Nagdadanay na neutral sa pulitika an mga Saksi ni Jehova huli sa itinutukdo kan Bibliya. Dai kami nangangampanya, nagboboto, nagkakandidato, o nagpoprotesta para baguhon an gobyerno. Nagtutubod kami na an Bibliya igwa nin masarig na mga dahilan kun taano ta dapat kaming magin neutral.

•   Sinusunod mi an halimbawa ni Jesus, na nagsayumang magkaigwa nin posisyon sa pulitika. (Juan 6:15) Itinukdo niya sa saiyang mga disipulo na “sinda bakong kabtang kan kinaban” asin lininaw niya na mayo dapat sindang kampihan pag-abot sa mga isyu sa pulitika.​—Juan 17:14, 16; 18:36; Marcos 12:13-17.

•   Maimbod kami sa Kahadian nin Diyos. Iyan an sinambit ni Jesus kan siya magsabi: “An maugmang baretang ini kan Kahadian ihuhulit sa bilog na kinaban.” (Mateo 24:14) Bilang mga representante kan Kahadian nin Diyos, na tinawan nin pagbuot na ibalangibog an pag-abot kaiyan, nagdadanay kaming neutral sa mga isyu sa pulitika kan gabos na nasyon, pati na kan nasyon kun sain kami nakaistar.​—2 Corinto 5:20; Efeso 6:20.

•   Huling neutral kami, dai kami nag-aalangan na ipakipag-ulay an maugmang bareta kan Kahadian nin Diyos sa mga tawong iba-iba an paniniwala sa pulitika. Hinihinguwa mi na ipahiling sa samong mga tataramon asin mga ginigibo na nagtitiwala kami na sosolusyunan kan Kahadian nin Diyos an mga problema sa kinaban.​—Salmo 56:11.

•   Huling dai kami nababanga kan pulitika, nagkakasararo kami bilang sarong internasyonal na kasararuan nin magturugang. (Colosas 3:14; 1 Pedro 2:17) Sa kabaliktaran, nagkakabaranga an mga miyembro kan mga relihiyon na nakikiaram sa pulitika.​—1 Corinto 1:10.

 Paggalang sa mga gobyerno. Dawa dai kami nakikikabtang sa pulitika, iginagalang mi an awtoridad kan mga gobyerno na nakakasakop samo. Kauyon ini kan pagbuot kan Bibliya: “Magpasakop an lambang tawo sa haralangkaw na awtoridad.” (Roma 13:1) Nagsusunod kami sa ley, nagbabayad nin buhis, asin nakikikooperar kami sa mga proyekto kan gobyerno para sa kapakanan kan mga nasasakupan kaiyan. Imbes na magpartisipar sa ano man na pagpurbar para pabagsakon an gobyerno, sinusunod mi an sadol kan Bibliya na ipamibi an “mga hadi saka an gabos na may awtoridad,” lalo na pag naggigibo an mga ini nin mga desisyon na puwedeng makaapektar sa samong katalingkasan sa pagsamba.​—1 Timoteo 2:1, 2, nota sa ibaba.

 Iginagalang mi man an deretso kan iba na magdesisyon manungod sa pulitika. Halimbawa, dai kami nangriribok sa mga eleksiyon o nakikiaram sa mga gustong magboto.

 Bagong ideya daw an samong pagigin neutral? Dai. Arog man kaiyan an paninindugan kan mga apostol asin kan mga Kristiyano kan inot na siglo kun manungod sa pulitika. An librong Beyond Good Intentions nagsasabi: “Dawa ngani nagtutubod sinda na dapat nindang igalang an mga nasa awtoridad, an inot na mga Kristiyano dai nagtutubod na dapat sindang makikabtang sa pulitika.” Sinasabi man sa librong On the Road to Civilization na an inot na mga Kristiyano “habong magkaigwa nin posisyon sa pulitika.”

 Huma daw sa seguridad kan nasyon an samong pagigin neutral sa pulitika? Dai. Mga tawo kaming mapagpatuninong kaya mayo nin dapat ikatakot an mga nasa awtoridad. Manungod sa pagigin neutral mi, nagkomento an National Academy of Sciences of Ukraine sa report ninda kan 2001: “Sa ngunyan, tibaad habo kan nagkapira an paninindugan na ini kan mga Saksi ni Jehova; iyan an dahilan kaya penersiger sinda kaidto kan totalitaryong Nazi asin Komunistang mga rehimen.” Pero, sa ibong kan pang-aapi kan Sobyet, an mga Saksi “nagdanay na masinunod sa ley. Onesto asin mahigos sindang nagtrabaho sa mga uma saka sa mga planta asin dai sinda nagin huma sa Komunistang rehimen.” Sa ngunyan man, an paniniwala asin ginigibo kan mga Saksi ni Jehova, uyon sa kongklusyon kan report, dai “makakapaluya sa seguridad asin integridad kan dawa anong estado.”