MANTANG nagdadakula si Pascal sa sarong pobreng lugar sa Côte d’Ivoire, nagmawot siya nin mas marahay na buhay. Huling bakong propesyonal na boksingero, naisip-isip niya, ‘Sain daw ako puwedeng sumikat sa isport saka magin mayaman?’ Kan siya 25 anyos na, naisip niya na sa Europa. Pero huling mayo nin mga dokumento sa pagbiyahe, malaog siya duman sa ilegal na paagi.

Kan 1998, sa edad na 27, pinunan niya an saiyang pagbiyahe. Nagbalyo siya sa linderos pasiring sa Ghana, nagbiyahe pasiring sa Togo asin Benin, dangan sa katapos-tapusi nakaabot sa banwaan nin Birni Nkonni sa Niger. Digdi mapuon an peligroso talagang kabtang kan pagbiyahe niya. Para makabiyahe panorte, kaipuhan niyang sumakay sa sarong trak na mabalyo sa Sahara Desert. Dangan, pag-abot sa Mediteraneo, malunad siya nin sakayan na pandagat pa-Europa. Iyan an plano, pero may duwang bagay na nangyari sa Niger na nakapugol sa saiya.

Inot, dai na siyang kuwarta. Ikaduwa, namidbid niya si Noe, sarong payunir na pinunan siyang tukduan sa Bibliya. Nakapahirong marhay sa saiya an nanudan niya kaya nabago an saiyang pagmansay sa buhay. An materyal na mga pasuhan niya nasalidahan nin espirituwal na intereses. Nabawtismuhan siya kan Disyembre 1999. Para ipahiling an saiyang pasasalamat ki Jehova, nagpuon siyang magpayunir kan 2001 sa Niger—sa mismong banwaan na nanudan niya an katotoohan. Ano an pagmati niya dapit sa saiyang paglilingkod? Sabi niya, “Nakakamtan ko an pinakamarahay na buhay!”

Arog ni Pascal, namamatian nin dakul na an urog na pagkakontento sa buhay nakasentro sa pagmamaigot na abuton an espirituwal na mga pasuhan. Tanganing maabot iyan, may mga minahali sa Europa asin minabalyo sa Aprika para maglingkod sa mga lugar na mas nangangaipo nin mga parabalangibog kan Kahadian. Sa katunayan, mga 65 Saksi hali sa Europa—na an edad 17 sagkod 70—an nagbalyo bilang mga boluntaryo sa mga nasyon sa Sulnupan na Aprika na arog nin Benin, Burkina Faso, Niger, asin Togo. * Ano an nakamotibar sa sainda na gibuhon an siring kadakulang desisyon, asin ano an nagin resulta?

Si Anne-Rakel na taga Denmark nagsabi: “An mga magurang ko nagin mga misyonero sa Senegal. Maugmahon sinda pirmi pag nag-iistorya dapit sa buhay bilang misyonero kaya gusto ko man an arog kaiyan na buhay.” Mga 15 taon na an nakaagi, kan siya labi pa sanang 20 anyos, nagbalyo siya sa Togo na duman naglilingkod siya sa sarong kongregasyon sa lengguwaheng pasenyas. Paano nadagka an iba huli sa pagbalyo niya? Sabi niya: “Pag-abot nin panahon, suminunod sako sa Togo an mas nguhod kong tugang na babayi saka lalaki.”

 Si Aurele, sarong 70 anyos na may agom na brother na taga Pransia, nagsabi: “Kan magin pensiyonado ako limang taon na an nakaagi, may pagpipilian ako: mamuhay nin tuninong sa Pransia asin halaton na umabot an Paraiso o gumibo nin mga lakdang na pahiwason an ministeryo ko.” An ikaduwa an ginibo niya. Mga tulong taon na an nakaagi, nagbalyo siya asin an agom niyang si Albert-Fayette sa Benin. “An pagpresentar na maglingkod ki Jehova digdi an pinakamarahay na ginibo mi kasuarin man,” an sabi ni Aurele. “Magayunon an resulta kaiyan,” an sabi pa niya na nakangirit, “ta may mga parte kan teritoryo mi sa may baybayon na nagpapagirumdom sako kan Paraiso.”

