Job 4:1-21
4 Dangan nagsimbag si Elifaz+ na Temanita:
2 “Kun may makipag-ulay sa saimo, mauubos daw an pasensiya mo?
Huli ta siisay an makakatagal na dai magtaram?
3 Totoo, itinanos mo an dakul,Saka pinakusog mo kaidto an maluyang mga kamot.
4 An saimong mga tataramon minapabangon sa siisay man na nasisingkog,Saka pinapasarig mo an mga nangluluya an mga tuhod.
5 Pero ngunyan nangyari iyan sa saimo, asin biyo kang nagagabatan;*Dinutan ka kaiyan, asin pinangruruluyahan ka nin buot.
6 Dai saimo nagtatao nin kumpiyansa an pagkatakot mo sa Diyos?
Dai saimo nagtatao nin paglaom an paglakaw mo sa integridad?+
7 Girumduma tabi: Siisay na daing sála an napara?
Kasuarin nalaglag an matanos?
8 An nahiling ko iyo na an mga nag-aarado* nin nakakakulogSaka an mga nagsasabwag nin kasakitan iyo man iyan an naaani ninda.
9 Paagi sa hinangos nin Diyos sinda napapara,Asin paagi sa pagputok kan saiyang kaanggutan* sinda natatapos.
10 Nag-uungal an leon, asin nagngangarob an sarong durudakula nang leon,Alagad natitipak maski an mga ngipon kan makusog na mga leon.*
11 Nagagadan an sarong leon dahil sa kawaran nin masisiba,Asin nagkakasuruway-suway an mga ugbon nin leon.
12 May sarong mensahe na pasekretong sinabi sa sako,Asin pighinghing iyan sa sakuyang talinga.
13 Sa banggi na nagtuturog nin nanok an mga tawo,Nakahiling ako nin mga bisyon na nakapurisaw sa isip ko,
14 Grabeng pagtakig an namatian ko,Asin an gabos kong tulang napano nin grabeng takot.
15 Sarong espiritu an uminagi sa may lalawgon* ko;Nagtirindog an sakuyang mga barahibo.
16 Dangan puminundo iyan,Pero dai ko masabutan an itsura kaiyan.
May nasa* atubangan kan sakuyang mga mata;Matuninong an kapalibutan, dangan may boses akong nadangog:
17 ‘Puwede daw na an sarong tawong mortal magin mas matanos kisa sa Diyos?
Puwede daw na an sarong tawo magin mas dalisay kisa sa saiyang Kaggibo?’
18 Uya! Dai siyang tiwala* sa saiyang mga lingkod,Saka hinahanapan niya nin sala an saiyang mga anghel.*
19 Kaya paano pa daw sa mga nakaistar sa mga harong na gibo sa dalipay,Na an pundasyon nasa alpog,+Asin madalion sanang marunot arog sa sarong insekto!*
20 Buhay sinda pagkaaga pero biyo nang runot pag-abot nin banggi;Napapara sinda sagkod lamang, asin mayo nin nakakamangno.
21 Bakong kapareho sinda nin sarong tolda na hinalian nin pisi?
Nagagadan sinda na daing kadunungan.
Mga Nota
^ Sa literal, “asin napapagal ka.”
^ O “nagpapakana.”
^ O “dagit.”
^ O “kan mga durudakula nang leon na may bunday.”
^ O “pandok.”
^ O “Sarong porma an nasa.”
^ O “pagtubod.”
^ O “mga mensahero.”
^ Sa literal, “polilya.” Sa Ingles, moth.
