1. Aja’n

Aja’n nin like ng’ɔ fata kɛ be yo naan b’a di aklunjɔɛ aja’n nun’n, i su ndɛ nga sran’m be kan’n ɔ ti fanunfanun.

LIKE NGA NDƐ SƆ’N KLE E’N: Aja’n fin Ɲanmiɛn. Ɔ maan ɔ si like ng’ɔ fata kɛ yasua kun nin i yi be yo naan b’a di aklunjɔɛ’n. (Marki 10:​6-9) Sɛ yasua kun nin i yi be kunndɛ kɛ bé dí aklunjɔɛ be aja’n nun’n, ɔ fataman kɛ be fa be ɲin sie i like nga sran kun kwla ɲɛn i’n su. Sanngɛ ɔ fata kɛ be fa be ɲin be sie i like nga sran kun kwla yo naan be aja’n w’a taka kpa’n i su. Kɛ yasua kun klo i yi’n, be wun i sɔ liɛ’n wafa ng’ɔ niɛn i lika’n i nun. Kusu kɛ bla kun i ɲin yi i wun’n, be wun i sɔ liɛ’n wafa ng’ɔ kan ndɛ kle i’n ɔ nin i ayeliɛ’n nun.

BIBLU’N UKA E: Be flɛ bian kun kɛ Kuangu yɛ be flɛ i yi’n kɛ Ti. Be fin Viɛtinamun. Be diman aklunjɔɛ be aja’n nun. Yɛ be buli i kɛ be lemɛn i yowlɛ. Blɛ sunman’n Kuangu yomɛn i yi’n i cɛcɛ. Ɔ seli kɛ: “Wafa nga Ti i wun yo i’n min ndɛ nunman nun. Yɛ blɛ sunman’n n guɛ i ɲin ase.” Ti kunndɛli kɛ be yra. Ɔ seli kɛ: “N seli min wun kɛ n su kwlá lafimɛn i su kun naan min ɲin su kwlá yimɛn i kun.”

I sin’n, Kuangu nin Ti be suannin Biblu’n nun like. Kpɛkun be wunnin wafa nga be kwla nanti aja’n i su ndɛ nga Efɛzifuɛ Mun 5:33 kan’n su’n. Kuangu seli kɛ: “Ndɛ mma sɔ’n ti’n n wunnin i wlɛ kɛ ɔ fata kɛ n yo min yi’n i cɛcɛ. Yɛ n wunnin kɛ ɔ fata kɛ n yo maan Ti wun i wlɛ kɛ n klo i. N wunnin kɛ ɔ fata kɛ n yo naan ɔ ɲan ninnge nga i sa mian be wun’n yɛ n yo naan i wla gua ase. Kɛ n yoli sɔ’n ɔ wa kloli min yɛ i ɲin yili min.” Ti kusu seli kɛ: “Kɛ ń mían min ɲin ń nánti ndɛ ng’ɔ o Efɛzifuɛ Mun 5:33 nun’n su’n, mɔ ń klé min wun’n kɛ min ɲin yi i’n, nn i kusu yó naan n wun i wlɛ kɛ ɔ klo min, naan ɔ sasa min, naan ɔ kunndɛ kɛ min wla gua ase.”

 2. Wafa ng’ɔ fata kɛ e nin e wiengu mun e tran’n

Kpɛ sunman’n, sran wie’m be yo be nga be wunnɛn kplo’n, annzɛ be nvle’n, annzɛ be sran waka’n, annzɛ be Ɲanmiɛn sulɛ wafa’n ɔ nin be liɛ’n timan kun’n, annzɛ be nga be kunndɛ be wiengu bla’n annzɛ be wiengu yasua’n be finfin.

LIKE NGA NDƐ SƆ’N KLE E’N: Biblu’n seman kɛ ɔ fata kɛ e kpɔ be nga be wunnɛn kplo’n annzɛ be finwlɛ’n ɔ nin e liɛ’n timan kun’n. Asa’n ɔ seman kɛ ɔ fata kɛ e kpɔ be nga be kunndɛ be wiengu yasua annzɛ be wiengu bla’n. Sanngɛ ɔ se kɛ e bu sran’m be kwlaa be sran. Sɛ be le sika annzɛ be leman sika-o, sɛ be wunnɛn kplo annzɛ be nvle’n ti sɛ-o, ɔ fata kɛ e bu be sran. (Sa Nga Be Yoli’n 10:34) Kannzɛ Ɲanmiɛn sulɛ wafa nga be o nun’n ɔ nin wafa nga be yo be ninnge mun’n ɔ timan e liɛ’n su’n, sanngɛ maan e yo be ye yɛ e bu be sran.—Matie 7:12.

BIBLU’N UKA E: Daniɛli i bakan nun’n, be kleli i kɛ be nga be fin Azi mɛn’n nun’n be timan kpa naan be kwla yo i nvle’n nunfuɛ’m be abɔlɛ. Ɔ maan ɔ wa kpɔli be kwlaa nga be fin Azi mɛn’n nun’n, yɛ blɛ sunman’n ɔ kpɛ be nzowa nzra nun bɔbɔ. Daniɛli seli kɛ: “N klo min nvle’n i dan i ti yɛ n yoli sɔ-ɔ. M’an bumɛn i kɛ akunndan nga n bu’n nin like nga n yo’n ɔ ti tɛ.”

