An dakol na relihion na literal an interpretasyon sa Biblia naniniwala na an daga asin an gabos na yaon dian linalang sa laog nin anom na aldaw na tigbebeinte kuatro oras, pirang ribong taon pa sana an nakaagi. May mga ateista na gusto kang papaniwalaon na mayo nin Dios, na an Biblia libro nin mga eroestorya sana, asin na an gabos na may buhay naglataw paagi sa nagkanorongod sanang mga pangyayari na mayo nin nagdirehir.

An paniniwala kan kadaklan na tawo nasa tahaw kan duwang magkakontrang ideyang iyan. An pagbasa mo kan brosyur na ini posibleng marhay na nagpaparisa na saro ka sa sainda. Tibaad naniniwala ka sa Dios asin iginagalang mo an Biblia. Alagad tibaad pinapahalagahan mo man an opinyon nin sinanay na marhay asin maimpluwensiang mga sientista na dai naniniwala na linalang an buhay. Kun ika magurang, tibaad iniisip mo kun paano sisimbagon an saimong mga aki kun sinda maghapot manongod sa ebolusyon asin paglalang.

Bakong katuyohan kaini na tuyaon an mga paniniwala kan mga literal an interpretasyon sa Biblia o kan mga habong maniwala sa Dios. Imbes, linalaoman niamo na papahiroon ka kan brosyur na ini na siyasaton giraray an basehan kan nagkapira sa mga paniniwala mo. Ipapaliwanag kaini an sinasabi kan Biblia dapit sa paglalang na tibaad dai mo pa napag-isipan kaidto. Asin idodoon kaini kun taano ta talagang mahalaga kun ano an paniniwala mo manongod sa kun paano nagpoon an buhay.

Magtitiwala ka daw sa mga nagsasabi na mayo nin intelihenteng Kaglalang asin na an Biblia dai masasarigan? O sisiyasaton mo kun ano an talagang sinasabi kan Biblia? Arin na mga katokdoan an maninigo mong pagtiwalaan asin tubodon: an sa Biblia o an sa mga ebolusyonista? (Hebreo 11:1) Taano ta dai repasohon an mga katunayan?