asa boi gabe Saksi Jahowa jala disurat do i di Mateus 28:19, 20. Asa boi sasahalak gabe siihutton Kristus, porlu do ibana paboahon manang mangkatindakkon taringot tu Jahowa.

Cara 1: Mamparsiajari aha na diajarhon Bibel. Didok Jesus tu akka siseanna asa “podai hamu ma. . . , ajari hamu ma nasida.” (Mateus 28:19, 20) Lapatan ni hata “podai”, i ma mambahen sasahalak gabe “parsiajar”. Ajaran ni Jesus na adong di Bibel, boi mangurupi hita asa martua. (2 Timoteus 3:16, 17) Las rohanami mangurupi hamu marsiajar Bibel marhite program marsiajar Bibel na so manggarar.—Mateus 10:7, 8; 1 Tessalonik 2:13.

Cara 2: Mangulahon na diparsiajari. Didok Jesus do tu halak na marsiajar asa “mangaradoti nasa hata naung [dipatikkon]”. (Mateus 28:20) Lapatanna, akka parsiajar Bibel dang sae holan manambai parbinotoan—ikkon boi do i paubahon pikkiran dohot parniulaonna. (Ulaon ni Apostel 10:42; Epesus 4:22-29; Heber 10:24, 25) Taronjar do roha ni halak na mangihutton paretta ni Jesus lao mangalehon dirina tu Debata Jahowa.—Mateus 16:24.

Cara 3: Tardidi. (Mateus 28:19) Di Bibel, dipatudos do pandidion tu na pamatehon dosana. (Bandikkon tu Rom 6:2-4.) On patuduhon naung tatinggalhon do hasomalan na so denggan na taulahon na jolo jala rade mangulahon hasomalan na denggan. Pandidionmuna, patuduhon di jolo ni natorop, naung diparsiajari jala diulahon hamu do na didok Bibel. Jala on patuduhon na dipangido hamu do panggora ni roha na ias tu Debata.—Heber 9:14; 1 Petrus 3:21.

Sian dia do huboto naung boi au tardidi?

Paboa tu sintua di huria. Sukkunon ni nasida ma manang naung diattusi hamu do ajaran dasar ni Bibel, naung dibahen hamu hamubaon, manang naung rade hamu mangalehon diri tu Debata.—Ulaon ni Apostel 20:28; 1 Petrus 5:1-3.

Diulahon Saksi Jahowa do cara on tu ianakkonna?

I do. Dipagodang-godang hami do ianakkonnami “di bagasan ajar dohot poda ni Tuhan i”, songon na diparettahon di Bibel. (Epesus 6:4) Alai, dung magodang nasida, ikkon nasida sandiri do na mamillit lao marsiajar, manjalo dohot mangulahon na nidok ni Bibel andorang so tardidi. (Rom 12:2) Di tikkina, ikkon nasida sandiri do na mamillit taringot tu panombaon.—Rom 14:12; Galatia 6:5.