An Bibliya bako man na libro sa medisina, pero nagtatao iyan nin praktikal saka kapaki-pakinabang na mga sadol. An sadol na iyan makakatabang sa saro na nasasakitan dahil sa mga problema manungod sa mental na salud. Pag-isipan an nagkapirang halimbawa.

“An mga tawong marahay an salud dai nangangaipo nin doktor, pero an mga may hilang iyo.”—MATEO 9:12.

Sinasabi kan Bibliya na tibaad kaipuhan tang magpabulong. Dakul an naginhawahan kan maaraman ninda an mga puwede nindang magibo manungod sa hilang ninda sa isip hali sa mapagtitiwalaan na mga impormasyon asin paagi sa pagpadoktor.

“An ehersisyo marahay sa saimong lawas.”—1 TIMOTEO 4:8, Contemporary English Version.

An pagtagama nin panahon asin kusog para sa mga bagay na nakakarahay sa pisikal na salud puwede man makatabang sa saimong mental na salud. Kaiba sa mga bagay na iyan an regular na pag-ehersisyo, pagkakan nin tama asin masustansiyang mga kakanon, asin pagkaigwa nin supisyenteng turog.

“An maugmang puso marahay na bulong, pero an runot na espiritu nakakaubos nin kusog.”—TALINHAGA 17:22.

An pagbasa nin nakakapakusog na mga teksto asin pagkaigwa nin rasonable saka kayang abuton na mga pasuhan makakatabang na magdanay kang maugma. Kun positibo ka saka an saimong pananaw  sa buhay, makakatabang iyan na magdanay na balanse an saimong emosyon mantang inaatubang mo an saimong mga problema manungod sa mental na salud.

“An kadunungan yaon sa mga hababa an buot.”—TALINHAGA 11:2.

Tibaad dai mo na kayang gibuhon an gabos na gusto mong gibuhon na ika lang, kaya magin andam na akuon an tabang kan iba. Posibleng marhay na gusto kan mga amigo saka kan mga kapamilya mo na tabangan ka, pero tibaad dai ninda aram kun paano. Kaya sabihon sa sainda kun paano sinda makakatabang saimo. Magin rasonable sa mga inaasahan mo, asin pirming magin mapagpasalamat sa tabang ninda.

“Namati kong may bakong okey sako, kaya nagkonsulta ako sa doktor. Na-diagnose niya an kondisyon ko. Nakatabang iyan sako na maako ko saka masabutan kun ano talaga an kondisyon ko asin maaraman an available na mga opsiyon sa pagbulong para mas mapangatamanan an salud ko.”—Nicole, a may bipolar disorder.

“Nahiling ko na an regular na pagbasa nin Bibliya kaiba ni agom nakakatabang sako na punan an kada aldaw paagi sa positibo asin nakakapakusog na mga kaisipan. Asin sa parati sa mga aldaw na nasasakitan ako, may nababasa akong teksto na nakakaranga sako.”—Peter, may depresyon.

“Dipisil sa sako kaidto na sabihon sa iba an inaagihan ko dahil supugon ako. Pero may dayupot akong amiga na mapagsabot talaga sako asin nagdadangog na marhay sa mga sinasabi ko. Tinabangan niya talaga akong magrahay an pagmati ko asin na mamating dai ako nagsosolo.”—Ji-yoo, may eating disorder.

“Natabangan ako kan Bibliya na magin balanse saka rasonable pag-abot sa trabaho saka pahingalo. An kadunungan na yaon diyan nakatabang sako sa pag-atubang sa mga problema na nagpapasakit sako.”—Timothy, may obsessive-compulsive disorder.