NASASAKITAN ka daw kun beses na magin makinuyog?— * Kun iyo, bako iyan makangangalas. May mga panahon na an lambang saro nasasakitan na kumuyog. Aram mo daw na dawa si Jesus kinaipuhan na makanood na magin makinuyog?—

Aram mo daw kun sairisay an maninigong kuyogon nin gabos na aki?— Iyo, an satong ama asin ina. “Magin makinuyog sa saindong mga magurang kasaro kan Kagurangnan,” an sabi kan Biblia. (Efeso 6:1) Siisay an ama ni Jesus?— Si Jehova, asin sia man an Ama niato. (Mateo 6:9, 10) Alagad kun sinabi mo na si Jose an ama ni Jesus asin si Maria an saiyang ina, tama ka man. Aram mo daw kun paano sinda nagin mga magurang nia?—

Sinabihan kan anghel na si Gabriel si Maria kun paano sia magigin sarong ina dawa ngani dai pa sia kaidto nakikidorog sa lalaki. Pinagin posible ni Jehova an pagbados na ini paagi sa sarong dakulang milagro. Ipinaliwanag ni Gabriel ki Maria: “An kapangyarihan kan Kaharohalangkawe malindong sa saimo. Sa dahelan man na iyan an ipapangaki aapodon na banal, Aki nin Dios.”—Lucas 1:30-35.

Ibinalyo nin Dios an buhay kan saiyang Aki hale sa langit pasiring sa laog ni Maria. Dangan an buhay na iyan nagtalubo sa laog nia siring sa ibang mga omboy sa laog kan saindang ina. Pakalihis nin mga siyam na bulan, si Jesus namundag. Mientras tanto, nagin agom ni Jose si Maria, asin an kadaklan na tawo naghona na si Jose an tunay na ama ni Jesus. An totoo, si Jose an saiyang kag-ampon na ama. Kaya, masasabing si Jesus igwa nin duwang ama!

Kan si Jesus 12 anyos pa sana, may ginibo sia na nagpaheling kun gurano kadakula kan pagkamoot nia sa saiyang Ama sa langit, si Jehova. Kan panahon na iyan, an pamilya ni Jesus, siring kan saindang nakaugalean, nagbaklay nin harayo pasiring sa Jerusalem para sa Paskua. Pagkatapos, kan sinda papuli na sa Nazaret, dai nariparo ni Jose asin Maria na dai ninda kaiba si Jesus. Nagngangalas ka daw kun paanong nalingawan ninda sia?—

Bueno, si Jose asin Maria igwa na nin ibang mga aki kan panahon na idto. (Mateo 13:55, 56) Posible man na may kaibanan sindang mga paryente na nagbabaklay, siring ki Santiago asin Juan kaiba kan saindang amang si Zebedeo, asin inang si Salome, na tibaad tugang ni Maria. Kaya tibaad hinona ni Maria na kaiba si Jesus kan iba pa niang mga paryente sa grupo.—Mateo 27:56; Marcos 15:40; Juan 19:25.

Kan marealisar ni Jose asin Maria na nawawara si Jesus, dali-dali sindang nagbalik sa Jerusalem. Natatarantang hinanap ninda an saindang aki. Kan ikatolong aldaw, nanompongan ninda sia sa templo. Sinabi ni Maria sa saiya: “Taano ta ginibo mo ini sa samo? An saimong ama asin ako haditon sa pagparahanap sa saimo.” Alagad suminimbag si Jesus: “Taano ta kaipuhan nindo akong hanapon? Dai kamo nakakaaram na ako dapat na nasa harong kan sakong Ama?”—Lucas 2:45-50.

Iniisip mo daw na salang simbagon ni Jesus an saiyang ina nin arog kaiyan?—  Bueno, aram kan saiyang mga magurang na gustong marhay ni Jesus na sumamba sa harong nin Dios. (Salmo 122:1) Kaya, bako daw na tamang isipon ni Jesus na an templo nin Dios iyo an enot na lugar kun saen ninda sia hahanapon?— Kan huri, padagos na inisip-isip ni Maria an sinabi ni Jesus.

Ano an nagin saboot ni Jesus ki Jose asin Maria?— An Biblia nagsasabi: “[Si Jesus] naglugsad kaiba ninda asin nagdatong sa Nazaret, asin sia padagos na nagpasakop sa sainda.” (Lucas 2:51, 52) Ano an manonodan niato sa halimbawa ni Jesus?— Iyo, kaipuhan man kitang magin makinuyog sa satong mga magurang.

Pero, bako pirmeng pasil para ki Jesus na kumuyog—dawa sa saiyang Ama sa langit.

Kan banggi bago sia magadan, hinapot ni Jesus si Jehova kun babagohon pa Nia an Saiyang isip mapadapit sa gusto Niang gibohon ni Jesus. (Lucas 22:42) Alagad kinuyog ni Jesus an Dios dawa ngani bakong pasil iyan. An Biblia nagsasabi na “sia nakanood nin pagkuyog hale sa mga bagay na saiyang tinios.” (Hebreo 5:8) Sa paghona mo daw puede man niatong manodan an leksion na iyan?—