Cɛcɛ, Ɲanmiɛn sulɛ wafa’m be kwlaa be timan kun. Biblu’n kan Ɲanmiɛn sulɛ wafa kpanngban mɔ Ɲanmiɛn klun jɔman be su’n be ndɛ. Be kwla bu be nun akpasua nɲɔn.

Akpasua 1: Be nga be sɔ amuin’n

 Biblu’n se kɛ amuin sɔlɛ’n ti “finfin like,” yɛ “ɔ yoman sa fi ye.” (Zeremin 10:3-5; 16:19, 20) Zoova a wlali Izraɛli nvle’n i su nun kpa kɛ: “Nán su ɲanmiɛn uflɛ fi, saan min kunngba cɛ.” (Ezipti Lɔ Tulɛ 20:3, 23; 23:24) Yɛ blɛ kwlaa nga Izraɛlifuɛ’m be sɔli amuin’n, “Zoova fali be wun ya dan kpa.”—Kalɛ 25:3; Sanwun Yolɛ 20:2; Jɔlɛ Difuɛ Mun 2:13, 14.

 Lele nin andɛ’n, Ɲanmiɛn te bu amuin sɔ mɔ ‘sran’m be flɛ be ɲanmiɛn’n,’ be sɔlɛ’n i like tɛ. (1 Korɛntifuɛ Mun 8:5, 6; Galasifuɛ Mun 4:8) Ɔ se be nga be kunndɛ kɛ bé sú i’n be kɛ nán maan be nin be nga be sumɛn i kɛ ng’ɔ nin i fata’n sa’n be san nun kun. I waan: “Amun jaso be afiɛn, yɛ nán amun fa amun wun mantan be.” (2 Korɛntifuɛ Mun 6:14-17) ?Sɛ ɔ ti kɛ Ɲanmiɛn sulɛ wafa’m be kwlaa be ti kun naan be kle Ɲanmiɛn i atin’n, nn Ɲanmiɛn sé sɔ?

Akpasua 2: Be nga be suman Ɲanmiɛn kɛ ng’ɔ fa klo’n sa’n

 Blɛ wie nun’n, Izraɛlifuɛ’m be fali amuin sɔlɛ’n nun ninnge wie mun fa wlali Ɲanmiɛn i sulɛ’n nun. Sanngɛ Zoova w’a kplinman su le kɛ be fa amuin sɔlɛ’n be sɛnngɛn i sulɛ kpafuɛ’n nun. (Ezipti Lɔ Tulɛ 32:8; Mmla’n 12:2-4) Zezi buli i blɛ su Ɲanmiɛn sulɛ wafa’m be su kpɛnngbɛn’m be fɔ. Afin wafa nga be su Ɲanmiɛn’n ɔ timan su. Be yo kɛ be su Ɲanmiɛn kpa sa. Sanngɛ be ti gblɛfuɛ, afin be “kpalo Moizi Mmla’n i nun ndɛ cinnjin kpafuɛ mun. Ndɛ sɔ mun yɛle sa i nuan su sɛsɛ yolɛ’n, aunnvɔɛ silɛ’n, ɔ nin nantilɛ mɔ be nin Ɲanmiɛn be nanti titi’n.”—Matie 23:23

 Andɛ kusu’n, Ɲanmiɛn sulɛ wafa ng’ɔ kle sran’m be Ɲanmiɛn i atin’n, yɛle ng’ɔ kle ndɛ nanwlɛ’n. Ndɛ nanwlɛ sɔ’n wo Biblu’n nun. (Zan 4:24; 17:17; 2 Timote 3:16, 17) Ɲanmiɛn sulɛ wafa kwlaa ng’ɔ kle ndɛ kun m’ɔ nin Biblu’n nun ndɛ’n be sansan be wun’n, ɔ fa sran mun kɔ Ɲanmiɛn wun mmua. Ndɛ kpanngban mɔ sran’m be bu i kɛ be fin Biblu’n nun’n, be finman Biblu’n nun sakpa. Sanngɛ be fin be nga be sɔ amuin lalafuɛ nun’n. I wie yɛle kɛ, be se kɛ Ɲanmiɛn ti atre nsan, be wu be o lɔ, yɛ Ɲanmiɛn yra sran mun sin fɛtɛ’n nun. Ɲanmiɛn sulɛ wafa kwlaa ng’ɔ kle i sɔ like’n, ɔ ti “ngbɛn.” Afin ɔ fa klɔ sran’m be mmla’n kaci Ɲanmiɛn i mmla’n.—Marki 7:7, 8.

 Ɲanmiɛn kpɔ Ɲanmiɛn sulɛ wafa nga be ti gblɛfuɛ’n. (Titi 1:16) Sɛ Ɲanmiɛn sulɛ wafa kun waan ɔ́ úka sran mun naan b’a fa be wun b’a mantan Ɲanmiɛn’n, ɔ fata kɛ ɔ uka be naan be nanti Ɲanmiɛn mmla’n su cɛn kwlakwla. Ɔ fataman kɛ ɔ ka be Ɲanmiɛn sulɛ’n nun ninnge wie’m be klelɛ’n su ngunmin. I wie yɛle kɛ Biblu’n se kɛ: “Sran kwlaa ng’ɔ se i wun kɛ ɔ ti Ɲanmiɛn sufuɛ mɔ sanngɛ ɔ niɛnmɛn i nuan’n su’n, ɔ su lɛkɛ i bɔbɔ wun, kpɛkun i Ɲanmiɛn sulɛ’n ti ngbɛn. Ɲanmiɛn sulɛ m’ɔ ti kpa mɔ fiɛn kaan sa nunmɛn i wun e Si Ɲanmiɛn i ɲrun’n, yɛle aika ba nin angbeti bla mɔ ɲrɛnnɛn o be su’n be lika nianlɛ, ɔ nin be wun su mɔ be niɛn i titi naan b’a yoman mɛn’n nun sa tɛtɛ’m be nun wie fi’n.” (Zaki 1:26, 27) Biblu nga be flɛ i kɛ La Bible du roi Jacques i nun’n, kɛ bé kán Ɲanmiɛn sulɛ mɔ fiɛn nin gblɛ nunman nun’n i ndɛ’n, be seli kɛ “Ɲanmiɛn sulɛ ng’ɔ ti sanwun’n.”