An Griegong pangaran kan libro sa Bibliya na Kapahayagan, an A·po·kaʹly·psis, nangangahulugan na “Pagbuyagyag” o “Paghahayag.” An pangaran na ini nagpaparisa sa kahulugan kan Kapahayagan—an paghali kan tahob sa mga bagay na nakatago o paghahayag kan mga bagay na mangyayari haloy pa pagkatapos isurat an libro. An dakul sa mga hula kaini mauutob pa sana.

Sumaryo kan libro nin Kapahayagan

•   Introduksiyon.—Kapahayagan 1:1-9.

•   Mga mensahe ni Jesus sa pitong kongregasyon.—Kapahayagan 1:10–3:22.

•   Sarong bisyon dapit sa Diyos na nasa saiyang trono sa langit.—Kapahayagan 4:1-11.

•   Serye nin mga bisyon na sunod-sunod na mangyayari:

  •   Pitong selyo.—Kapahayagan 5:1–8:6.

  •   Pitong trumpeta, na an huring tulong trumpeta naghahayag kan tulong “hirak man.”—Kapahayagan 8:7–14:20.

  •   Pitong mangko, na an kada saro igwa nin damat na nagrerepresentar sa paghukom nin Diyos na iuula sa daga.—Kapahayagan 15:1–16:21.

  •   Mga bisyon dapit paglaglag sa mga kaiwal nin Diyos.—Kapahayagan 17:1–20:10.

  •   Mga bisyon dapit sa mga bendisyon na itatao nin Diyos para sa langit asin sa daga.—Kapahayagan 20:11–22:5.

•   Kongklusyon.—Kapahayagan 22:6-21.

Mga paagi para masabutan an libro nin Kapahayagan

1.   Positibo an mensahe kaiyan, bakong makatatakot para sa mga naglilingkod sa Diyos. Kabaliktaran sa iniisip kan dakul na an terminong “apocalipsis” konektado sa grabeng kapahamakan, an libro nin Kapahayagan nagpupuon asin nagtatapos sa pagsabi na an mga nagbabasa, nakakasabot, asin nag-aaplikar sa mensahe kaiyan magigin maugma.—Kapahayagan 1:3; 22:7.

2.   Naggagamit an Kapahayagan nin “mga tanda,” o mga simbolo, na dai dapat sabuton sa literal.—Kapahayagan 1:1.

3.   Dakul sa panginot na mga karakter asin simbolo sa libro nin Kapahayagan an nasambit na sa nainot na mga libro kan Bibliya:

   •   Jehova—“an tunay na Diyos sa kalangitan” asin an Kaglalang kan gabos na bagay.—Deuteronomio 4:39, NW; Salmo 103:19; Kapahayagan 4:11; 15:3.

   •   Jesu-Cristo—“an Kordero nin Diyos.”—Juan 1:29; Kapahayagan 5:6; 14:1.

   •   Satanas na Diyablo—an kaiwal nin Diyos.—Genesis 3:14, 15; Juan 8:44; Kapahayagan 12:9.

   •   Dakulang Babilonya—arog kan suanoy na Babilonya (Babel), sarong kaiwal kan Diyos na Jehova saka kan saiyang mga lingkod asin an pinaghalian kan relihiyosong mga kaputikan.—Genesis 11:2-9; Isaias 13:1, 11; Kapahayagan 17:4-6; 18:4, 20.

   •   “An dagat”—nagrerepresentar sa maraot na mga tawo na kontra sa Diyos.—Isaias 57:20; Kapahayagan 13:1; 21:1.

   •   Mga bagay na konektado sa suanoy na tabernakulo na ginamit sa pagsamba sa Diyos—arog kan kaban kan tipan, salming na dagat (sarong plangganang hanawan), mga lampara, pagdulot nin mga insenso, asin sarong altar sa pag-atang.—Exodo 25:10, 17, 18; 40:24-32; Kapahayagan 4:5, 6; 5:8; 8:3; 11:19.

   •   Mababangis na hayop—nagrerepresentar sa mga gobyerno nin tawo.—Daniel 7:1-8, 17-26; Kapahayagan 13:2, 11; 17:3.

   •   Mga numerong may simbolikong kahulugan.—Kapahayagan 1:20; 8:13; 13:18; 21:16.

4.   An mga bisyon mangyayari sa “aldaw kan Kagurangnan,” na nagpuon kan 1914. Sa taon na iyan, naestablisar an Kahadian nin Diyos asin namahala na si Jesus bilang Hadi. (Kapahayagan 1:10) Kaya, makakaasa kita na an kautuban kan Kapahayagan mangyayari sa satong panahon.

5.   Tanganing masabutan an libro nin Kapahayagan, kaipuhan niyato an kadunungan hali sa Diyos asin an tabang kan mga nakakasabot na kan librong iyan, mga bagay na nakakatabang man sa sato para masabutan an ibang libro kan Bibliya.—Gibo 8:26-39; Santiago 1:5.