JI’TE 2
Si be we?
1. Nweke a tcheng ge pe ghamte Si?
Si nyenyô be Mo ye é be é Pem goung potse awè a. A be é late ghe tchwe ne tho’, é le neng bo gô la’ mi. (Psaume 90:2) Yu ne ha mtchoung pepoung mye a be tchum Bible a. (1 Timotio 1:11) Pa’ yu ne ha vôk bi pe a, pe gô ghamte pe da’ yu. —Ké Apokalipse 4:11.
2. Si be m ge ke?
Sôm mo lam fe djô Si, nekele é be ta’ Jwégne; a thoute ge ta’ tchi vôk be a tchye ye pô bapne pye wap be dem-tcha’ a. (Yohané 1:18; 4:24) Da’ge pe fing ne jye tchi mo ye Si be yu a, tchye m ne potse tsye a be é pem a. Ta’ fo’, veng mthôm tse ba mflawa da’te wôkpe koungne é ba jyenwe é. Pa’ dzu be a ne djôm a da’te wôkpe pa’ é be é tuô a. —Ké Roma 1:20.
Pe fing ne ping dagne medou potse ne tchi mo ye Si be yu a tchye m ne ne ké Bible. Ta’ fo’, a sing wôkpe ywe ye é koung a ba ye é te koung a pe, pa’ é ne gre pou a pômneng a ba pa’ é gre ne tchitchi mtam a. —Ké Psaume 103:7-10.
3. Si be é ghe ta’ tso a?
Yéso le ghôm ge: “Ta yôk ye é kèbeng a, ge tso tsou pe dôlô.” (Matio 6:9) Si be é ghe tchitchi mtso ne ha mkou’ mye. Da’ge é be é ghe da’ ta’ tso ye mou’. Be ya ghôm le, ké tso bô ne ye tchi. Ne Ghômala’ pou de gu’ khé ge “Jéova.” Da’ge she pô pe ké ge “Yawé.” —Ké Psaume 83:18.
A be pou té tso Si tchum medou Mbible, kwyepgne ya pou a mtso ne ha mkou’ mye pa’ Tchyepô a, ke Si le. Po’o, kwa’ tchwe ne to’, tso Si le be tchum Bible gwya mtchum 7 000. Yéso le ghe ge pou jye tso bô tchwe ye é le ghôm nwe ne Si bi pômneng a. —Ké Yohané 17:26.
Yô vidéo Si be é ghe taʼ tso a?
4. Jéova jwing ne tse yôkpe a?
Dendeng pa’ ta yenge be é ghe koungne a, Si bo fa’ ge pe you’ pepoung ne mama
Mgo’ gwye mye a si tchwelô a da’te ge Si te jwing ne tse yôkpe a? She pô gôm ge Si gre ge pe yô go’ ne ne dente wôkpe, da’ge a te be nyenyô pe. —Ké Yakop 1:13.
Si be é tak bi Ba ya mo le ge é pe tchi ye ywe te gre. A te kwa’ ŋwègne ne pe de khète pe kwa’ wôkpe ne ghamte Si a? (Josué 24:15) Da’ge medou pômneng de khète ne ghe nwe tchwepoung ne pyeshe pô, a ghe ge medou pômneng pe djô go’. A tchente djè Jéova ne yô tse tchwepoung bô. —Ké Genèse 6:5, 6.
Jéova jwing ne tse yôkpe. É tcheng ge pe pe de ŋwègne tchwe. A tchu’ mou ywe é simgne go’ ba pô pye wap de go’ so’ a. Da’ge, ta’ ywe be si ye a gre ge Si ping thak go’ ne mou ywe tam a. Tchum ji’te 8 pe gô yô ywe bô. —Ké 2 Pètro 2:9; 3:7, 13.
5. Pe fing ne fou’te mne môkpe ha beng Si m tchi ge ke?
Jéova bo gôm bi pe ge pe tchye m ne priya fou’te mne môkpe ha beng é. É dé bawele ne pe pe do é. (Psaume 65:2; 145:18) É bo tcheng ne tchousi yôkpe. É bo djô pa’ pe we thela ne ghe ywe ye a boung é a, ba m be ye pe te khou’ ne ghe ya goung mtchum wè a pe. Ba pa’ pe be pô mhô a, pe fing ne pe tchwe pepoung pou a Si. —Ké Psaume 103:12-14; Yakop 4:8.
Pa’ Jéova be é ha vôk bi pe a, pe gô koung é te tchye goung pyeshe pô awè. (Markousi 12:30) Tchwe ye pe dagne ne jye Si neng bing gre ywe ye é hente bi pe a, pe da’te ge pe koung é, a neng gre ge pe kwi’ fou’ mne môkpe ha beng é. —Ké 1 Timotio 2:4; 1 Yohané 5:3.
