Namundag ako sa La Ceiba, Honduras, an pinakanguhod sa limang magturugang asin solong lalaki. Ako man lang an púla sa pamilya. Delikado sa lugar mi, asin tios kaming marhay. Mas naggrabe an sitwasyon mi kan magadan si Tatay sa aksidente sa trabaho kan mga kuwatro anyos ako.

 Ginibo ni Nanay an pinakamakakaya niya para atamanon kaming magturugang, pero haros pirming kulang an kuwarta niya para mabakalan ako nin bado. Sa parati, linilipot ako pag nag-uuran ta mayo akong maimbong na bado.

 Mantang nagdadakula ako, nanudan ko an Honduras Sign Language (LESHO), kaya nakakaulay ko an ibang mga púla. Pero si Nanay saka an mga tugang ko dai tataong mag-LESHO, saka pirang senyas sana an aram ninda asin nag-iimbento sinda nin mga senyas para makaulay ako. Dawa arog kaiyan, padangaton ako ni Nanay saka prinotektaran niya ako. Paagi sa dikit na senyas na aram niya, pinatanidan niya ako na likayan an mga bisyo arog kan pagsigarilyo asin pagburat. Kaya, nagpapasalamat akong marhay na nagdakula ako na mayong mga bisyo.

 Kan aki pa ako, iniiba ako ni Nanay sa simbahan nin Katoliko, pero mayo lamang akong nasabutan dahil mayong nag-i-interpret sa sign language. Boring na marhay kaya kan mag-diyes anyos ako, dai na ako nag-iiba sa simbahan. Pero gusto ko pa man giraray na makanuod pa manungod sa Diyos.

 Kan 1999, kan 23 anyos ako, may nabisto akong sarong babayi haling Estados Unidos na miyembro kan Inter-community Church of God. Nag-adal kami nin Bibliya asin tinukduan niya ako nin American Sign Language (ASL). Nagustuhan kong marhay an mga nanudan ko sa Bibliya kaya nagdesisyon akong magin pastor. Kaya naglipat ako sa Puerto Rico asin nag-atender sa sarong Christian training center para sa mga púla. Kan magbalik ako sa La Ceiba kan 2002, nag-establisar ako nin simbahan para sa mga púla sa tabang kan nagkapira sa mga amigo ko. Saro sa sainda si Patricia, na pag-abot nin panahon nagin agom ko.

 Bilang pastor sa samong simbahan, nagtatao akong sermon sa LESHO, nagpapahiling nin mga ritrato manungod sa mga istorya sa Bibliya, asin iinaakto an mga istorya para masabutan kan mga púla. Binibisita ko man an mga púla sa kaharaning mga banwa para pakusugon sinda asin tabangan sinda sa mga problema ninda. Nagbiyahe pa ngani ako bilang misyonero sa Estados Unidos asin sa Zambia. Pero an totoo, mayo man akong gayong aram sa Bibliya. An sinasabi ko man sana sainda iyo an mga sinabi sako asin an mga nasasabutan ko sa mga ritrato. An totoo, mas dakul akong hapot kisa simbag.

 Sarong aldaw, may mga miyembro kan samong simbahan na nagpuon na magpalakop nin mga kaputikan manungod sako. Buratsero daa ako saka nambababayi. Talagang nadisganar ako saka naanggot. Dai nahaloy, binayaan mi ni Patricia an simbahan.

 Parating nagdadalaw samo ni Patricia an mga Saksi ni Jehova, pero dai man kami nagdadangog sa sainda. Pero pagkatapos ming bayaan an samong simbahan, nag-uyon si Patricia na makipag-adal nin Bibliya sa sarong mag-agom na Saksi—si Thomas saka Liccy. Naghanga ako ta dawa bako sindang púla, tatao sindang mag-sign language. Kaya dai nahaloy, nag-iba na ako ki Patricia sa pag-adal.

 Pirang bulan kaming nag-adal gamit an mga video sa ASL. Pero kan sabihon samo kan pira ming amigo na parasunod man sana daa sa mga tawo an mga Saksi ni Jehova, nagpundo kami sa pag-adal nin Bibliya. Dawa ipinahiling sako ni Thomas an patunay na an mga Saksi ni Jehova dai nagsusunod sa mga tawong lider, dai ako naniwala sa saiya.

