Abantu abengi abali mu kufwa batila, bomfwa kwati umweo no mubili wabo fya-akanikana, e lyo bamo batila balamona ulubuuto lwasanika, nelyo icifulo icisuma sana. Icitabo cimo icilanda pa mfwa citila, ‘Bamo nga baumfwa no kumona ifya musango yu, balomfwa bwino ukuti baishibila kabela ifyo ubumi bwabo bukaba nga bafwa.’ Nangu ca kuti Baibolo tayalandapo pa bantu abamwenepo ifya musango yu, yalilanda pa cine icilanga ukuti ifyo abantu bamona nga bali mu kufwa, te fimonwa ifilanga ifyo ubumi bwabo bukaba nga bafwa.

 Abafwa tabeshiba icili conse.

Baibolo itila “abafwa tabaishiba akantu nangu kamo.” (Lukala Milandu 9:5) Umuntu nga afwa, takuba ukuli konse uko aya, pantu ninshi nafwa. Icisambilisho ca kutila umuntu alikwata umweo uushifwa, ca bufi, pantu te fyo Baibolo ilanda. (Esekiele 18:4) Kanshi filya abantu ababa mupepi no kufwa balanda ukuti balamona ifimonwa ifilanga ukuti bali ku muulu, mu helo nelyo bali no bumi bumbi, fya bufi.

 Bushe Lasaro alilandilepo ifilanga ukuti umuntu alatwalilila ukuba no mweo nga afwa?

Ilyashi lyalembwa muli Baibolo lilanga ukuti Lasaro alifwile: Yesu e wamubuushishe ninshi napapita ne nshiku 4. (Yohane 11:​38-44) Nga ca kuti Lasaro alitwalilile ukuba uwa mweo kumbi ilyo afwile, ninshi kuti twatila Yesu alimufyengele pa kumubuusha no kumubwesesha pano calo. Lelo Baibolo tayatwebapo ukuti Lasaro alilandile ukuti alitwalilile ukuba no mweo ilyo afwile. Nga ca kuti Lasaro alitwalilile ukuba no mweo, kwena nga alilandile. Yesu alingenye imfwa ya kwa Lasaro ku kulaala utulo, pantu ilyo Lasaro afwile taishibe akantu nangu kamo.​—Yohane 11:​11-14.