Umulapo wa kukaanalalapo no muntu uo ushilaupana nankwe, mulapo uo umuntu alapa ilyo alemba nelyo ukulanda ukuti takatale alaalapo no muntu mpaka akope nelyo ukuupwa.

 Iyi imilapo yatendeke ukuseeka muli ba 1990 ilyo kwali ukukumana kwa Southern Baptist Convention mu America, kabili pali uku ukukumana balitendeke programu baleita ukuti: “Uwakwata Ukutemwa kwa Cine Alalolela.” Ico bapangiile iyi programu, kwafwa abacaice ukukaanalacita ubulalelale mpaka baupa nelyo ukuupwa. Pa kukoselesha abacaice, balebomfya amafunde ya mu Baibolo e lyo na bacaice abalekoselesha abanabo.

 Kwali programu na imbi iyatendeke pa numa, kabili abacaice abalapile imilapo balebafwika inindaminwe ya silfere pa kuti balelanga no kulaibukisha ukuti balilapa ukukanalaalapo no muntu uo bashilaupana nankwe.

 Kwena caba fye no muntu mwaipusha.

•   Ilyo ba Christine C. Kim na ba Robert Rector bafwailishe pali ili ilyashi, basangile ukuti, “abacaice abengi abalapa iyi imilapo tabatendeka bwangu ukucita ubulalelale kabili banono fye abatendeka bwangu.”

•   Ilyo aba mu kabungwe ka Guttmacher Institute bafwailishepo, bena basangile ukuti, “abacaice abalapa iyi imilapo bacitila fye mumo mwine ubulalelale na bashilapako.”

 Cinshi ifyo basangile fyapusanine?

•   Abafwailisha bamo balinganya abalapa iyi imilapo ku bantu abashilapako iyi imilapo abashasumina muli fimo fine pa lyashi lya kulaalana.

•   Bambi balinganya abalapa na bashilapa abasumina muli fimo fine pa lyashi lya kulaalana.

 Finshi abaipwishe abasumina muli fimo fine basangile? Ba Dr. Janet Rosenbaum, abasambilila pa bumi bwa misepela balandile ukuti pa numa ya myaka 5, “abalapa na bashilapa bacita fye fimo fine.”

 Ifyo abapangile aya amaprogramu balefwaya tafyabipile. Nomba ubwafya bwa kuti tabasambilisha ifyo abacaice bengacita pa kuti tabacitile ubulalelale. Ba Dr. Rosenbaum balandile ukuti abengi abalapa ukuti tabakulacita ubulalelale “tabacita ifyo balaya. Pa kuti umuntu elacita ubulalelale, afwile ukushininkisha ukuti bwalibipa, te pa mulandu fye wa mulapo.”

 Baibolo taikoselesha abantu ukulapa umulapo wa kukanacita ubulalelale, lelo ibakoselesha ukuba na “mano aya kulekanya icalungama ne calubana.” (AbaHebere 5:14) Na kuba, icifwile ukulenga umuntu ukukanacita ubulalelale, kufwaya ukusekesha Uwatendeke icupo, te kutiina ukwambula amalwele nelyo ifumo.—Mateo 5:19; 19:4-6.

 Ifyo Baibolo ilanda fyabelako ku busuma bwesu. (Esaya 48:17) Kanshi bonse fye, nampo nga baice nelyo bakalamba, kuti basambilila ukumfwila ifunde lya kwa Lesa ilitila “fulumuka ubulalelale.” (1 Abena Korinti 6:18) Nga baupa nelyo ukuupwa e lyo bakalaipakisha ukupanga icupo ukwabula amalangulushi na masakamika ayo umuntu akwata nga alaala no muntu uo ashilaupana nankwe.