IMAHINARA na may amigo ka na hinahangaan mong marhay, pero may ginibo siyang dai mo masabutan. Kinikritika kan iba an saiyang ginibo asin hinuhusgaran an saiyang mga motibo, na sinasabing maringis an amigo mo. Tulos ka daw mauyon sainda, o hahalaton mo an sasabihon kan amigo mo? Kun mayo siya para magpaliwanag, magigin mapasensiya ka daw, na dai siya tulos hinuhusgaran?

Bago sumimbag, tibaad may gusto ka pang maaraman. Tibaad ihapot mo, ‘Gurano ko daw kamidbid an amigo kong ini, asin taano ta hinahangaan ko siya?’ Rasonableng gibuhon iyan. Pero isip-isipa: Bako daw na puwede ta man iaplikar an prinsipyong iyan sa hapot na kun baga maringis an Diyos?

Tibaad nasasakitan kang sabuton an nagkapira sa mga ginibo nin Diyos pati na an mga bagay na tinugutan niyang mangyari. Dakul na tawo an masabi saimo na maringis an Diyos asin masabing husgaran mo man an motibo nin Diyos arog ninda. Bako daw na dai mo siya tulos huhusgaran sagkod na dai mo pa siya namimidbid nin urog? An simbag nakadepende sa kun gurano mo kamidbid an Diyos. Haputon an sadiri, ‘Nagin anong klaseng katuod an Diyos sa sako?’

Kun nagin masakit an buhay mo, tibaad masabi mo na an Diyos dai lamang nagin katuod sa saimo. Pero isip-isipa nguna. An Diyos daw an dahilan kan mga kasakitan sa buhay mo—o kan mga bendisyon? Arog kan naaraman ta, si Satanas an namamahala o an ‘puon kan kinaban,’ bako si Jehova. (Juan 12:31) Kaya si Satanas an dahilan kan kadaklan sa mga kasakitan asin inhustisya sa kinaban na ini. Asin dai ka daw mauyon na an satong pagkabakong perpekto asin an dai inaasahan na mga pangyayari iyo an dahilan kan dakul sa mga problema ta?

Sa ibong na lado, ano an mga ginibo nin Diyos? Isip-isipa an sinasabi kan Bibliya: na an Diyos an ‘Kaggibo kan langit asin daga’; na kaiba sa mga ginibo niya an satong hawak, na ‘makangangalas an pagkagibo’; asin na si Jehova iyo ‘an Diyos na nagkakapot kan saimong hinangos.’ (Salmo 124:8; 139:14; Daniel 5:23, An Banal na Biblia) Ano an buot sabihon kan gabos na iyan?

Nangangahulugan iyan na utang ta sa satong Kaglalang an satong hinangos, an mismong buhay ta. (Guibo 17:28) Nangangahulugan iyan na an regalong buhay, an kagayunan kan kinaban sa palibot ta, an kagayagayahan sa pagkamuot asin pakikikatuod, an kaugmahan sa pagnamit, pagduot, pagdangog, asin pagparong—gabos ini regalo nin Diyos. (Santiago 1:17) Dai ka daw mauyon na an mga bendisyon na iyan patunay na siya sarong Katuod na angay sa satong paggalang asin pagtitiwala?

Totoo, tibaad nasasakitan kang magtiwala sa Diyos. Iniisip mo gayod na dai mo pa man siya midbid na marhay para pagtiwalaan. Natural sana iyan. Sa halipot na mga artikulong ini, dai ta mapag-uulayan an gabos na dahilan kun taano ta may mga nagsasabing maringis an Diyos. Pero bako daw na sulit man an paghihinguwang urog na mamidbid an Diyos? * Nagtitiwala kami na kun gigibuhon mo iyan, maaaraman mo an katotoohan dapit sa Diyos. Maringis daw siya? Kabaliktaran nanggad: ‘An Diyos pagkamuot.’—1 Juan 4:8.