KUN dapit sa pamimibi, idinodoon sa dakol na tradisyon sa relihion an pisikal na mga aspekto kaiyan, arog baga nin posisyon, mga tataramon, asin ritual. Minsan siring, tinatabangan kita kan Biblia na bako dian magkonsentrar kundi sa mas mahalagang mga aspekto kan hapot na, “Paano kita maninigong mamibi?”

Sinasabi sa Biblia na an maimbod na mga lingkod nin Dios namibi sa laen-laen na lugar asin posisyon. Sinda namibi nin silensio o makosog an boses depende sa kamugtakan. Sinda namibi man mantang nakatingag sa langit o nakaduko. Imbes na maggamit nin mga imahen, rosaryo, o libro nin mga pamibi bilang pantabang, sinda namibi hale sa puso asin sa sadiri nindang tataramon. Taano ta dinangog nin Dios an pamibi ninda?

Arog kan nasambit sa sinundan na artikulo, sinda namibi sa saro sanang Dios—si Jehova. May saro pang mahalagang bagay. Mababasa niato sa 1 Juan 5:14: “Iyo ini an satong mapapanarigan mapadapit sa saiya, na, minsan ano an satong hagadon segun sa saiyang kabotan, kita dinadangog nia.” An satong pamibi kaipuhan na kaoyon kan kabotan nin Dios. Ano an boot sabihon kaiyan?

Tanganing makapamibi kaoyon kan kabotan nin Dios, kaipuhan tang maaraman kun ano an kabotan nia. Kun siring, an pag-adal sa Biblia mahalagang marhay sa pamimibi. An boot daw sabihon kaini dai kita dadangogon nin Dios kun bako kitang iskolar sa Biblia? Dai man, alagad inaasahan nin Dios na pag-aadalan niato an kabotan nia, na hinihingoang saboton iyan asin humiro oyon dian. (Mateo 7:21-23) Kaipuhan tang mamibi kaoyon kan nanonodan niato.

Mantang kita nakakanood manongod ki Jehova asin dapit sa kabotan nia, minakosog an satong pagtubod—saro pang bagay na mahalagang marhay sa pamimibi. Si Jesus nagsabi: “An gabos na bagay na hagadon nindo sa pamibi, na may pagtubod, aakoon nindo.” (Mateo 21:22) An pagtubod dai nangangahulogan nin pagigin madaling maniwala. Imbes, nangangahulogan iyan nin pagtubod sa sarong bagay na dawa dai naheheling pero pinapatunayan nin makosogon na ebidensia. (Hebreo 11:1) An Biblia pano nin ebidensia na si Jehova, na dai niato naheheling, tunay, masasarigan, asin andam na magsimbag sa pamibi kan mga may pagtubod sa saiya. Apuera kaini, pirme kitang makakapamibi na logod dugangan an satong pagtubod, asin gustong-gusto ni Jehova na itao sa sato an kaipuhan niato.—Lucas 17:5; Santiago 1:17.

Uni an saro pang bagay na mahalagang marhay kun paano mamimibi. Si Jesus nagsabi: “Mayo nin makakaduman sa Ama kun bakong paagi sa sako.” (Juan 14:6) Kaya, si Jesus an satong paagi sa pagdolok sa Ama na si Jehova. Huli kaini, sinabihan ni Jesus  an mga parasunod nia na mamibi sa ngaran nia. (Juan 14:13; 15:16) Dai iyan nangangahulogan na kita maninigong mamibi ki Jesus. Imbes, kita namimibi sa ngaran ni Jesus, na ginigirumdom na sia an dahelan na kita nakakadolok sa satong sangkap asin banal na Ama.

An pinakaharaning mga parasunod ni Jesus naghapot sa saiya kaidto: “Kagurangnan, tokdoi kami kun paano mamibi.” (Lucas 11:1) Minalataw na dai sinda naghahapot manongod sa pundamental na mga bagay na ipinaliwanag pa sana sa enotan. An gusto talaga nindang maaraman iyo an manongod sa laog kan pamibi—na garo man sana nagsasabi, ‘Ano an maninigo ming ipamibi?’