Introduksiyon
‘Magin mga paraarog kaidtong mga nagmana kan mga panuga huli sa pagtubod asin pakatios.’—HEBREO 6:12.
1, 2. Paano minansay nin sarong nagbibiyaheng paraataman an maimbod na mga karakter sa Bibliya, asin taano ta nakakaugmang magin katuod sinda?
“PAG nag-iistorya siya dapit sa mga karakter sa Bibliya, garo baga haloy na niyang katuod sinda.” Iyan an komento nin sarong sister pagkatapos maghinanyog sa pahayag nin sarong may edad nang nagbibiyaheng paraataman. Tama siya huling an brother dakul nang dekada na nag-aadal asin nagtutukdo kan Tataramon nin Diyos—kaya an may pagtubod na mga lalaki asin babayi sa Bibliya garo nanggad haraloy na niyang katuod saka kamidbid.
2 Bako daw na nakakaugmang magin katuod an dakul sa mga karakter na iyan sa Bibliya? Totoo daw sinda sa saimo? Imahinara an mamamatian mo kun nakakaibanan, nakakaulay, asin urog mong namimidbid si Noe, Abraham, Rut, Elias, saka Ester. Isip-isipa nanggad an magigin impluwensiya ninda sa buhay mo—an mahahalagang marhay na sadol asin pamparigon sa buot na puwede nindang itao!—Basahon an Talinhaga 13:20.
3. (a) Paano kita makikinabang sa pag-adal dapit sa may pagtubod na mga lalaki asin babayi sa Bibliya? (b) Anong mga hapot an pag-uulayan ta?
3 Iyo, sa ‘pagkabuhay liwat kan mga matanos,’ lubos na magigin posible an nakakaugmang pakikikatuod na iyan. (Gui. 24:15) Minsan siring, makikinabang na kita dawa ngunyan sa pag-adal dapit sa may pagtubod na mga lalaki asin babayi sa Bibliya. Paano? Ini an praktikal na simbag ni apostol Pablo: ‘Magin mga paraarog kaidtong mga nagmana kan mga panuga huli sa pagtubod asin pakatios.’ (Heb. 6:12) Bilang pagpuon kan pag-adal ta dapit sa sainda, pag-ulayan ta an pirang hapot base sa sinabi ni Pablo: Ano talaga an pagtubod, asin taano ta kaipuhan niyato iyan? Paano ta maaarog an mga maimbod kan suanoy?
Pagtubod—Kun Ano Iyan Asin Kun Taano ta Kaipuhan Niyato Iyan
4. Ano an iniisip nin mga tawo dapit sa pagtubod, asin taano ta sala sinda?
4 An pagtubod sarong magayon na kuwalidad, na pinahalagahan na marhay kan gabos na lalaki asin babayi na pag-aadalan ta sa publikasyon na ini. An kadaklan ngunyan daing pagpahalaga sa pagtubod, na iniisip na iyan paniniwala na mayong tunay na pruweba o ebidensiya. Minsan siring, sala sinda. An pagtubod bakong pagigin madaling maniwala; bako iyan basta pagmati sana; urog pa iyan sa paniniwala. Peligroso an pagigin madaling maniwala. An pagmati puwedeng magburubago, asin maski an paniniwala bako pang igo kun mapadapit sa Diyos, huling “an mga demonyo naniniwala asin nagtatakig.”—Sant. 2:19, NW.
5, 6. (a) Nakapokus an satong pagtubod sa anong duwang klaseng mga bagay na dai nahihiling? (b) Gurano dapat kasarig an pundasyon kan satong pagtubod? Iilustrar.
5 Urog pa sa mga bagay na iyan an tunay na pagtubod. Girumdumon kun paano iyan tinawan nin kahulugan kan Bibliya. (Basahon an Hebreo 11:1.) Nagsabi si Pablo na an pagtubod nakapokus sa duwang klaseng mga bagay na dai ta nahihiling. Inot, nakapokus iyan sa mga katunayan ngunyan na “dai nahihiling.” Dai nahihiling kan satong literal na mga mata an mga katunayan na nasa lugar kan mga espiritu—arog ni Jehova Diyos, kan saiyang Aki, o kan Kahadian na namamahala na ngunyan sa langit. Ikaduwa, nakapokus an pagtubod sa ‘mga bagay na linalauman’—mga bagay na dai pa nangyayari. Dai ta pa nahihiling ngunyan an bagong kinaban na madali nang papangyarihon kan Kahadian nin Diyos. Kun siring, nangangahulugan daw iyan na mayong basehan an pagtubod ta sa siring na mga katunayan asin mga bagay na linalauman?