Si Clodomir asin an agom niyang si Lysiane nagbalyo sa Benin hali sa Pransia 16 na taon na an nakaagi. Kan primero, pungawon sinda sa saindang pamilya asin mga katuod sa Pransia, saka nahahadit na dai makaadaptar sa bagong pamumuhay ninda. Minsan siring, daing rason na mahadit sinda. Nakamati sinda nin dakulang kagaya-gayahan. “Kun kukuanon an average sa 16 na taon na ini,” sabi ni Clodomir, “nagkapribilehiyo kaming matabangan an sarong tawo kada taon na mag-ako kan katotoohan.”

An mag-agom na si Sebastien asin Johanna buminalyo sa Benin hali sa Pransia kan 2010. “Kadakul nin dapat gibuhon sa kongregasyon,” an sabi ni Sebastien. “An paglilingkod digdi garo pag-adal sa sarong pinarikas na kurso nin teokratikong pagsasanay!” Kumusta an reaksiyon nin mga tawo sa ministeryo? Sabi ni Johanna: “Paha an mga tawo sa katotoohan. Dawa dai kami naghuhulit, may mga tawo sa tinampo na nagdudulok samo para maghapot dapit sa Bibliya saka maghagad nin mga publikasyon.” Ano an epekto sa sainda bilang mag-agom kan pagbalyo ninda? Sabi ni Sebastien: “Napapakusog kaiyan an relasyon mi bilang mag-agom. Maugmang makaibanan sa ministeryo nin bilog na aldaw an sakong agom.”

Si Eric asin an agom niyang si Katy naglilingkod bilang mga payunir sa norteng parte kan Benin, na an populasyon kadikit sana asin suruway-suway. Mga 10 taon na an nakaagi, kan sinda nag-iistar sa Pransia, nagpuon sindang magbasa nin mga artikulo dapit sa paglilingkod kun sain mas nangangaipo nin mga parahayag asin makipag-ulay sa mga nasa bilog na panahon na paglilingkod. Huli kaini, nagmawot sindang bumalyo sa ibang nasyon, na ginibo ninda kan 2005. Kahanga-hanga an pag-uswag na nahiling ninda. Sabi ni Eric: “Kan nakaaging duwang taon, may 9 na parahayag an grupo mi sa banwaan nin Tanguieta; ngunyan 30 na. Pag Domingo, mga 50 sagkod 80 an nag-aatender sa pagtiripon. Daing kaagid nanggad na kagaya-gayahan na mahiling an siring na pag-uswag!”

Anong mga kadipisilan an inaatubang nin mga boluntaryo? Si Benjamin, 33 anyos, tugang ni Anne-Rakel. Kan taon 2000, namidbid niya sa Denmark an sarong nagin misyonero sa Togo. Nagigirumduman ni Benjamin: “Kan sabihon ko sa misyonerong iyan na gusto kong magpayunir, nagsabi siya: ‘Aram mo, puwede kang magpayunir sa Togo.’” Pinag-isipan niya iyan. Sabi niya: “Dai pa ngani ako 20 anyos kaidto, pero an duwa kong tugang na babayi naglilingkod na sa Togo. Huli kaiyan, nagin mas pasil sako na dumuman.” Kaya nagbalyo siya. Pero may kadipisilan pa man giraray. An paliwanag niya: “Dai akong aram ni sarong tataramon na Pranses. Nagin dipisil an inot na anom na bulan huling dai talaga ako makakomunikar.” Pero pag-abot nin panahon, nag-uswag siya. Ngunyan, si Benjamin naglilingkod na sa Bethel sa Benin, na naghahatod nin mga literatura asin nagtatabang sa computer department.

Si Eric asin Katy na nasambitan sa inutan, naglingkod sa Pransia—sa langtad na iba an lengguwahe—bago magbalyo sa Benin. Paano naiiba an Sulnupan na Aprika? Sabi ni Katy: “Bakong pasil na makakua nin angay na istaran. Dakul na bulan kaming nag-istar sa harong na daing kuryente asin gripo.” Sabi pa ni Eric: “Nagpapatugtog nin makusog na musika an pagtaraid sagkod matangang banggi. Kaipuhan mong magin mapasensiya saka andam na mag-adaptar diyan.” Pareho sindang minauyon: “Sulit an pag-agi mi nin ano man na kadipisilan huli sa kagaya-kagayahan na maglingkod sa teritoryong haros dai pa nahuhulitan.”

