Like kun mɔ sran’m be fa sie e nzɔliɛ’n yɛle kɛ e kan Ɲanmiɛn ndɛ’n e sin. E kɛn i awloawlo’m be nun nin gua su. Nanwlɛ, lika kwlaa nga e to sran lɛ’n, e kan Ɲanmiɛn ndɛ’n. ?Ngue ti yɛ e yo sɔ ɔ?

E mɔ e ti Zoova i Lalofuɛ’n, e manman Ɲanmiɛn naan sran’m be si i dunman’n. (Ebre Mun 13:15) Asa ekun’n, e fa ndɛ nga Zezi Klist kannin’n su. Ɔ seli kɛ: “An wɔ ko kle nvle-nvle’n kwlaa be like maan be kaci n sɔnnzɔnfuɛ. [...] Yɛ like kwlaa nga n kleli amun’n, amun kusu an kle be maan be fa su.”—Matie 28:19, 20.

Like nga ti yɛ e kan Ɲanmiɛn ndɛ’n, i wie ekun yɛle kɛ e klo e wiengu. (Matie 22:39) E si kɛ sran’m be dan lika be o Ɲanmiɛn sulɛ wafawafa’m be nun. Yɛ e si kɛ, sran ngba kloman Ɲanmiɛn ndɛ nga e kan’n. Sanngɛ, e si kɛ Ɲanmiɛn ndɛ’n man nguan. I sɔ’n ti, e nian Klistfuɛ klikli’m be ajalɛ’n su. Yɛle kɛ, e “yaci-man Jésus-Krist jasin fɛ’n i bolɛ nin i klelɛ.”—Sa Nga Be Yoli’n 5:41, 42.

Be nga be kanngan e fluwa’m be nun’n, be nun sunman be timan Zoova i Lalofuɛ. Yɛ be nga e kle be Biblu’n nun like’n, be nun sunman be o Ɲanmiɛn sulɛ wafawafa’m be nun. Sanngɛ, kɛ e kle be like’n ɔ yo be fɛ.

Atrɛkpa’n, a usa ɔ wun kosan wie mun ekun. Sɛ ɔ ti sɔ’n:

• Usa Zoova i Lalofuɛ mun.

• Kɔ ɛntɛnɛti adrɛsi www.mt1130.com/bci su.

• Kɔ e aɲia’m be bo. Sran kwlakwla be kwla tran e aɲia’m be bo. Yɛ be yiman sika.