MGA sampulong taon na an nakaagi, si Gregorio asin Marilou, mag-agom na labing 30 anyos, nagpapayunir sa Manila mantang full-time sa trabaho. Bako iyan pasil, pero nakakaya ninda. Dangan na-promote si Marilou bilang manedyer sa bangko. “Magayon an trabaho mi kaya maginhawa an buhay mi,” an sabi niya. Sa katunayan, dakula an suweldo ninda kaya nagdesisyon sindang magpatugdok kan pangarap nindang harong sa sarong magayunon na lugar na mga 19 kilometros sa sirangan nin Manila. Nakipagkontrata sinda sa sarong developer para itugdok iyan asin huhulugan ninda bulan-bulan sa laog nin sampulong taon.

Si Marilou nagsabi: “Inuubos kan sakuyang bagong trabaho an panahon asin kusog ko kaya luminuya an kaigutan ko sa Kristiyanong mga aktibidad. An pagmati ko hinahabunan ko si Jehova.” Nagpaliwanag siya: “Dai ko na ikinakatao ki Jehova an panahon na idinusay ko kaidto sa saiya.” Dai ninda gusto an dalagan kan saindang buhay, kaya sarong aldaw pinag-ulayan ninda iyan. Si Gregorio nagsabi: “Gusto ming gumibo nin pagbabago pero dai mi talaga aram kun ano an gigibuhon. Pinag-ulayan mi kun paano lubos  na magagamit an samong buhay sa paglilingkod ki Jehova, lalo na ta mayo kaming aki. Namibi kami para sa paggiya.”

Kan panahon na iyan, nagkapirang pahayag an nadangog ninda dapit sa paglilingkod kun sain kaipuhan an mas dakul na parahayag kan Kahadian. “Naisip mi na simbag iyan ni Jehova sa samong mga pamibi,” an sabi ni Gregorio. Namibi sinda na lugod tawan sinda nin urog pang pagtubod tanganing kumusog an buot ninda na makagibo nin tamang desisyon. An sarong dakulang ulang iyo an pinapatrabaho nindang harong. Nakabayad na sinda nin para sa tulong taon. Ano an gigibuhon ninda? Si Marilou nagsabi: “Kun tatapuson mi an kontrata, masasayang na an gabos na ibinayad mi—dakulaon na kantidad. Pero inisip mi na kaipuhan ming pumili kun iinuton an kabutan ni Jehova o an sadiri ming kamawutan.” Nasa isip an sinabi ni apostol Pablo kun paano aakuon an pagkawara nin mga pagsadiri, kinanselar ninda an kontrata, naghali sa trabaho, ipinabakal an kadaklan sa rugaring, asin nagbalyo sa sarong harayong baryo sa isla nin Palawan, mga 480 kilometros sa timog nin Manila.—Fil. 3:8.

Bago magbalyo, inandam ni Gregorio asin Marilou an saindang sadiri na mamuhay nin simple, pero saka sana ninda naaraman kun gurano kasimple an magigin buhay ninda kan yaon na sinda sa saindang destinasyon. “Nakakabigla,” an sabi ni Marilou. “Mayong kuryente, mayo kan mga kagianan sa buhay. Imbes na mag-switch ka na sana nin rice cooker, kaipuhan mi pang magtiak nin kahoy na panggatong para makaluto. Hinahanap-hanap ko an pagmu-mall, pagkakan sa restawran, asin iba pang bagay na yaon sa siyudad.” Pero, pirmi nindang ipinapagirumdom sa saindang sadiri an dahilan kan pagbalyo ninda duman, asin paghaloy-haloy nasanay na sinda. Si Marilou nagsabi: “Ngunyan, nauugma na akong pagmasdan an kagayunan nin naturalesa, pati na an maliwanag na mga bituon sa banggi. Urog sa gabos, nakakaugmang mahiling an magaya-gayang lalawgon kan mga tawo pag naghuhulit kami. Sa paglilingkod digdi, ‘nanudan mi an sekreto’ kun paano magin kontento.”—Fil. 4:12, NW.

