JIʼTE 16

Yéso le ghe la tchwe ye é le be demtchaʼ a ?

YOU’ NE

Medou pô sè djô Yéso paʼ taʼ mou bwa te mo bo bômte é a, taʼ gamdoʼ be é ghe jyenwe, ke taʼ mbè bo gô pfu a le. Daʼge pe fing ne ping jye she potse ne é, tchye m ne ne lagne potse ne ye tchi ne tchwe demtchaʼ a ? Tchum jiʼte yeng, pe gô yô she ne potse mtuôdeng tsye Yéso le ghe, ba tchi paʼ a fing ne kwite o a.

1. Faʼ tuôdeng téʼ bi Yéso le be ke ?

Faʼ tuôdeng téʼ bi Yéso le be ne “sing Tchoung pepoung ne Nefo Si.” (Ké Loukasi 4:43.) É le sing tchoung pepoung ge Si gô sôʼ tu taʼ nefo, ke taʼ tchi ne saʼ le, ye a gô sôʼ nyapte goung mnwe pômsoung awè a. * Yéso le tchwiʼte tchoung pepoung bô pe te pwa ne mgouʼ ta m hap.—Matio 9:35.

2. Nweke Yéso le be gre msya ?

Bible gôm ge ‘Si le tchye m ne é [Yéso] daʼte mtuô mye, gre tchitchi msya pou a tchitchi mting.ʼ (Mfaʼ 2:22) Jéova le ha pawa bi Yéso ne ne bwa taʼ fefa gwye, kim shaʼmshaʼ pô, djè mghè gho, neng djam ba pô ne vu. (Matio 8:23-27; 14:15-21; Markousi 6:56; Loukasi 7:11-17) Msya mye Yéso le gre a le tchente be daʼte ge Si ne le them é. A le neng be daʼte ba m ge Jéova be é ghe pawa ne gre ge goung mnwe môkpe awè mi.

3. Tchi paʼ Yéso le ne tchwe a fing ne lagne wôkpe ke ?

Yéso le be djouʼgne bi Jéova ba tchwekele. (Ké Yohané 8:29.) Ne goung tam ye é le tchwe demtchaʼ a, ba m paʼ mketuʼ le be si a, Yéso le be gre goung potse tsye Tap é le hente ge é ghe a. É le laʼte ge pômsoung fing ne ghamte Jéova ba m tchum mtam tchuôtuô. Poʼo, Yéso le “tak foʼ bi [pe], ge pe pe ging pe dendeng ne mkwe mye.”—1 Pètro 2:21.

PING TCHENG NE GÔ DZE

Yô tchi paʼ Yéso le tchwiʼte tchoung pepoung neng be gre medou msya a.

4. Yéso le be tchwiʼte tchoung pepoung

Yéso le be ging ne m medjye vôp ne medou mkilométa, be tchwiʼte tchoung pepoung bi medou pô. Ké Loukasi 8:1, neng gômte ne mhente menge :

Yéso le sing Ghôm Si daʼ bi pô pye wap le tchouʼte ne youʼ é a ?
Yéso le be gre la te ne djô pô pye é gô sing Ghôm Si bi pou a ?

Si le kaʼgne ge Mésia le gô sôʼ tchwiʼte tchoung pepoung. Ké Izaya 61:1, 2, neng gômte ne mhente menge :

Yéso le logne yeng ghôm gamdoʼ m tchi ge ke ?
O kwè ge a bo tcheng ge pômneng youʼ tchoung pepoung yeng tyôʼô a ?

5. Yéso le jiʼte mnyenyô mtuôdeng bi pô

Yéso late be sing daʼ tchoung pepoung ne Nefo Si pe, é le be jiʼte ba pômneng potse tsye a fing ne kwite wap a. Naʼ djô she mfoʼte tchum ghôm tsye dem koung. Ké Matio 6:14, 34 ba 7:12, neng gômte ne mhente menge :

Tchum mkhè Bible menge, Yéso le ha ma mthôk mye a fing ne kwite a ?
O kwè ge mthôk bô fing ne ping kwite pô tyôʼ a ?

6. Yéso le ghe msya

Jéova be é le ha pawa bi Yéso ne ne gre medou msya. Ne ne djô taʼ foʼte, ké Markousi 5:25-34 ke djô VIDÉO le. Neng gômte ne mhente menge.

VIDÉO: Yéso yè taʼ mdjwi ye é le bo go a (5:10)

Tchum vidéo, mdjwi ye é le bo go a le be é tchente jye ge ke ?
Ke poung o ne yenge msya ?

Ké Yohané 5:36, neng gômte ne hente yenge :

Msya Yéso le “kwithè”, ke daʼte ke ne ye ne pe ?

A ke be o ji jye le ?

Boʼgwye ne potse tsye a be pou jye ne Yéso a, fe tchum mŋwaʼgne Bible mapfue mye pou khé ge Mtchoung pepoung a—Matio, Markousi, Loukasi ba Yohané. Baya mo le ne pô pye wap bve mŋwaʼgne bô a, be é ghôm she potse tsye pyeshe pô ka ghôm a ne Yéso. Pou thamte goung potse bô awè a lagne wôkpe medou potse ne vôk Yéso.

MATIO

le be dendze ne ve ŋwaʼgne é. A dagne wôkpe medou potse tsye Yéso le jiʼte bi pô a, kwaʼ ne ywe ye é le jiʼte ne Nefo Si a.
MARKOUSI

le ve ŋwaʼgne ye a be a wôk, ne mŋwaʼgne mapfue bô a. A doʼgne thate potse tsye a le tchyete a, ba potse tsye Yéso le ghe a.
LOUKASI

gôm bi pe deng paʼ priya le be mtuôdeng bi Yéso a, ba tchi paʼ Yéso le gre pou a pedjwi a.
YOHANÉ

dagne wôkpe medou potse tsye Yéso le be gômte ne, pou a mso pye pye tchuô ba she pô a. Ya bô kwite wôkpe ne jye tchi mo ye Yéso le be yu a.