Baibolo itila Yesu “bamwipeye no mubili wa buntunse, lelo abuushiwe no mubili wa ku muulu.”—1 Petro 3:18; Imilimo 13:34; 1 Abena Korinti 15:45; 2 Abena Korinti 5:16.

 Amashiwi Yesu umwine alandile yalangilile ukuti tali no kubuushiwa no mubili wa munofu no mulopa. Alandile ukuti ali no kupeela nge cilubula ‘umubili wakwe pa mulandu wa bumi bwa ba pano calo.’ (Yohane 6:51; Mateo 20:28) Yesu abuuka no mubilil wa buntunse, nga alyonawile ilambo lya cilubula. Nomba, taonawile ilambo apeele pantu Baibolo ilanda ukuti apeele umubili wakwe no mulopa “umuku fye umo capwa.”—AbaHebere 9:11, 12.

Nga ca kuti Yesu abuushiwe no mubili wa mupashi, cinshi abasambi bakwe bamumwenene?

•  Ifibumbwa fya mupashi kuti fyafwala imibili ya buntunse. Ku ca kumwenako, kale bamalaika abafwele imibili ya buntunse balelya no kunwena pamo na bantunse. (Ukutendeka 18:1-8; 19:1-3) Na lyo line, bali fibumbwa fya mupashi kabili balesha ne mibili ya buntunse.—Abapingushi 13:15-21.

•  Yesu na o ilyo abuushiwe alifweleko umubuli wa buntunse pa nshita inono nga filya fine bamalaika balecita. Apo ali cibumbwa ca mupashi, alemoneka ku bantu kabili aleluba inshita iili yonse. (Luka 24:31; Yohane 20:19, 26) Alemoneka ne mibili iyapusanapusana ica kuti abantu tabalemwishiba. Nangu fye fibusa fyakwe fyalemwishiba fye pa mulandu ne fyo alelanda nelyo ifyo alecita.—Luka 24:30, 31, 35; Yohane 20:14-16; 21:6, 7.

•  Ilyo Yesu amonekele ku mutumwa Toma, ali no mubili uwakwete ifibala. Ico abomfeshe umubili uwakwete ifibala ni co alefwaya ukukosha icitetekelo ca kwa Toma, pantu Toma aletwishika nga Yesu alibuushiwe.—Yohane 20:24-29.