Si Gregorio nagsabi: “Pag-abot mi digdi, apat pa sana an Saksi. Maugmahon sinda kan nagpuon na akong magtao nin pampublikong pahayag surusemana asin naggigitara ako pag nagkakanta nin mga awit na pang-Kahadian.” Sa laog nin sangtaon, nahiling kan mag-agom kun paano nag-uswag an sadit na grupong iyan na nagin kongregasyon na may 24 parahayag. Sinabi ni Gregorio: “Mati ming marhay an pagkamuot kan kongregasyon na ini.” Ngunyan, pag binabalikan an nakaaging labing anom na taon nin paglilingkod sa harayong lugar na iyan, sinasabi ninda: “Mayo nang maurog pa sa kaugmahan na mahiling an espirituwal  na pag-uswag. Namatian ming nagin mas makahulugan an samong buhay.”

Sa Pilipinas, haros 3,000 na tugang an nagbalyo sa mga lugar na may dakulang pangangaipo para sa mga parahayag kan Kahadian. Mga 500 sa sainda an daing agom na sister. Sarong halimbawa si Karen.

Si Karen, na mga 25 anyos na ngunyan, nagdakula sa Baggao, Cagayan. Kan tin-edyer pa sana siya, parati na niyang pinag-iisipan na pahiwason an saiyang ministeryo. Sinabi niya: “Sa pakaaram na nainaan na an panahon na natatada asin kaipuhan na madangog kan gabos na klase nin tawo an mensahe kan Kahadian, gusto kong maglingkod kun sain kaipuhan an mas dakul na parahayag.” Dawa ngani sinadol siya kan pira sa mga kapamilya niya na kumua nin halangkaw na edukasyon imbes na bumalyo sa hararayong lugar para maghulit, namibi si Karen para sa paggiya. Nakipag-ulay man siya sa mga naglilingkod sa hararayong lugar. Sa edad na 18, nagbalyo siya sa sarong harayong lugar na mga 64 kilometros an rayo.

Mabukid na lugar sa kahalabaan kan Baybayon nin Pasipiko an teritoryong sakop kan sadit na kongregasyon na tinatabangan ni Karen. Natatandaan niya: “Hali sa Baggao, para sana makaabot sa bagong kongregasyon, nagbabaklay kami nin tulong aldaw, patukad asin parusog sa mga bulod asin labing 30 beses na nagbabalyo nin mga salog.” An sabi pa niya: “Para makaduman sa mga tinutukduan ko sa Bibliya, anom na oras akong nagbabaklay, nakikiturog sa harong ninda, asin kinaagahan nagbabaklay giraray ako nin anom na oras papuli.” Sulit daw an gabos na paghihinguwa? “Kun minsan, nagkukulog an tabay ko, pero,” an sabi pa ni Karen na nakangirit, “igwa ako nin 18 tinutukduan sa Bibliya. ‘Nanamitan ko asin nahiling na marahayon si Jehova’!”—Sal. 34:8.

Ano an nagmotibar ki Sukhi, sarong daragang sister na labing 40 anyos asin taga Estados Unidos, na magbalyo sa Pilipinas? Kan 2011 nag-atender siya nin pansirkitong asembleya na diyan may ininterbiyung mag-agom. Ipinabakal ninda an kadaklan nindang rugaring para magtabang sa paghuhulit sa Mejico. “Huli sa interbiyung idto,” an sabi ni Sukhi, “nagpuon na akong mag-isip nin mga pasuhan na dai ko pa lamang naisip kaidto.” Kan naaraman ni Sukhi, na sarong Indian, na kaipuhan na marhay an tabang para mapatotoohan an mga Punjabi na nakaistar sa Pilipinas, nagdesisyon siyang magduman asin magtabang. Napaatubang daw siya sa mga kadipisilan?

