Maan E Suan Ɲanmiɛn Ndɛ’n Nun Like

?Wan yɛle Zezi Klist?

Ndɛ akpasua nga tɛ kosan wie mɔ atrɛkpa’n amun fa usali amun wun’n be su. Yɛ ɔ kle e Biblu’n i bue nga e kwla kanngan nun naan y’a wun kosan sɔ’m be su tɛlɛ’n. Zoova i Lalofuɛ’m be klo kɛ bé yíyí ndɛ sɔ’m be nun klé amun.

1. ?Wan yɛle Zezi Klist?

Zezi timan kɛ klɔ sran nga’m be sa. I liɛ’n, ka naan b’a wu i asiɛ’n su wa’n, ɔ ti aolia nun sran ɲanmiɛn su lɔ. (Zan 8:23) I yɛ ɔ ti ninnge nga Zoova yili be’n be nun klikli’n niɔn. Yɛ i sa trannin ninnge onga’m be kwlaa be yilɛ’n nun. I kunngba cɛ yɛ Ɲanmiɛn bɔbɔ yili i trele sa ɔ. I sɔ’n ti’n be flɛ i kɛ Ɲanmiɛn i Wa “kunngba’n.” Zezi ijɔli Ɲanmiɛn i nuan, ɔ maan be flɛli i ekun kɛ “Ndɛ’n.”—Zan 1:1-3, 14; an kanngan Nyanndra Mun 8:22, 23, 30 nin Kolɔsfuɛ Mun 1:15, 16 nun.

2. ?Ngue ti yɛ Zezi bali asiɛ’n su wa ɔ?

Ɲanmiɛn sunmɛnnin i Wa’n asiɛ’n su wa. Ɔ fɛli i nguan’n wlɛli Zuifu talua kun m’ɔ nin a siman bian’n i klun. Be flɛ i Mali. Ɔ maan nán klɔ sran yɛ ɔ ti Zezi i si ɔ. (Lik 1:30-35) Zezi bali asiɛ’n su wa kɛ (1) ɔ́ wá klé e Ɲanmiɛn i su ndɛ nanwlɛ’n, (2) naan ɔ́ klé e Ɲanmiɛn i klun sa’n i yolɛ, kpɛkun (3) ɔ́ wá fɛ́ i nguan mɔ fɔ nunman nun’n fá “kpɔ́” e ti.—An kanngan Matie 20:28 nin Zan 18:37 nun.

3. ?Ngue ti yɛ ɔ fata kɛ sran kun kpɔ e ti ɔ?

Sran kun i ti kpɔlɛ’n yɛle kalɛ nga be tannin naan b’a de sran sɔ’n sa kun nun’n. I nun mɔ Ɲanmiɛn yili klɔ sran’n, w’a sunnzunman kɛ ɔ yo oke annzɛ ɔ wu. ?Wafa sɛ yɛ e si sɔ ɔ? Ɲanmiɛn seli yasua klikli’n mɔ be flɛ i Adam’n i kɛ sɛ ɔ yo like nga Biblu’n flɛ i kɛ sa tɛ’n, ɔ́ wú. Sɛ ɔ ti kɛ Adam w’a yoman sa tɛ’n, nn w’a wuman le. Kannzɛ bɔbɔ Adam dili afuɛ ya kpanngban asiɛ’n su’n, sanngɛ kɛ ɔ fin cɛn m’ɔ yoli ɲin kekle Ɲanmiɛn su’n, yɛ wie’n wluli i nun ɔn. (Bo Bolɛ 2:16, 17; 5:5) Adam i sa tɛ’n nin i bo nzuɛn mɔ yɛle wie’n, be sɛli i osu’n nunfuɛ’m be kwlaa. Ɔ maan Adam ti’n wie’n “bali” mɛn’n nun. I sɔ’n ti yɛ ɔ fata kɛ sran kun kpɔ e ti ɔ.—An kanngan Rɔmfuɛ Mun 5:12 nin 6:23 nun.

 4. ?Ngue ti yɛ Zezi wuli ɔ?

?Wan yɛ ɔ kwla yi e ti kpɔlɛ tɛ’n naan w’a de e wie’n i sa nun ɔn? Sa tɛ nga e yo’n i akatua’n yɛle wulɛ mɔ e wu’n. Kɛ mɔ fɔ o e nun’n ti’n, e kwlá deman sran fi.—An kanngan Jue Mun 49:8-10 nun.

Kɛ mɔ nán klɔ sran yɛ ɔ ti Zezi i si’n ti’n, fɔ’n w’a sɛmɛn i. Ɔ maan sɛ ɔ wuli’n, nɛ́n i bɔbɔ i sa tɛ’m be ti ɔ. Sanngɛ sran uflɛ’m be liɛ’m be ti ɔ. Klolɛ dan mɔ Ɲanmiɛn klo klɔ sran mun’n i ti yɛ ɔ sunmɛnnin i Wa’n asiɛ’n su wa kɛ ɔ w’a wu e ti ɔ. Zezi kusu kleli kɛ ɔ klo e wie. Yɛle kɛ ɔ yoli like nga i Si waan ɔ yo’n, yɛ e sa tɛ’m be ti’n ɔ fɛli i nguan’n mannin.—An kanngan Zan 3:16 nin Rɔmfuɛ Mun 5:18, 19 nun.

5. ?Ngue yɛ Zezi su yo i dɔ nga su ɔ?

Zezi yoli tukpacifuɛ’m be juejue, ɔ cɛnnin be nga be wuli’n yɛ ɔ fɛli i wun mannin naan ɔ́ dé sran mun sa tɛ’n nin wie’n be sa nun. Ɔ yoli i kwlaa ngalɛ’n fa yili like ng’ɔ́ wá yó mán sran kpa mun’n i nglo. (Lik 18:35-42; Zan 5:28, 29) Kɛ Zezi wuli’n, Ɲanmiɛn yoli maan ɔ kacili aolia nun sran ekun. (1 Piɛr 3:18) I sin’n, ɔ ko trannin Ɲanmiɛn i fama su lele naan Zoova mɛn i kwlalɛ naan w’a di famiɛn asiɛ wunmuan’n su. (Ebre Mun 10:12, 13) Kɛ é sé yɛ’n, Zezi su di famiɛn ɲanmiɛn su lɔ. Kpɛkun i sɔnnzɔnfuɛ nga be o asiɛ’n su wa’n, be su bo jasin fɛ’n asiɛ wunmuan’n su.—An kanngan Daniɛl 7:13, 14 nin Matie 24:14 nun.

Ɔ cɛ kaan sa’n, Zezi m’ɔ ti famiɛn’n ɔ́ núnnún ɲrɛnnɛn’n ɔ nin be kwlaa nga be fa ɲrɛnnɛn’n yi sran’m be su’n. Sran akpinngbin kpanngban mɔ be lafi Zezi su’n, mɔ be yo like nga i waan be yo’n, bé dí fɛ mɛn klanman’n nun asiɛ’n su wa.—An kanngan Jue Mun 37:9-11 nun.

Sɛ amun kunndɛ kɛ amún sí nun ekun’n, amun klwa nian fluwa ?Ngue like yɛ Biblu’n kle i sakpasakpa ɔ? i i ndɛ tre 4 nun. Zoova i Lalofuɛ mun yɛ be yili ɔ.

[Foto, bue 11]

Sran akpinngbin kpanngban mɔ be lafi Zezi su’n, mɔ be yo like nga i waan be yo’n, bé dí fɛ mɛn klanman’n nun asiɛ’n su wa.