Kɛ nvle sunman nun sa’n, be nga b’a yo oke Ɔstrali lɔ’n be sɔnnin. Be fa be nun wie’m be kɔ kan be nga b’a yo oke’n be o lɔ mɔ dɔɔtrɔ’m be nian be lika’n.

Ɔ ti su kɛ be lika nianlɛ sɔ’n yo be ye kpa. Sanngɛ be mian ninnge uflɛ wie’m be wun ekun. Ɔ ju wie’n be ɲrun yo be koun, yɛ ɔ yo be kɛ be ngunmin yɛ be o lɛ sa naan be leman sran ukaman be. Lemɔcuɛ kwlaa nun’n, Zoova i Lalofuɛ wie’m be kɔ lika sɔ’m be nun nɲɔn be nun be ko nian sran sɔ’m be osu naan bé cící be wla yɛ bé fɔ́nvɔ be. Lika sɔ’m be nun kun o Pɔɔtilandi klɔ’n su yɛ kun o Viktoria klɔ’n. Klɔ sɔ’m be o Ɔstrali lɔ.

Zoova i Lalofuɛ nga be o Pɔɔtilandi nin Viktoria klɔ’m be su’n be nin oke sɔ’m be nun wie’m be yia be koko Biblu’n nun ndɛ wie’m be su yalɛ. I wie yɛle sa cinnjin wie mɔ be juli Zezi su’n. Jezɔnun seli kɛ: “E nin be e kanngan Biblu’n i bue kan kun nun kpɛkun e koko su yalɛ.” Kɛ mɔ sran oke sɔ’m be nun sunman be kpinndinman’n ti’n Zoova i Lalofuɛ’m be kan kle sran sɔ’m be kɛ Ɲanmiɛn waan ɔ́ wá yó maan tukpacɛ’n nin wie’n be su tranman lɛ kun. Ndɛ sɔ’n cici be wla dan.

Be flɛ Zoova i Lalofuɛ kun kɛ Toni. Ɔ seli kɛ: “I uflɛ nun’n e koko yalɛ miniti ablasan. Sanngɛ, kɛ ɔ́ kɔ́ i ɲrun’n be seli e kɛ e uka dɔ’n su. Ɔ maan siɛn’n, e koko yalɛ dɔ kun. I kpa’n be nun kun seli e kɛ e di dɔ nɲɔn bɔbɔ!” Sran sɔ’m be nun wie’m be ti aɲinsifuɛ, wie’m be la be bɛ’m be su be kwlaman like fi yo, i ti’n, kɛ aniaan’m be nin bé kókó yalɛ’n be uka be sɔfuɛ mun yɛ be wla be fanngan naan be kan be klun ndɛ wie.

Kɛ aniaan’m be kɔ sran sɔ’m be osu nianlɛ’n, be nin be to jue manman Ɲanmiɛn likawlɛ. Ɔ ju wie’n kɛ aniaan’m be nin be ko wie jue kun to’n, be kunndɛ kɛ be to uflɛ bɔbɔ. Be flɛ sran oke sɔ’m be nun kun kɛ Jɔnun. * Ɔ seli kɛ: “E klo jue nga amun nin e to’n. I sɔ’n yo maan e si sa nga ti yɛ Ɲanmiɛn yo ninnge wie mun yɛ e ɲin yi i.” Be nun kun liɛ’n ɔ ti aɲinsifuɛ. Be flɛ i Ziditi. Jue ng’ɔ klo be kpa’n ɔ suannin be kwlaa lele be kɛli i klun!

Sran oke’m be tinuntinun be ndɛ lo Zoova i Lalofuɛ mun. Brayanin ti Zoova i Lalofuɛ. Ɔ seli kɛ: “Sɛ sran oke sɔ’m be nun wie’m be kwlaman nun’n e ko nian be osu be sua’m be nun lɔ yɛ e nin be e koko yalɛ. Cɛn wie kusu’n, e sa e sin e ko nian be osu sɛ be wunnɛn ya’n w’a flunman kan-o.”