An mag-agom na si Michel asin Marie-Agnes, na ma-60 anyos na, nagbalyo sa Benin hali sa Pransia mga limang taon na an nakaagi. Kan primero, nahadit sinda. Sabi ni Michel: “Ikinumparar nin iba an pagbalyo mi sa sarong sirkero na nagtutulay sa alambre saka may binubusol na karumatilya—asin kami nakasakay diyan! Nakakatakot iyan kun dai mo aram na si Jehova an arog sirkero na nagtutulay sa alambre. Kaya nagdesisyon kaming magbalyo na kaibanan ni Jehova asin para saiya.”

Idinuduon kan mga may eksperyensiya bilang boluntaryo an kahalagahan kan pag-andam sa sadiri paagi sa mga lakdang na ini: Magplano antes pa. Makanuod na mag-adaptar. Gumastos suno sa badyet. Manarig ki Jehova.—Luc. 14:28-30.

Nag-istorya si Sebastien, na nasambitan sa inutan: “Bago magbalyo, nagdamot nguna kami ni Johanna nin kuwarta, sa laog nin duwang taon, paagi sa pagbawas nin gastos sa paglilibang saka dai pagbakal nin ano man na dai kaipuhan.” Para makapadagos sa paglilingkod sa ibang nasyon, nagtatrabaho sinda nin pirang bulan sa Europa kada taon, kaya nakakapagpayunir sinda sa Benin sa iba pang mga bulan kan taon.

 Saro si Marie-Therese sa mga 20 sister na daing agom hali sa ibang nasyon na naglilingkod bilang mga boluntaryo sa Sulnupan na Aprika. Nagtatrabaho siya bilang drayber nin bus sa Pransia; minsan siring, kan 2006 nagbakasyon siya sa trabaho nin sarong taon para magpayunir sa Niger. Dai nahaloy, narealisar niya na ini an klase nin buhay na talagang gusto niya. Sabi ni Marie-Therese: “Pagbalik ko sa Pransia, nakipag-ulay ako sa sakong among na gusto kong liwaton an iskedyul ko sa trabaho, asin nag-uyon man siya. Ngunyan, puon Mayo sagkod Agosto, nagtatrabaho ako bilang drayber nin bus sa Pransia, asin puon Setyembre sagkod Abril, nagpapayunir ako sa Niger.”

Makakapagtiwala an mga ‘naghahanap nguna kan Kahadian’ na itatao sa sainda ni Jehova an “gabos na [iba pang] bagay” na kaipuhan ninda. (Mat. 6:33) Sa pag-ilustrar: Isip-isipa si Saphira, sarong daing agom na taga Pransia na ma-30 anyos na asin nagpapayunir sa Benin. Kan 2011 buminalik siya sa Pransia para makaganar nin igong kuwarta na magagamit niya para sa saro na naman na taon (an ikaanom niya) sa Aprika. Nag-istorya siya: “Biyernes kaidto, huring aldaw ko sa trabaho, pero kaipuhan ko pang magtrabaho nin 10 aldaw tanganing makaganar nin igo para sa masunod na taon. Duwa na sanang semana an natatada ko sa Pransia. Namibi ako ki Jehova, na ipinapaliwanag an sitwasyon ko. Dai nahaloy pagkatapos kaiyan, inapudan ako nin sarong employment agency asin hinapot ako kun puwede akong magsalida sa sarong empleyado sa laog nin duwang semana.” Pag-abot nin Lunes, nagduman siya sa lugar kan trabaho para tukduan kan empleyado na sasalidahan niya. Sabi ni Saphira: “Nabigla nanggad ako kan maaraman ko na saro palan siyang sister na kaipuhan magbakasyon sa trabaho nin 10 aldaw para makapag-adal sa Pioneer Service School! Habo siyang pabakasyunon kan among niya kun dai siya makakua nin kasalida. Nakimahirak siya ki Jehova na mag-interbenir—arog man kan ginibo ko.”

May mga tugang na dakul nang taon na naglilingkod sa Sulnupan na Aprika asin duman na nag-istar. An iba nakapagdanay nin pirang taon dangan buminalik na sa sadiri nindang nasyon. Pero dawa ngunyan, an mga dating boluntaryong iyan nakikinabang pa man giraray sa mga taon nin paglilingkod sa ibang nasyon. Nanudan ninda na an tunay na pagkakontento sa buhay minagikan sa paglilingkod ki Jehova.