6 Dai nanggad! Ipinaliwanag ni Pablo na may masarig na pundasyon an tunay na pagtubod. Kan sambiton niya na an pagtubod iyo “an siyertong paghalat” (NW), ginamit niya an tataramon na puwede man itradusir na “titulo.” Imahinara na nagdesisyon an sarong tawo na tawan ka nin harong. Tibaad itao niya sa saimo an titulo asin magsabi, “Uni an bago mong harong.” Siyempre, dai man niya sinasabi na diyan ka maistar sa papel; an buot niyang sabihon, an pagkaigwa kan dokumentong iyan legal na katunayan na garo na man sana iyan an mismong harong. Kaagid kaiyan, an ebidensiya kan satong pagtubod nakakakumbinsir asin makusugon nanggad, kaya garo na man sana iyan an sato mismong pagtubod.
7. Ano an kalabot sa tunay na pagtubod?
7 Huli kaiyan, kalabot sa tunay na pagtubod an makusog na kumpiyansa asin dai natatanyog na paninindugan na nakapokus nin malinaw ki Jehova Diyos. Huli sa pagtubod, ibinibilang ta siya na satong mamumuton na Ama asin nagtitiwala kita na siyertong mauutob an gabos niyang panuga. Pero urog pa diyan an kalabot sa tunay na pagtubod. Arog nin sarong bagay na buhay, dapat na atamanon iyan tanganing magdanay na buhay. Kaipuhan na ipahiling iyan sa gibo, ta kun dai, magagadan iyan.—Sant. 2:26.
8. Taano ta mahalagang marhay an pagtubod?
8 Taano ta mahalagang marhay an pagtubod? Nagtao nin nakakakumbinsir na simbag si Pablo. (Basahon an Hebreo 11:6.) Dai kita makakadulok ki Jehova ni mapapaugma siya kun mayo kitang pagtubod. Kaya mahalagang marhay an pagtubod tanganing mautob ta an pinakanangungurog asin pinakakaumaw-umaw na katuyuhan nin siisay man na linalang na may isip: an rumani saka pamurawayon an satong langitnon na Ama, si Jehova.
9. Paano ipinahiling ni Jehova na aram niyang kaipuhan ta an pagtubod?
9 Aram ni Jehova na kaipuhan tang marhay an pagtubod, kaya tinawan niya kita nin mga halimbawa tanganing tukduan kita kun paano papatalubuon asin ipapahiling an pagtubod. Biniyayaan niya an Kristiyanong kongregasyon nin halimbawa nin maimbod na mga lalaki na nanginginot. An saiyang Tataramon nagsasabi: ‘Arugon nindo an saindang pagtubod.’ (Heb. 13:7) Asin may itinao pa siya sa sato. Si Pablo nagsurat dapit sa ‘dakulang panganuron nin mga saksi,’ mga lalaki asin babayi kan suanoy na mga panahon na nagwalat nin marahayon na halimbawa nin pagtubod. (Heb. 12:1) Dakul pang maimbod an dai nasambitan ni Pablo sa Hebreo kapitulo 11. Dakul nin tunay na istorya sa Bibliya dapit sa mga lalaki asin babayi, hoben asin gurang, patin lain-lain an kamugtakan sa buhay. Namuhay sinda na may pagtubod asin dakul sindang ikakatukdo sa sato sa panahon na ini na dakul na tawo an daing pagtubod.
Paano ta Maaarog an Pagtubod nin Iba?
10. Paano makakatabang sa sato an personal na pag-adal para maarog an maimbod na mga lalaki asin babayi sa Bibliya?
10 Dai mo maaarog an sarong tawo apuwera kun obserbaran mo nguna siyang marhay. Mantang binabasa mo an publikasyon na ini, maririsa mo na dakul an ginibong pagsiyasat tanganing matabangan kang maobserbaran an may pagtubod na mga lalaki asin babaying ini. Puwede ka man daw gumibo nin dagdag na pagsiyasat sa saimong personal na pag-adal sa Bibliya, gamit an mga pantabang sa pagsiyasat? Mantang hinuhurop-hurop mo an saimong pinag-aadalan, imahinaron an eksena kan mga istorya sa Bibliya. Imahinaron an mga nahihiling, nadadangog, asin napaparong mo na garo man sana yaon ka duman. Asin mas mahalaga, hinguwahon na sabuton an namamatian kan mga tawong kalabot. Mantang nasasabutan mo sinda, magigin mas tunay sinda sa saimo asin mas mamimidbid mo sinda—na an nagkapira puwede nganing magin garo haloy mo nang namumutan na katuod.
