Taano ta Dai Nagpa-Pasko an Mga Saksi ni Jehova?

I-PLAY

Salang pakaintindi kan kadaklan

Bakong totoo: Dai nagtutubod ki Jesus an mga Saksi ni Jehova kaya dai sinda nagpa-Pasko.

Totoo: Mga Kristiyano kami. Nagtutubod kami na maliligtas an mga tawo paagi sana ki Jesu-Cristo.—Gibo 4:12.

Bakong totoo: Nagkakabaranga an mga pamilya dahil tinutukduan nindo an mga tawo na dai mag-Pasko.

Totoo: Mahalagang marhay samo an pamilya, saka ginagamit mi an Bibliya tanganing matabangan kami na pakusugon an relasyon mi bilang pamilya.

Bakong totoo: Dai nindo namamatian an “espiritu kan Pasko”—an magin matinao, katuninungan sa daga, asin karahayan nin buot.

Totoo: Aroaldaw, pigmamaigutan ming magin matinao asin magin marahay sa pakikiiba sa mga tawo. (Talinhaga 11:25; Roma 12:18) Halimbawa, sa mga pagtiripon mi asin pag-eebanghelyo, sinusunod mi an sinabing ini ni Jesus: “Inako nindong daing bayad, itao man nindong daing bayad.” (Mateo 10:8) Apuwera diyan, sinasabi mi man sa mga tawo na an Kahadian nin Diyos an talagang makakatao nin katuninungan sa daga.—Mateo 10:7.

Taano ta dai nagpa-Pasko an mga Saksi ni Jehova?

Ipinagbuot ni Jesus na girumdumon bako an saiyang pagkamundag kundi an saiyang kagadanan.—Lucas 22:19, 20.
Dai nagseselebrar nin Pasko an mga apostol ni Jesus saka an mga disipulo niya kaidto. An New Catholic Encyclopedia nagsasabi na ‘nagpuon an pagselebrar kan Navidad pakalihis na kan 242 C.E.,’ labing sarong siglo na an nakaagi pagkagadan kan huring apostol.
Mayong ebidensiya na si Jesus namundag nin Disyembre 25; dai sinabi sa Bibliya an petsa kun kasuarin siya namundag.
Nagtutubod kami na dai inuuyunan nin Diyos an Pasko huling mga kostumbre asin ritwal nin mga pagano an ginikanan kaiyan.—2 Corinto 6:17.

Taano ta kaipuhan pang magin isyu an pagselebrar nin Pasko?

Dakul an nagpa-Pasko dawa aram na ninda na hali iyan sa mga pagano asin dai nin basehan sa Bibliya. Tibaad iniisip ninda: Kaipuhan daw talagang mapaiba an mga Kristiyano? Taano ta kaipuhan pang magin isyu an bagay na iyan?

Sinasabi kan Bibliya na gamiton ta an satong kakayahan na mag-isip. (Roma 12:1, 2) Itinutukdo man kaiyan sa sato na pahalagahan an katotoohan. (Juan 4:23, 24) Importante man samo kun ano an magigin paghiling kan iba, pero sinusunod mi an Bibliya maski pa habuan ninda kami dahil diyan.

Dai kami nagpa-Pasko, pero iginagalang mi an deretso kan iba na magdesisyon sa bagay na ini. Dai mi pinipirit an iba na dai magselebrar kaiyan.