Dakul na mag-agom an nagkakaproblema sa saindang komunikasyon, dawa pag magkaibanan sinda. Ano an mga dahilan?

•  Magkaibanan pero harayo sa kada saro—taano?

•  An magigibo nindo

•  An sinasabi nin mga mag-agom

•  Giya sa pag-uulay

•   Kapagalan

   “Pag may panahon kaming mag-ulay-ulay, kun bako si agom an pagal, ako an pagal. Pag ako pati pagal, madalion akong mairitar sa saradit na bagay. Kaya mas marahay pang maghiling na lang kami nin TV.”—Anna.

•   Paggamit nin gadyet

   “Puwedeng maubos kan social media saka mga libangan sa Internet an panahon mo. Dai mo naririsa pirang oras ka na palan diyan, tapos dai mo lamang palan nakaulay si agom mo. Kaya garo man lang kamo dai magkaibanan sa harong.”—Katherine.

•   Magkaiba nin gusto

   “Pagpuli ni agom haling trabaho, sa parati nauubos an panahon niya sa mga libangan niya. Sabagay tama man lang na may panahon siya para sa sadiri niya, ta mahiguson man siya sa trabaho. Pero sana mas dakul an panahon na magkaibanan kami.”—Jane.

•   Trabaho

   “Dahil sa teknolohiya, maski nasa harong ka kaiba an pamilya, makakapagtrabaho ka. Dakul na beses nangyayari sako na nagre-reply ako sa mga e-mail saka text na dapat kutana panahon ko iyan para ki agom.”—Mark.

•   Tandaan na bakong opsiyonal an pagtao nin panahon sa lambang saro, kundi sarong bagay iyan na kaipuhan nanggad gibuhon.

   Prinsipyo sa Bibliya: “[Siyertuhon] nindo kun ano an mas importanteng mga bagay.”—Filipos 1:10.

   Pag-isipan: Ipinapahiling daw kan mga ginigibo mo na mas importante saimo an relasyon nindong mag-agom kisa sa trabaho o mga libangan mo? Tada-tada na lang daw kan panahon saka atensiyon mo an itinatao mo sa saimong agom?

   Tip: Dai basta maghalat na sana nin pagkakataon. Mag-iskedyul nin mga panahon na kamo lang kan agom mo an magkaibanan na mayong mga pandisturbo.

   “Gustong-gusto ko pag may pigpaplano si agom na para lang samong duwa. Dahil kaiyan namamatian kong espesyal ako saiya, asin na gusto niya talaga akong makaiba-iba. Kaya mas namumutan ko siya.”—Anna.

•   Makanuod na dai nguna pag-intindihon an mga gadyet mo.

   Prinsipyo sa Bibliya: “May itinalaan na panahon para sa gabos na bagay.”—Eclesiastes 3:1.

   Pag-isipan: Pirang beses nang nangyari saimo na nadisturbo ka dahil sa nag-abot na text o nagluwas na alert asin dai mo na lugod natawan nin bilog na atensiyon an agom mo?

   Tip: Magkakan na magkaibanan kisiyera sarong beses kada aldaw—asin dai pagdarahon an cellphone nindo. An oras nin pagkakan magayunon na oportunidad para pag-ulayan an mga nangyari saindo sa bilog na aldaw.

•   Pag posible, magkaibanan na gibuhon an mga gibo sa harong.

   Prinsipyo sa Bibliya: “Mas marahay an duwa kisa sa saro huling mas dakula an saindang pakinabang sa saindang pagpapagal.”— Eclesiastes 4:9, nota sa ibaba.

   Pag-isipan: Pirang beses nangyayari saindo na kanya-kanya kamo kan agom mo sa pag-asikaso sa mga kaipuhan sa harong?

   Tip: Magtinabangan—dawa sa mga gibuhon na dai kaipuhan an duwang tawo.

   “Imbes na isipon na trabaho an paggroseri, paghugas nin plato, pagtipig nin bado, saka pag-asikaso nin natad, taano ta dai isipon na oportunidad iyan na magkaibanan kamo?”—Nina.

•   Magin rasonable sa mga inaasahan

   Prinsipyo sa Bibliya: “Mahayag lugod sa gabos na tawo an saindong pagigin rasonable.”—Filipos 4:5.

   Pag-isipan: Paano mo maipapahiling na rasonable ka sa mga inaasahan mo sa saimong agom?

   Tip: Mag-ulay para maaraman kun paano nindo maitatao an pangangaipo kan lambang saro. Pagdesisyunan kun paano nindo gagamiton an saindong panahon sa paaging magigin maugma an kada saro saindo, dangan lubos na suportaran iyan.

   “Si agom garo dai nauubusan nin kusog, mantang ako madaling mapagal dahil sa problema sa salud. Parati kong sinasabi saiya na okey lang na magluwas siya para maglibang, tapos hahalaton ko na lang siya sa harong. Kaya ako nasa harong lang ta kaipuhan kong magpahingalo, tapos siya man nasa luwas ta kaipuhan niyang mag-ehersisyo. Nagrarahay an pagmati mi ta nagigibo mi su kaipuhan ming gibuhon.”—Daniela.

 Inot, puwedeng personal na pag-isipan kan kada saro saindo an minasunod na hapot. Dangan, pag-ulayan nindong duwa an simbag nindo.

•   Sa hiling mo, igo daw an panahon na itinatao nindo sa lambang saro?

•   Anong mga paghihinguwa an ginigibo kan saimong agom manungod sa bagay na ini na angay na komendaran?

•   Ano pang mga bagay an gusto mong mapauswag kan agom mo?

•   Gurano kaparati kang nadidisturbo kan mga gadyet pag nag-uulay kamo kan agom mo?

•   Paano nindo parehong maipapahiling an pagigin rasonable sa mga inaasahan nindo sa lambang saro?

•   Anong mga pagbabago an puwede nindong gibuhon sa semanang ini para mas lubos kamong makatao nin panahon sa lambang saro?