Fluwa nɲɔn su nga Pɔlu klɛli Timote’n 2:1-26
2 I sɔ’n ti’n min wa,+ ɔ liɛ’n maan Klisi Zezi i aklunye dan m’ɔ yili i nglo’n, ɔ yo maan a ɲan wunmiɛn titi.
2 Kpɛkun ndɛ nga n kannin be n kleli wɔ mɔ sran kpanngban wunnin nun’n,+ fa wlɛ i be nga be ti nanwlɛfuɛ’n be sa nun naan be kusu be sa tɔ i klelɛ’n nun naan be kwla fa kle sran uflɛ.
3 Kɛ mɔ a ti Klisi Zezi i sonja kpa’n ti’n,+ maan ɲrɛnnɛn nga a wun i’n, ɔ sɔn ɔ nun.+
4 Sran ng’ɔ di sonja junman’n ɔ fɛmɛn i wun wlɛmɛn i aata dilɛ’n nun,* afin ɔ kunndɛ kɛ sran ng’ɔ fɛli i wlali sonja junman’n nun’n i klun jɔ i wun.
5 Ngowa kanlɛ nun akplowa silɛ nun bɔbɔ’n, sran kwlaa ng’ɔ kunndɛ kɛ ɔ́ ɲán akatua’n, sɛ w’a nantiman akplowa silɛ’n i mmla’m be su’n, be faman akatua’n be mɛnmɛn i.+
6 Ɔ fata kɛ fie difuɛ m’ɔ di junman kekle’n yɛ ɔ dun mmua ɲan fie’n i su ninnge mun-ɔn.
7 Bu ndɛ nga n kan’n i akunndan titi. E Min’n mán wɔ ngwlɛlɛ like kwlaa nun.
8 Maan ɔ wla kpɛn su kɛ Zezi Klisi cɛnnin nguan+ naan ɔ ti Davidi i osu’n nunfuɛ,+ kɛ nga n fa kɛn i jasin fɛ nga n bo’n nun’n sa.+
9 Jasin fɛ sɔ’n ti yɛ n su wun ɲrɛnnɛn-ɔn. Yɛ i ti yɛ b’a wla min bisua kɛ sa tɛ yofuɛ wie sa-ɔ.+ Sanngɛ Ɲanmiɛn i ndɛ’n i liɛ’n be kwlá bomɛn i kpanwun.+
10 I sɔ’n ti yɛ n jran kekle sa’n kwlaa nun’n niɔn. Be nga Ɲanmiɛn kpali be’n be ti yɛ n yo sɔ-ɔ.+ Ń yó sɔ naan Klisi Zezi i dunman nun’n be kusu be ɲan be ti, yɛ be ɲan aɲrunɲan m’ɔ su wieman le’n.
11 Ndɛ yɛ’n ti nanwlɛ: Sɛ e nin i e wuli’n, e nin i é trán nguan nun likawlɛ kusu.+
12 Sɛ e tra e awlɛn’n, e nin i é dí famiɛn likawlɛ.+ Sɛ e se kɛ e simɛn i’n, i kusu ɔ́ sé kɛ ɔ siman e wie.+
13 Sɛ e diman nanwlɛ’n, i liɛ’n ɔ di nanwlɛ. Afin ndɛ ng’ɔ kan’n, ɔ di su titi.
14 Fa ndɛ sɔ mun kpɛn be wla. Kan kle be Ɲanmiɛn ɲrun kɛ nán maan be di ndɛ’m be su utre. Afin i sɔ’n yoman sa fi ye kaan sa. Yɛle kɛ, ɔ yoman sran mɔ be tie ndɛ sɔ’m be ye.*
15 Mian ɔ ɲin naan Ɲanmiɛn klun jɔ ɔ wun. Yo junman difuɛ mɔ ɲannzuɛn kunmɛn i m’ɔ si ndɛ nanwlɛ’n i nun yiyi kpa’n.+
16 Sanngɛ kpalo ndɛ ngbɛnngbɛn mɔ be manmanman Ɲanmiɛn’n.+ Afin be yo maan sran’m be nin Ɲanmiɛn be afiɛn ti nun kɔ i ɲrun titi.
17 Yɛ be ndɛ’n ɔ trɛ ndɛndɛ kɛ kannin yɛ ɔ su didi sran kun i wunnɛn’n sa. Imene nin Filɛti be o be nun wie.+
18 Sran sɔ’m b’a yaci ndɛ nanwlɛ’n b’a fa atin uflɛ. Be waan be nga be wuli’n b’a cɛn w’a wie.+ Yɛ be su yo naan sran wie’m be yaci e Min’n i su lafilɛ.
19 Sanngɛ like nga Ɲanmiɛn wlɛli i bo ase’n, ɔ te jran kekle kpa. Yɛ ndɛ ng’ɔ klɛ su’n yɛ: “Zoova* si be nga be ti i liɛ’n,”+ kpɛkun “Be nga Zoova* i dunman’n wo be su’n,+ maan be yaci sa tɛtɛ’m be yolɛ.”
20 Awlo dan kun nun sa’n, nán sika ɔkwlɛ sɛ* nin sika sɛ ngunmin yɛ be o nun-ɔn. Sanngɛ waka sɛ nin fa sɛ be o nun wie. Be fa wie mun be yo like ng’ɔ ti kpa’n, sanngɛ be fa wie mun be yo like ng’ɔ timan kpa’n.
21 Sran kwlaa ng’ɔ fɛmɛn i wun mantanman be nga be ti kɛ sɛ kasiɛnfuɛ mun’n sa’n, ɔ́ yó kɛ sɛ* nga be fa yo like ng’ɔ ti kpa’n sa. Yɛle kɛ ɔ́ yó sanwun, yɛ i fuɛ’n fɛ́ i yó like kpa, kpɛkun ɔ́ yó kɛ like mɔ b’a fa sie kɛ bé fá yó like kwlaa ng’ɔ ti kpa’n sa.
22 I sɔ’n ti’n, wanndi ninnge nga gbanflɛn’m be konvi sɔ be’n. Sanngɛ yo sa kpa, lafi Ɲanmiɛn su, klo Ɲanmiɛn nin sran, maan a nin sran be di anuansɛ. Maan a nin be nga be awlɛn’n nun ti sanwun mɔ be lafi e Min’n su’n, be yo ninnge sɔ mun titi.
23 Asa ekun’n, kpalo akplowa silɛ mɔ be yoman sa fi ye’n,+ afin a si kɛ be kpɛ utre ba.
24 Afin e Min’n i sran’n nin utre dilɛ fataman. Sanngɛ ɔ fata kɛ ɔ nin sran’m be kwlaa be tran klanman.+ Ɔ fata kɛ ɔ si sran like kle. Yɛ sa nga be yo i’n, maan ɔ sɔn i nun.+
25 Be nga be faman ndɛ nga a kan’n su’n, kle be like wɛtɛɛ su.+ Atrɛkpa’n, Ɲanmiɛn yó maan bé káci be akunndan’n, ɔ maan bé sí ndɛ nanwlɛ’n i kpa,+
26 yɛ bé wún sa wlɛ, kpɛkun bé fló Suɛn Tɔnfuɛ’n i aya’n nun. Afin ɔ trali be naan be yo i klun sa.+
Ja ngua lɔ ndɛ mun
^ Be kwla se ekun kɛ “ninnge nga sran’m be yo be cɛn kwlakwla’n nun.”
^ Annzɛ “ɔ saci be.”
^ Annzɛ “kpongbo.”
^ Annzɛ “kpongbo.”
