Imahinara an eksenang ini: Kan magsalming si Julia, an hiling niya sa sadiri niya matabaon siya. “Kaipuhan kong magpaniwang,” an sabi niya sa sadiri—maski ngani sinasabihan siya kan mga magurang niya saka mga amiga na garo na siya “ting-ting.”

Grabe na an naiisip niyang gibuhon para sana mabawasan nin “mga duwang kilo” an timbang niya—mapagutom sana siya nin mga pirang aldaw . . .

Kun arog man kaiyan an pagmati mo, ano an gigibuhon mo?

Natural sana na gusto nin saro na magin marahay an itsura niya. Sa katunayan, inumaw pa ngani kan Bibliya an magayon na itsura nin nagkapirang babayi asin lalaki, arog ni Sara, Raquel, Abigail, Jose, saka David. Sinasabi kan Bibliya na “magayunon na marhay” an babaying si Abisag.—1 Hadi 1:4.

Pero, dakul na hoben an pigpaparaisip na sana an itsura ninda. Puwede iyan magresulta nin grabeng mga problema. Pag-isipan ini:

• Sa sarong pag-adal, 58 porsiyento nin mga daragita an nagsasabing sobra sinda sa timbang, pero, an totoo, 17 porsiyento sana sa sainda an sobra sa timbang.

• Sa saro pang pag-adal, 45 porsiyento nin mga babaying talagang kulang sa timbang an naghuhuna na magabaton sinda!

• Sa kagustuhan na magniwang, may mga hoben na nagkahilang nin anorexia—sarong problema sa pagkakan na nakakagadan na kun sain piggugutom nin saro an sadiri.

 Kun may mga sintomas ka nin anorexia o iba pang problema sa pagkakan, magpatabang ka. Dai mag-alangan na magsabi tulos sa magurang mo o sa saro pang pinagkakatiwalaan na adulto. Sinasabi kan Bibliya: “An tunay na amigo nagpapahiling nin pagkamuot sa gabos na panahon, asin tugang na namumundag para sa mga panahon nin kasakitan.”—Talinhaga 17:17.

An pagkatawo nin saro an talagang nagpapagayon o nagpapakanos sa saiya. Kuanon tang halimbawa an aki ni Hading David na si Absalom. An sabi kan Bibliya:

“Mayo na nin ibang lalaking mas inuumaw na marhay huli sa kaguwapuhan. . . . Mayo siya nin kaninan.”—2 Samuel 14:25.

Pero, an hoben na lalaking ini halangkawon an paghiling sa sadiri, sobra kaambisyoso, asin talagang traydor! Kaya, bakong magayon an sinasabi kan Bibliya manungod ki Absalom; sinasabi kaiyan na siya sarong daing supog na traydor asin daing hirak na paragadan.

Kaya tama sana an itinaong hatol na ini kan Bibliya:

“Isulot nindo an bagong personalidad.”—Colosas 3:10.

“An saindo lugod na pampagayon sa sadiri bako idtong pangluwas . . . kundi magin lugod iyan idtong personang nasa puso.”—1 Pedro 3:3, 4.

Maski ngani natural sana na gusto nin saro na magin marahay an itsura niya, mas importante pa man giraray an saiyang pagkatawo. Asin mas magigin magayon ka nanggad sa paghiling nin iba huli sa marahay mong mga ugali kisa sa magayon mong hawak o lawas! “Pag an saro magayon, napapakiling tulos saiya an mga tawo,” an sabi nin sarong daragitang si Phylicia, “pero, an mas magigirumduman ninda saimo iyo an saimong pagkatawo saka marahay na ugali.”

Dai mo daw nagugustuhan an saimong itsura?

Naisip mo na daw na magpa-cosmetic surgery o magdiyeta nin grabe para gumayon ka?

Kun tatawan ka nin pagkakataon na baguhon an itsura mo, ano an babaguhon mo? (Pilion an gabos na gusto mo.)

• LANGKAW

• TIMBANG

• BUHOK

• KORTE NIN HAWAK

• LALAWGON

• KULOR NIN KUBLIT

Kun iyo an simbag mo sa inot na duwang hapot asin tulo o dakul pa an pinili mo sa ikatulo, pag-isipan ini: Posibleng an paghiling saimo kan iba bako man talagang arog kan paghiling mo sa sadiri mo. Madalion sana na magin sobra an iniisip nin saro sa saiyang itsura asin pagparaproblemahon nanggad niya iyan.—1 Samuel 16:7.