Kɛ Zoova i Lalofuɛ’m be ko nian sran oke sɔ’m be osu’n ɔ yo be nun sunman be fɛ. Be flɛ bian oke kun kɛ Piɛli. Ɔ o kan sran oke’m be o lɔ’n wie. Ɔ seli kɛ: “Min wun blibli min kɛ be bla naan e nin be e koko yalɛ.” Ziditi seli be nga be nian be su’m be nun kɛ: “Andɛ ti Mlan cɛn! Amun uka min naan n siesie min wun naan m’an kwla tran yalɛ kokolɛ sɔ’n i bo wie. N kunndɛman kɛ ń ká siɛn!”

Like nga sran oke sɔ’m be suan’n ɔ yo be fɛ kpa, yɛ ɔ uka be naan be nin Ɲanmiɛn be afiɛn w’a mantan. Cɛn kun’n kɛ be wieli like kun mɔ Zezi kleli’n i su yalɛ koko’n, Robɛɛ seli kɛ: “N nin a wunman Biblu’n nun ndɛ sɔ’n i wlɛ le, saan andɛ!” Be flɛ bian oke kun kɛ Davidi. I liɛ’n ɔ wunnin like nga ti yɛ ɔ ti cinnjin kɛ ɔ srɛ Ɲanmiɛn’n i wlɛ. I ti’n ɔ seli kɛ: “Ɲanmiɛn srɛlɛ’n ukali min naan m’an fa min wun m’an mantan Ɲanmiɛn. Ɔ maan min ɲrun’n, Ɲanmiɛn w’a yo kɛ sran jrɛiin sa.”

Sran oke sɔ’m be klo kpa kɛ bé súan ninnge nga Biblu’n se kɛ Ɲanmiɛn wá yó be’n, be su like. Bla oke kun m’ɔ suan Linɛti’n seli aniaan’m be kɛ: “É yó amun mo nin Biblu’n nun ndɛ nga amun fa cici e wla’n.” Kun ekun seli kɛ: “Ɲanmiɛn yɛ ɔ sunmannin amun e wun wa-ɔ!”

Maagarɛti liɛ’n kɛ Zoova i Lalofuɛ’m be ko nian be osu mɔ be nin be koko yalɛ’n i fɛ m’ɔ yo i’n ti’n, siɛn’n ɔ tran Zoova i Lalofuɛ’m be aɲia kwlaa be bo be Ɲanmiɛn Sielɛ Sua’n nun. Nanwlɛ, ɔ miɛn i ɲin kpa afin i wun sanndimɛn i kpa kpɛkun nantilɛ’n kusu ti kekle mɛn i wie. Ɔ seli aniaan’m be kɛ: “Amun yoli maan siɛn’n e le like kpa kun mɔ e kwla lafi su-ɔ.”

Be nga be nian sran oke sɔ’m be lika bɔbɔ’n be klo like nga Zoova i Lalofuɛ’m be yo man sran oke sɔ mun. Zoova i Lalofuɛ kun m’ɔ suan Ana’n seli kɛ: “Be nga be nian sran oke sɔ’m be lika’n be wla be fanngan naan be ko tran Biblu’n su yalɛ kokolɛ sɔ’n i bo afin be sieli i nzɔliɛ kɛ be nga be tran be bo’n be klun jɔ.” Brayanin mɔ e dun mmua e kɛnnin i ndɛ’n seli kɛ: “Be nga be nian sran oke sɔ’m be lika’n, be wun yo fɛ kpɛkun be tu be klun be uka e.”

Kɛ sran oke nga be o lɔ’n be osufuɛ’m be sieli i nzɔliɛ kɛ yalɛ kokolɛ sɔ’n yo be fuɛ’m be ye kpa’n, i sɔ’n jɔli be klun dan. Be nun kun wa liɛ’n yoli Zoova i Lalofuɛ’m be mo. Ɔ seli kɛ: “Like nga amun yo man min manmin’n nanwlɛ, ɔ yo ɲɛnmɛn dan.”