“Mas dipisil palan an magdesisyon kun arin na mga gamit an dadarahon asin kun arin an ipapabakal,” an sabi ni Sukhi. “Saro pa, pakalihis nin 13 taon na pagigin komportable sa apartment ko, temporaryo akong nakikiistar sa sarong pamilya. Bako ini madali, pero  inandam ako kaiyan na mamuhay nin simple.” Anong mga kadipisilan an naeksperyensiyahan niya sa Pilipinas? “Nagka-phobia ako sa mga insekto saka napupungaw ako. Urog akong nakanuod na magsarig ki Jehova!” Sulit daw iyan? Naghuyom si Sukhi dangan nagsabi: “Sinasabi sa sato ni Jehova, ‘Batida ako nindo, kun dai ko kamo ulaan nin biyaya.’ Mas nagigin totoo nanggad iyan sa sako pag hinahapot ako kan kagharong, ‘Nuarin ka mabuwelta? Dakul pa akong ihahapot.’ Nagtatao nanggad sa sako nin kaugmahan asin satispaksiyon an makatabang sa mga tawong gutom sa espirituwal!” (Mal. 3:10) Sinabi pa niya: “An pinakadipisil talaga iyo an pagdesisyon na bumalyo. Kan makadesisyon na ako, nahiling ko nanggad kun paano minamaniobra ni Jehova an mga bagay-bagay para sa sako.”

Si Sime, sarong may agom na brother na pa-40 anyos na ngunyan, naghali sa Pilipinas para sa sarong trabaho na halangkaw an suweldo sa sarong nasyon sa Middle East. Kan yaon duman, an pag-enkaminar kan sarong paraataman nin sirkito asin pahayag nin sarong miyembro kan Namamahalang Grupo nakamotibar sa saiya na inuton sa buhay niya si Jehova. “Pero natatakot ako pag naiisip kong maghali sa trabaho,” an sabi ni Sime. Sa ibong kaiyan, naghali siya sa trabaho asin nagbalik sa Pilipinas. Ngunyan, si Sime asin an agom niyang si Haidee, naglilingkod sa Davao del Sur, sa timog na parte kan nasyon, kun sain kaipuhan an mga parahulit para makobrehan an mahiwas na teritoryo. “Pag iniisip-isip ko an nakaagi,” an sabi ni Sime, “nagpapasalamat ako ta napangganahan ko an takot na mawaran nin trabaho asin na ininot ko si Jehova. Mayo na nin mas nakakakontento pa sa buhay kisa sa pagtao ki Jehova kan bilog na makakaya ta!”

Kan naaraman ni Ramilo asin Juliet, mag-agom na payunir na labing 30 an edad, na nangangaipo nin tabang an sarong kongregasyon na mga 30 kilometros an rayo sa harong ninda, nagboluntaryo sinda. Kaya surusemana, mauran man o mainit, nagmomotor sinda para mag-atender sa mga pagtiripon asin maghulit. Dawa dipisilon an pag-agi sa mga kolgante asin lubak-lubak na mga tinampo, maugma sinda na pinahiwas ninda an saindang ministeryo. Sinabi ni Ramilo: “Igwa kami nin 11 tinutukduan sa Bibliya! May kaibang pagsasakripisyo an paglilingkod kun sain may mas dakulang pangangaipo, pero nagtatao iyan sa samo nin dakulang satispaksiyon!”—1 Cor. 15:58.

Gusto mo daw na maaraman pa an dapit sa paglilingkod kun sain may mas dakulang pangangaipo para sa mga parahayag sa saindong nasyon o sa ibang nasyon? Kun iyo, ipakipag-ulay iyan sa saindong paraataman nin sirkito, asin basahon an artikulo na “Puede daw Kamong ‘Bumalyo sa Macedonia’?” sa An Satong Ministeryo sa Kahadean na Agosto 2011.