 Pakalihis nin pirang bulan, na-depress na marhay si Patricia, kaya namibi siya sa Diyos na may magbisita giraray saiya na mga Saksi ni Jehova. Pagkatapos, an kataid mi na saro sa mga Saksi ni Jehova nagdalaw ki Patricia asin nagsabi na sasabihan niya si Liccy na bisitahon si Patricia. Talagang sarong tunay na amigo si Liccy. Surusemana niyang binisita si Patricia para pakusugon ini asin tukduan sa Bibliya. Pero, duda pa man giraray ako sa mga Saksi.

 Kan 2012, nagkaigwa an mga Saksi ni Jehova nin espesyal na kampanya nin pag-alok kan video na Gusto Daw Nindong Maaraman an Katotoohan? sa LESHO. Tinawan kami ni Liccy nin saro kaiyan. Kan hilingon ko iyan, nabigla ako ta mayo palan sa Bibliya an dakul sa mga doktrinang itinutukdo ko kaidto, arog kan nagkakalayong impiyerno asin imortalidad kan kalag.

 Kan suminunod na semana, nagduman ako sa Kingdom Hall kan mga Saksi ni Jehova para makaulay si Thomas. Sinabi ko saiya na gusto kong itukdo sa mga púla an katotoohan manungod sa Bibliya, pero bako bilang saro sa mga Saksi ni Jehova. Iniisip ko na magbilog nin sadiri kong simbahan para sa mga púla. Kinomendaran ako ni Thomas sa nagbalik kong kaigutan pero ipinahiling niya sako an Efeso 4:5, na diyan idinuduon na kaipuhan na magkasararo an tunay na Kristiyanong kongregasyon.

 Tinawan man ako ni Thomas kan videong Jehovah’s Witnesses—Faith in Action, Part 1: Out of Darkness sa ASL. Ipinahiling kan videong ini kun paano maingat na pinag-adalan nin sarong grupo nin mga lalaki an Bibliya tanganing masabutan an katotoohan manungod sa panginot na mga doktrina kaiyan. Mantang hinihiling ko an video, garo nahihiling ko an sadiri ko sa mga lalaking idto. Arog ninda, hinahanap ko an katotoohan. Nakumbinsir ako kan videong iyan na itinutukdo kan mga Saksi an katotoohan huling sa Bibliya sana ninda ibinabasar an saindang mga tinutubod. Nagpa-Bible study giraray ako, asin kan 2014, binawtismuhan kami ni Patricia bilang mga Saksi ni Jehova.

 Gusto ko an kongregasyon kan mga Saksi ni Jehova huling malinig iyan, kun paanong an Diyos malinig. Mahihiling iyan sa pagtaram kan mga parasamba asin sa pagtratar ninda sa iba. Mapagpatuninong sinda asin pinapakusog ninda an lambang saro. Nagkakasararo an mga Saksi asin gabos sinda pararehong mga katotoohan sa Bibliya an itinutukdo sain man sindang nasyon o ano man an saindang lengguwahe.

 Naugma akong manudan kun ano talaga an itinutukdo kan Bibliya. Halimbawa, nanudan ko na si Jehova an Diyos na Makakamhan sa Gabos, an Soberano sa bilog na daga. Pareho niyang namumutan an mga dai nakakadangog saka an mga nakakadangog. Pinapahalagahan kong marhay an pagkamuot sako nin Diyos. Nanudan ko man na an daga magigin sarong magayunon na paraiso asin na magkakaigwa kita nin oportunidad na mabuhay nin daing sagkod na may perpektong salud. Talagang hinahalat-halat ko nang mangyari iyan!

 Nauugma kaming ipakipag-ulay ni Patricia sa iba pang mga púla an manungod sa Bibliya. Ngunyan, tinutukduan mi na sa Bibliya an nagkapirang miyembro kan dati ming simbahan. Pero bakong arog kaidtong pastor pa ako, mayo na akong hapot sa mga itinutukdo ko. Nakua ko man giraray an mga simbag sa mga hapot ko paagi sa pakikipag-adal sa Bibliya sa mga Saksi ni Jehova.