Awe, Baibolo taisambilisha ukuti ‘nga wacetekela fye muli Yesu ninshi wapusuka.’ Umuntu uwacetekela muli Yesu kabili uwakwata ne subilo lya kupusuka, limo kuti aleka ukuba ne citetekelo kabili te kuti apusuke no kupusuka. Baibolo ilanda ukuti pa kuti tutwalilile ukuba ne citetekelo, tulingile ukubombesha nelyo “ukulwila icitetekelo.” (Yuda 3, 5) Abena Kristu ba mu nshiku sha batumwa abasumiine muli Yesu babebele ukuti: “Mulebombela ipusukilo lyenu no mwenso no kututuma.”—Abena Filipi 2:12.

Amalembo ya mu Baibolo ayalanga ukuti ici icisambilisho ca bufi

•   Baibolo yalilanda pa membu shabipisha ishingalenga umuntu afilwa ukwingila mu Bufumu bwa kwa Lesa. (1 Abena Korinti 6:9-11; Abena Galatia 5:19-21) Nga ca kuti ukucetekela fye muli Yesu kuti kwalenga umuntu apusuka, ninshi Baibolo nga tayalanda pa membu ishingalenga umuntu afilwa ukupusuka. Lelo Baibolo ilalanga ukuti umuntu nangu alikwete isubilo lya kupusuka, kuti aleka ukuba ne citetekelo no kutendeka ukucita imembu ishabipisha na kabili. Ku ca kumwenako, Baibolo pa AbaHebere 10:26 itila: “Nga tulacita ulubembu ku mufulo fye pa numa ya kwishiba icine bwino bwino, ninshi takwashala na kabili ilambo nangu limo ilya pa membu shesu.”—AbaHebere 6:4-6; 2 Petro 2:20-22.

•   Yesu alilandile ico cacindamina ukutwalilila ukuba ne citetekelo ilyo alandile pa cilangililo umo aipashenye ku cimuti ca mwangashi e lyo abasambi bakwe ku misambo ya mwangashi. Abasambi bamo baali no kulacita ifyalelanga ukuti baali ne citetekelo, lelo mu kupita kwa nshita bamo baali no kuleka ukuba ne citetekelo kabili tabaali no kuba ne subilo lya kupusuka, lelo baali no kuba “ngo musambo [uushitwala] uo bapoosa.” (Yohane 15:1-6) Umutumwa Paulo na o alibomfeshe icilangililo icapalana ne ca kwa Yesu ilyo alandile ukuti Abena Kristu abashitwalilila ukuba ne citetekelo ‘bakaputulwa,’ nelyo ukonaulwa.—Abena Roma 11:17-22.

•   Abena Kristu balingile ukuba ‘abalola.’ (Mateo 24:42; 25:13) Abashaba abalola lwa ku mupashi pa mulandu wa kucita “imilimo ya mfifi” nelyo abashibomba bwino imilimo iyo Yesu atupeela, tabakwata isubilo lya kupusuka.—Abena Roma 13:11-13; Ukusokolola 3:1-3.

•   Amalembo ayengi yalanga ukuti ababa ne subilo lya kupusuka balingile ukutwalilila ukuba aba cishinka ukufika na ku mpela. (Mateo 24:13; AbaHebere 10:36; 12:2, 3; Ukusokolola 2:10) Abena Kristu ba mu nshiku sha batumwa balitemenwe sana ilyo baumfwile ukuti Abena Kristu banabo balitwalilile ukuba aba cishinka. (1 Abena Tesalonika 1:2, 3; 3 Yohane 3, 4) Baibolo nga tayatweba ukutwalilila ukuba aba cishinka, nga ca kuti umuntu kuti apusuka nangu tatwalilile ukuba uwa cishinka.

•   Umutumwa Paulo ashininkishe fye ukuti akapusuka lintu aishibe ukuti ali mupepi no kufwa. (2 Timote 4:6-8) Ilyo talaba mupepi no kufwa, alishibe ukuti taali no kupusuka nga ca kuti alekonkelela ififwaya umutima. Alembele ati: “Ntuutaula umubili wandi no ku-uteka ubusha, pa kuti, ilyo nashimikila bambi, benkaana.”—1 Abena Korinti 9:27; Abena Filipi 3:12-14.