I sin’n Daniɛli w’a suannin Biblu’n nun like. Ɔ seli kɛ: “N wunnin i wlɛ kɛ ɔ fata kɛ n kaci akunndan nga n bu’n, naan n bu sran’m be kɛ Ɲanmiɛn fa bu be’n sa. Yɛle kɛ kannzɛ e finwlɛ’n ti sɛ ti sɛ’n e kwlaa e ti kun.” Siɛn’n kɛ ɔ nin sran’m be yia nun’n be wun akunndan ng’ɔ bu’n, ɔ kɛnnin i ndɛ. I waan: “Blɛ sunman’n n buman lika nga be fin’n i akunndan bɔbɔ. N klo sran kwlaa, yɛ min janvuɛ’m be fin mɛn’n i bue kwlaa su.”

 3. Sika

Sran kpanngban be fa sika kunndɛlɛ’n be cici be ti. Afin be bu i kɛ sɛ be ɲan sika kpanngban’n bé dí aklunjɔɛ yɛ be liɛ yó ye.

LIKE NGA NDƐ SƆ’N KLE E’N: E mian sika wun. Sanngɛ sika’n kwlá manman e aklunjɔɛ yɛ ɔ kwlá yoman naan cɛn wie lele’n, e liɛ w’a yo ye. (Ɲanndra Mun 18:11; 23:​4, 5) Sanngɛ sɛ e kunndɛ kɛ é dí aklunjɔɛ naan cɛn wie lele’n e liɛ yo ye sakpa’n, ɔ fata kɛ e nanti ndɛ ng’ɔ o Biblu’n nun’n su.—1 Timote 6:​17-19.

BIBLU’N UKA E: Be flɛ bian kun kɛ Kardo. Ɔ tran Ɛndonezi. Ɔ fali sika kunndɛlɛ’n cicili i ti. Ɔ seli kɛ: “Ninnge nga sran kpanngban be kunndɛ kɛ bé ɲán be’n, n ɲannin be. N tuli ajalɛ n wɔli lika kwlaa nga n klo’n. N toli ninnge kpakpa mun nin loto kpakpa mun nin sua dandan mun.” Sanngɛ i sika’n w’a cɛmɛn i sa nun. Ɔ seli kɛ: “Be wuali min. Ɔ maan sika nga n fali afuɛ kpanngban n kunndɛli’n, i kwlaa tuli anunman. N kleli min wun yalɛ n kunndɛli sika lele. Sanngɛ i kwlaa sɔ’n yoli afɛ ngbɛn.”

I sin’n Kardo nantili sika kunndɛlɛ’n i su ndɛ nga Biblu’n kan’n su. W’a faman sika kunndɛlɛ’n w’a cicimɛn i ti kun. Sanngɛ ninnge nga i sa mian be wun sakpa’n yɛ be kunndɛlɛ’n yoli i cinnjin-ɔn. Ɔ seli kɛ: “Siɛn’n m’an ɲan aɲanbeun like kpafuɛ’n, afin e nin Ɲanmiɛn e afiɛn mantan. Asa’n n di aklunjɔɛ yɛ kɔnguɛ’n n lafi kpa.”

 4. Bla nin bian nna

Bla nin bian nna’n i su akunndan nga sran’m be bu’n ɔ sɔnnin.

LIKE NGA NDƐ SƆ’N KLE E’N: Bla nin bian nna’n i su ndɛ nga Biblu’n kan’n, ɔ kle kɛ nán like kwlaa yɛ e le atin e yo-ɔ. Kɛ Biblu’n kan bla nin bian kunndɛlɛ sukusuku’n nin i wunsu ɲannzuɛn sa’m be ndɛ’n, i wie yɛle be wiengu bo bla annzɛ bian kunndɛlɛ’n, nin tekle bolɛ’n, nin yasua nin bla nga b’a jaman awa ja su mɔ be si sua’n, nin be wiengu yasua annzɛ be wiengu bla mɔ be nin be si sua’n, ɔ nin be nga be nin nnɛn’m be la’n. (1 Korɛntifuɛ Mun 6:​9, 10) Bla nin bian nna’n ti like kun mɔ Ɲanmiɛn fa cɛli klɔ sran mun-ɔn. Yɛ ɔ kunndɛ kɛ yasua kun nin bla kun mɔ b’a ja’n yɛ be si sua-ɔ.—Ɲanndra Mun 5:​18, 19.

BIBLU’N UKA E: Be flɛ bla kun kɛ Kaili. Ɔ tran Ɔstrali. Ɔ seli kɛ: “Kɛ mɔ n leman bian’n n buli i kɛ sɛ e nin yasua e si sua’n, ń wún i wlɛ kɛ sran klo min yɛ min wun kpája min. Sanngɛ w’a yoman sɔ. Min wla w’a guaman ase yɛ min awlɛn kpɔtɔli min klun.”

I sin’n Kaili suannin bla nin bian nna’n i su ndɛ nga Biblu’n kan’n i su like yɛ ɔ nantili su. Ɔ seli kɛ: “Ɲanmiɛn i mmla’m be sasa e naan sa yalɛ w’a ɲanman e. Kɛ mɔ siɛn’n n yo ninnge mun kɛ nga Zoova fa klo’n sa’n ti’n, min wla gua ase yɛ n wun i wlɛ kɛ sran klo min. Biblu’n nun ndɛ mɔ n nantili su’n ti’n m’an ɲanman awlɛn ba ya.”