11, 12. (a) Paano ka mas mapapadayupot ki Abraham asin Sara? (b) Paano ka makikinabang sa halimbawa ni Hana, Elias, o Samuel?
11 Pag namidbid mo talaga sinda, gugustuhon mong arugon sinda. Halimbawa, imahinaron na may pinag-iisipan kang sarong bagong asignasyon. Paagi sa organisasyon ni Jehova, inimbitaran kang pahiwason an saimong ministeryo. Tibaad pinapabalyo ka sa sarong teritoryo na nangangaipo nin dagdag na parahayag, o tibaad dinadagka kang purbaran an sarong paagi nin paghuhulit na bago o dipisil para sa saimo. Mantang pinag-iisipan mo an asignasyon asin ipinapamibi iyan, makakatabang daw kun huhurop-hurupon mo an halimbawa ni Abraham? Andam sinda ni Sara na bayaan an komportableng buhay sa Ur kaya binendisyunan na marhay sinda ni Jehova. Mantang inaarog mo sinda, siyertong mamamatian mo na mas midbid mo sinda ngunyan.
12 Siring man, paano kun dai nagin marahay an pagtratar sa saimo nin saro na dayupot sa saimo kaya nangluya an buot mo—na naisip mo pa nganing dai na mag-atender sa mga pagtiripon? Kun huhurop-hurupon mo an halimbawa ni Hana asin kun paanong dai siya nagpaapekto sa maraot na pagtratar ni Penina, makakatabang iyan sa saimo na magdesisyon nin tama—asin magigin garo mo man sana namumutan na katuod si Hana. Kaagid kaiyan, kun nangluluya an buot mo huli ta iniisip mo na mayo kang halaga, mas mapapadayupot ka ki Elias mantang pinag-aadalan mo an masakit na kamugtakan niya asin kun paano siya rinanga ni Jehova. Asin an mga hoben na napapaatubang sa dakul na panggigipit nin imoral na mga kaeskuwela mas mapapadayupot ki Samuel pag pinag-adalan ninda kun paano niya napangganahan an maraot na impluwensiya kan mga aki ni Eli sa tabernakulo.
13. An pag-arog mo daw sa pagtubod nin sarong karakter sa Bibliya nangangahulugan na bako gayong mahalaga ki Jehova an pagtubod mo? Ipaliwanag.
13 Huli daw sa pag-arog mo sa pagtubod kan mga karakter na iyan sa Bibliya bako nang gayong mahalaga ki Jehova an pagtubod mo? Dai nanggad! Girumdumon na dinadagka kita kan Tataramon ni Jehova na arugon an mga nagpahiling nin pagtubod. (1 Cor. 4:16; 11:1; 2 Tes. 3:7, 9) Dugang pa, an nagkapira sa sainda na pag-aadalan ta digdi nag-arog man sa mga maimbod na nainot sa sainda. Halimbawa, sa Kapitulo 17 kan librong ini, minalataw na sinabi man ni Maria an mga tataramon ni Hana, na malinaw na ibinilang niya ining arugan. Buot sabihon daw kaiyan bakong gayong makusog an pagtubod ni Maria? Dai man! Imbes, an halimbawa ni Hana nakatabang ki Maria para mapakusog an saiyang pagtubod asin makagibo man siya nin marahayon na ngaran sa atubangan ni Jehova Diyos.
14, 15. Ano an nagkapirang kabtang kan publikasyon na ini, asin paano ta magagamit na marhay ini?
14 Dinisenyo an librong ini tanganing tabangan kang pakusugon an saimong pagtubod. An kasunod na mga kapitulo kinua sa mga artikulo sa seryeng ‘Arugon an Saindang Pagtubod’ na ipinublikar sa An Torrengbantayan puon 2008 sagkod 2013. Minsan siring, may mga binago asin idinagdag. May ilinaag na mga hapot para sa pag-adal asin pag-aplikar. Dakul na magayon asin detalyadong drowing an ginibo para sa librong ini, saka pinadakula patin pinagayon man an mga dati. May iiniba pang mga pantabang, arog kan time line asin mga mapa. Dinisenyo an Arugon an Saindang Pagtubod para sa personal asin pampamilyang pag-adal, saka sa pag-adal kan kongregasyon. Magugustuhan man nin dakul na pamilya na iribang basahon nin makusog an mga istorya.
15 Makatabang lugod sa saimo an librong ini na arugon an pagtubod kan maimbod na mga lingkod ni Jehova kan nakaaging panahon. Asin makatabang man lugod ini sa saimo na kumusog an saimong pagtubod mantang lalo kang nagigin harani sa saimong langitnon na Ama, si Jehova!
