SIƐ NIN NIƐN’M BE LIƐ
6: An tu be fɔ
?I BO’N YƐLE BENIN?
Kɛ be tu sran kun i fɔ’n, be kle i like annzɛ be kle i atin ng’ɔ fata kɛ ɔ fa su’n. Kɛ ba kun yo sa tɛ’n, i si nin i nin be ukɛ i naan ɔ kaci i sa. Blɛ sunman’n, be kle i like naan ɔ fa ajalɛ nga be ti kpa’n.
?NGUE TI YƐ I SƆ’N TI CINNJIN-ƆN?
Siɛn’n, siɛ nin niɛn wie’m be tuman be mma’m be fɔ kun. Afin, be bu i kɛ sɛ be yo sɔ’n, ba’m be su buman be wun sran. Sanngɛ, siɛ nin niɛn nga be ti akunndanfuɛ’n, be kpɛ mmla wie mun naan be mma’m be nanti su, yɛ be kle be like.
“Ɔ fata kɛ e kle ba mun ninnge ng’ɔ fata kɛ be yo’n, ɔ nin ng’ɔ fataman kɛ be yo’n. I liɛ’n, kɛ bé yó kaklaka’n, bé fá ngwlɛlɛ nánti. Sanngɛ sɛ y’a tuman be fɔ’n, bé sáci.”—Pamela.
LIKE NGA AMUN KWLA YO’N
Mmla nga amun kpɛli’n, amun yo i nuan su sa. Sɛ amun mma’m be nantiman mmla nga amun kpɛli be’n su’n, fɔ nga amun seli kɛ amún fá tú be’n, maan amun fa tu be. Sɛ kusu be nanti su’n, maan amun yo be mo.
“Andɛ sran’m be ɲin yiman sran. Ɔ maan, kɛ min mma’m be yo like nga n se be kɛ be yo’n, n yo be mo titi. Kɛ mɔ n yo sɔ’n ti’n, blɛ kwlaa nga n tu be fɔ’n, be sɔ nun klanman.”—Klistinin.
NDƐ NGA BIBLU’N KAN’N: “Like nga sran kun lua’n, yɛ ɔ́ tí-ɔ.”—Galasifuɛ Mun 6:7.
An tu be fɔ kɛ ɔ nin i fata’n sa. Kɛ amún tú amun wa’n i fɔ’n, amun bu sa ng’ɔ yoli’n, ɔ nin i afuɛ’n, be akunndan. I liɛ’n, amun kwla tu i fɔ kɛ ɔ nin i fata’n sa. Sɛ fɔ nga amun tu i’n ɔ nin sa ng’ɔ yoli’n be kɔ likawlɛ’n, i sɔ’n yó i ye. I wie yɛle kɛ, sɛ amun sieli telefɔnun i su mmla naan w’a nantiman su’n, amun kwla de i telefɔnun’n le nɲɔn kun. Sɛ kusu sa ng’ɔ yoli’n, ɔ timan tɛ dan’n, nán amun fa yo ndɛ.
“Kɛ min wa’n yo sa tɛ wie’n, n usa min wun sɛ i ɲinfu yɛ ɔ yoli o, annzɛ kusu fɔnlɛ yɛ ɔ fɔnnin o. Sɛ ba’n le nzuɛn tɛ wie’n, ɔ fata kɛ be tu i fɔ naan ɔ wlɛ i ase. Sanngɛ, sɛ fɔnlɛ yɛ ɔ fɔnnin’n, e kwla kan kle i kɛ ɔ fɔnnin.”—Wɛndɛli.
NDƐ NGA BIBLU’N KAN’N: “Siɛ mun, nán amun fɔkɔ amun mma’m be awlɛn naan be wla bo.”—Kolɔsufuɛ Mun 3:21.
An tu be fɔ klolɛ su. Kɛ ba’m be wun kɛ be si nin be nin’m be klo be ti yɛ be tu be fɔ’n, be sɔ fɔ nga be tu be’n nun klanman.
“Kɛ e wa yasua’n yoli sa wie mɔ be timan su’n, e seli i kɛ ajalɛ kpa ng’ɔ fali be laa’n, be yo e fɛ. Kpɛkun, e seli i kɛ nán fɔnlɛ ng’ɔ fɔnnin’n ti yɛ é bú i sran tɛ-ɔ. Sanngɛ, sɛ ɔ fa afɔtuɛ nga e mɛn i’n su, é úkɛ i.”—Daniɛli.
NDƐ NGA BIBLU’N KAN’N: “Sran ng’ɔ klo sran’n, ɔ trɛ i awlɛn, kpɛkun ɔ yo sran ye.”—1 Korɛntifuɛ Mun 13:4.
