Afuɛ kwlakwla’n, mɛn wunmuan’n nun’n Zoova i Lalofuɛ mun nin sran miliɔn kpanngban be yia be kle kɛ be wla kpɛn Zezi i wie’n su, kɛ nga i bɔbɔ fa seli be kɛ be yo’n sa. (Liki 22:19) Aɲia sɔ’n uka e naan y’a wun klɔ sran’m be ti mɔ Zezi i nguan’n kpɔli’n i cinnjin m’ɔ ti’n i wlɛ. Asa’n, ɔ kle e wafa nga e kwla ɲan tɛ ng’ɔ yili’n i su ye dɔ nga su’n ɔ nin e ɲrun lɔ’n.—Zan 3:16.

 ?Sɛ afuɛ nga’n a kwla trannin e Wla Kpɛnlɛ Aɲia’n i bo annzɛ w’a kwlá trɛnmɛn i bo bɔbɔ’n, wafa sɛ yɛ a kwla ɲan tɛ nga Zezi fɛli i wun yili’n i su ye-ɔ? Zezi seli kɛ ɔ fata kɛ e yo ninnge cinnjin nɲɔn:

1.  1. Suan Ɲanmiɛn nin Zezi be su like. Cɛn kun mɔ Zezi srɛ́ i Si m’ɔ o ɲanmiɛn su lɔ’n, ɔ seli kɛ: “Kɛ ɔ ko yo naan b’a ɲan nguan m’ɔ leman awieliɛ’n, ɔ ti cinnjin kɛ be si wɔ mɔ ɔ kunngba cɛ yɛ a ti Ɲanmiɛn Kpli’n, ɔ nin sran nga a sunmɛnnin i’n mɔ yɛle Zezi Klisi’n.”—Zan 17:3.

2.  2. Nian like nga a suan’n su nanti. Zezi kleli kɛ ɔ ti cinnjin kɛ e nanti like ng’ɔ kleli e’n su. I wie yɛle kɛ, kɛ ɔ́ kán Ɲanmiɛn ndɛ Oka’n su m’ɔ́ wá gúɛ i bo’n, ɔ yoli be kwlaa nga be ‘ti i nuan ndɛ’n, mɔ be fa su’n’ be mo. (Liki 6:46-48) Cɛn kun ekun liɛ’n, ɔ seli kɛ: “Sɛ amun si ninnge sɔ mun naan amun yo be’n, amun liɛ su ti ye.”—Zan 13:17.

 ?A kunndɛ kɛ á súan Ɲanmiɛn nin Zezi be su like kpa trá laa’n? ?A kunndɛ kɛ á sí wafa trele nga a kwla nian like nga a suan’n su nanti’n? Ninnge nga be kwla uka wɔ’n, be nun wie mun yɛ.

 Biblu’n nun like suanlɛ sɔ mɔ be demɛn i ti sika’n, ɔ ukali sran kpanngban naan b’a si like nga Biblu’n kle’n naan kusu b’a nanti su be mɛn dilɛ’n nun.

•   Kɔ e ɛntɛnɛti lika ng’ɔ kan Biblu’n nun like suanlɛ i ndɛ’n i su naan w’a si i su ndɛ uflɛ wie mun ekun.

•   Nian video m’ɔ suan Mo nin Biblu’n nun like suanlɛ’n i bo bolɛ. I liɛ’n, á wún wafa nga Zoova i Lalofuɛ’m be kle sran’m be Biblu’n nun like’n.

 Lemɔcuɛ kun nun’n, Zoova i Lalofuɛ’m be yo aɲia kpɛ nɲɔn, be Ɲanmiɛn sulɛ sua mɔ be flɛ be kɛ Ɲanmiɛn Sielɛ Sua’n be nun. Aɲia sɔ’m be bo’n, e koko Biblu’n nun ndɛ’n nin wafa nga e kwla nanti su e mɛn dilɛ’n nun’n be su yalɛ.

 Sran ngba kwla tran aɲia sɔ’m be bo. Kannzɛ bɔbɔ a timan Zoova i Lalofuɛ’n, a kwla trɛn i bo wie. Lika wie’m be nun’n, e yo aɲia sɔ mun Ɲanmiɛn Sielɛ Sua’n nun ɔ nin ɛntɛnɛti su.

•   Nian video m’ɔ suan ?Ngue yɛ be yo i Ɲanmiɛn Sielɛ Sua’n nun lɔ-ɔ? I liɛ’n, á sí like nga e yo i e aɲia’m be bo’n.

•   Kunndɛ aɲia yowlɛ kun m’ɔ o ɔ tranwlɛ’n i wun lɛ’n. Kɔ ɛntɛnɛti lika m’ɔ suan Zoova i Lalofuɛ’m be asɔnun aɲia mun i nun lɔ naan w’a wun i.

 Ndɛ nin video kpanngban mɔ be o e ɛntɛnɛti adrɛsi nga su’n, be kwla uka wɔ naan w’a si ninnge nga Zezi kleli be’n ɔ nin sa nga ti yɛ i wie’n ti cinnjin’n.

 I wie yɛle kɛ, sɛ a kunndɛ kɛ á sí wafa nga sran kunngba i wie’n kwla yo sran miliɔn kpanngban be ye’n, kanngan ndɛ “?Wafa sɛ yɛ Zezi de e-ɔ?” ɔ nin “?Ngue ti yɛ Zezi wunnin ɲrɛnnɛn m’ɔ wuli ɔ?” be nun. Annzɛ kusu nian video ng’ɔ suan ?Ngue ti yɛ Zezi wuli ɔ?